Polkalbembel mit Kind im Ohr


Leut, jetzt sin mer im Vertelfinale vom DFB Pokal, schee. Des gibt übber e Milliönscher in de Kass, schee. Un weider ? De Abraham verletzt,  die Spieler müd un am Samsdaach gehts gesche die Pillekicker. Isch freu misch übber den Scheiß net. Der Pott is sowas von hässlisch, und dann steht da ach noch DFB druff. Also von mir aus könnde die des Ding behalt, eistaube lasse odder erschendwo im Stadtwald vergrabe. Als ob die Lischa mit dene Zerrobbte Speildaache net genuch wär. Die Pilledrehe habbe uff de Kautsch odder uff de Muddi gelesche am Mittwoch un unserne Bube mußt uffem Kadoffelacker in Hangover rumrenne. Des nenn isch Wettberwerbsverzerrung. Danke, Bitte DFB.

Zum Spiel kann mer ja net allzuviel saache. Es war halt en ganz normal Kick, de vermeeindlisch Klaane rennt sich de Herzbendel ab, un de angeblische Favorit erstarrt in Arroganz. Am End habbe mer gewonne, habbe noch e englisch Woch und wern womöschlisch aach noch die Dorfmannschaft aussem Ostwestfälische Outback besiesche. Klar, de Kassewart freut sisch. Nur isch befürschd das uns des am Ende möschlischerweise Euroba koste könnt. Also feut ihr Eusch ruhisch. Abber beschwerd Eusch net hinner her.

„Isch hab ein Kind im Ohr“ Des is de Werbesprch von dem klaane uffgestumpde Napoleon aus Lower Saxonie. Der hat ja die letzt Woch ferschterlische Sprüch gekloppt und rum getönt das er so odder so die Macht übbernemme dud bei Hangover 69. Da is er noch e bissje Forscher als de Kühne in Hamborsch. Mir kimmt des allerdings ehe so vor als hätt da Hangover  e Laus im Pelz.So schee des ja is wenn aaner kimmt und dir Geld in die Tasche stoppt damit de die Mannschaft voran bringst, nur was debei rauskomme kann sieht mer an dene Lachnummern in Münsche. Na net die Bauern, die annern, die, diewo Löwe haase und Fußballspiele wie en kastrierte Kader den mer hinnerm Ofe vorgelockt hat. Wer zahlt, bestimmt is halt doch e ziemlisch aussischtslose Sach im Fußball. Abber lasse mache, in die Bundeslischa gehörn so Provinzkäffer wie Hangover sowieso net. Da det de Zwersch net mal dod übberm Zaun hänge wolle.

So mache mer mal Schluß mit dem gemecker, isch geh Eusch dann am Sonndach widder uff de Sack mit dem Spieldaachsbembel gesche die Genverbiescher von Bayer Monsanto.

Euern Bembelzwersch

 

Speidaachsbembel gesche die Schlümpfe


Guude Let,

es gab ja, letzt Woch, des Gerüschd, unsern Fußballgott wollt nach Trumpistan. Des hat er abber Gestern eidrucksvoll widerleschd. In de Halbzeit hat nämlisch de Gazprom Putin sein Kumbel, den Maurer Donald aagrufe un ihm gesacht das der den AM14FG mit em Eireiseverbot belesche soll. Der is nämlisch stink sauer das der Fußballgott mit aam Kick sei ganze schöne Milliönscher die der in die Schlümpf gesteckt hat fer absolut sinnlos erklärt hat. Mer kann halt, aach mit viel Gaskohle aus dene Berschabbeider ka Fußballkünstler mache. Vor allem net wenn mer en Haufe Grobmotoriker und Beweschungslegastheniker eikaafe dud. Jetzt bin isch mal gespannt wen de Gammelfleischkönisch zu erst rausschmeiße dud, die Meenzer Pappnas Heidel odder de Puppekiste Weinzierl. Hauptsach egal, mir habbe drei Punkte geholt.

Schäme sollde sisch die Schlüpf abber besonners fer den Rübeacker den die da en Fußballplatz nenne. Fer des viele Geld en Fahrbare Rase baue un den dann immer noch net in Ordnung halde könne is schon e Armutszeuschnis. Da hat wahrscheinlisch de SC Wanne-Eickel 06 bessere Platzverhältnisse. Unserne Bube habbe abber trotz de Schlaachlöscher im Rase noch ganz ordentlisch gekickt. Besonners de Nordweststadt Messi hat des aane odder annere mal die Grobtreter in Blau ganz ordentlisch alt aussehe lasse. Aach wenn er dann nach seine Kabinettstückscher de Ball widder verlorn hat. Er hat gezeischd das aus dem Bub mal so en rischdisch Große wern kann.

