Ei da isser ja widder……..

Guude,

also jetzt soll Armin die Fee widder Zaubern im Waldstadion. Sacht jedenfalls die Presse einhellisch. Geh mer ma devo aus das des stimmt. Da reschd sisch jetzt widder die ganz Eintracht Gemeinde uff un is gespalde. Die, diewo immer meckern schlache die Händ übberm Kopp zusamme und trache dem Armin nach das der damals hiegeschmisse hät. Hat der ja net, der hat nur den Neue Vertrach net unnerschribbe. Die annern sehe de Armin als Heilsbringer. aach des is e bissje übbertribbe. Wie immer lieschd wohl die Warheit erschend wo in de Mitt.

Das  der damals kaa Perpektive mehr gesehe hat bei uns, hab isch ihm ja aach erst e mal nachgetrache. Im nachhinein geb isch ihm abber reschd. Des Jahr mit dem Schaaf hat ja gezeischd das des einischermassen geklappt hat mit der Mannschaft un de Neunde Platz is ja aach net so schlescht gewese, abber Vorwärts gegange is es ja aach net. So manscher fraacht sisch jetzt nadürlisch was sisch denn so geännert hat, das der uff amal widder Perspektive sieht. E ganze Menge saach isch eusch.

Zum aane habber mer ja de alde,neue Präsi de Fischer. Der hat ja den lächerlische Agriff vom Bender un Konsorte bravurös abgeschmeddert. Im lauf vom Winter un Frühjahr habbe dann die Herrn Steubing, Hellmann, Fischer und des ganze Bänkster gedöhns hinne dra, de Spaß-un Fortschrittsbremse Dagobert und Bender es Wasser abgegrabe. Des heißt die habbe de Uffsischtsrat uff Linie gebracht. Klar das die e Konzept un en Plan habbe. Des is ja jetzt aach in de letzt Zeit genuch breitgetrede worn. Also unser Sparkass Harsewinkel is ja in absehberer Zeit weg, also hat der ja eh net mer viel zu saache. Un weil der ja en guude Abgang habbe will, kann der sisch ja net mer erlaube vom Uffsischtsrat aan uff de Deckel zu krieje. Also werd der nix mer entscheide was gesche die Intresse vom Uffsischtsrat geht.Un das der neue Uffsichtsrat Fortschritt un net Bedong will, is ja allgemein bekannt. Also kann de Armin dorschaus jetzt widder Perspektive sehe bein unserner Eintracht.

Ob des jetzt werklisch so kimmt wern mer ja Afang der Woch sehe. Isch denk abber des werd wohl so komme. Un ma ganz ehrlisch de schlechteste Trainer war ja de Armin net, obwohl de Zwersch aach übber ihn geschennt hat wie en Rohrspatz. Aber des mache mer ja all früher odder späder übber jeden Trainer.

Also ihr Leut, uff e spannend Woch,

Eueern Bembelzwersch