Leid duds mer nur um den Schiedsrischder. Des wird wohl sei letzt Bundeslischaspiel gewese sei des der gepfiffe hat. Wenn mer beim Eintrachtspiel so unparteiisch pfeife dud, hat mer beim DFB kaa Übberlebenschance. Da gesche geht dem Bobic sei Ding mit der Multikultitruppe ja sein Wesch. Da sieht mer doch das des ganze Ausländer Gehäul von den ewisch Gestrische sowas von für die Füß is.

Also Leut, weider so !  United Nations of Bembeltown!  Gemeinsam im Herzen Europas !

Euern Bembelzwersch

Abbuzze, weiter gehts


Guude Leut !

Ausgereschend de Lukas. Tragisch? Ach was ! Des wär zwar uns damals mit unsernen Vollleder Addidas Uwe Seeler Kickschuh mit 18ner Schraubstolle net passiert, das es uns uff die Nas geleschd hätt. Aber bei dem neumodisch Plastikkram scheine ja viel Standschwierischkeite zu habbe. Es war halt e dumm Entscheidung mit de Händ an den Ball zu gehe. Abber sauer bin isch desswesche net uff de Lukas, sisch in Sekundebruchteile entscheide zu müsse, kann aach emal in die Hos gehe. Schwamm drübber. Viel eher könnt isch misch da widder übber des Eiterkinn uffresche. Des kleinlische Rumgepfeiffe in aaner Rischdung von dene sogenannde Unparteiische geht mer echsd uff die Eier. Net das es jetzt widder haast, de Bembelzwersch gibt dem Schiedsrischder die Schuld das mer verlorn habbe. Is net so, abber fröhlisch dezu beigetraache hat, der Herr Eiterkinn. Egal, mir habbe uffen Sack gekrischd un sosnst weider nix. Uffstehe, Abbuzze weider gehts, leide halt die Schlümpf am Freidaach.

Viel mehr scheint mir wischdisch zu sei, das mer Gestern sowas von deutlisch gesehe hat wo es mit unserm Fußball hiegeht wenn mer net uffbasse un unser bestes due um noch wenischtens e bissje was von unserm Sport zu erhalde. Es hat mir rischdisch weh getan als isch die Woche lese mußt das sich ausgereschnd de Beve vom Fußball verabschied hat.Ausgereschnd er, der werklisch viel fer die Eintracht un de Fußball gemacht hat.Beves Welt : Mein Fußball ist im Arsch.

Net das er unreschd hätt, mit dem was er schreibt. Allerdings hat de Bembelzwersch die Hoffnung noch net uffgegebbe. Aach wenn es größte Hurenhaus Europas (Sky) misch in de Halbzeit werklisch fast uff die Palme gebracht hat. Da mache die ihr total übberflüssisch Halbzeitanalyse, motze die Graphisch uff und un unnerlesche die mit dem verschissene Brausesymbol mit dene zwaa Ochse. Da kannste eschd nur noch kotze! Fer Geld mache die alles ! Da hilft nur Schlucke, weider mache  fest zu unserner Eintracht un alle anner Teams zu stehe die noch net aus de Retotorte stamme, un ihre Seele net an Investorn verkaaft habbe wie de HSV.

Un wenn dann so Leut wie de Bobic, aach wenn er in im Wortlaut falsch gelesche hat, in de Sach abber vollkommen zu reschd die Schläschdbabbler die mer beim Hurensender Sky Experte nennt kritisiern is ja aach noch Hoffnung.

Des entspreschende Lischd uff Leipzisch un sei Abhängischkeit von dem Östreischische Ochesenpisseproduzend hat de Fanbrief von de Leipzischer Polizei geworfer. Da hat doch, ausser das in Gruppe zum Stadion zu dabbele gesche des Sächsische Versammlungsgesetz vertößt drin gestanne das Politische Äußerung uffem Wesch un im Stadon verbode sinn!  Eiverbisch, was versteh die unner ner politische Äusserung von Fußballfans? Das mer gesche Rassismus is ? Odder habbe die erwart das die Eintrachtfans mit No AFD Plakate ins Stadion dabbele? Es könnt abber aach sei das die gemaant habbe das mer nix gesche de Schluchtescheißer Mateschitz saache derf. Des würd dann Sinn mache.

Wie gesacht, Abbuzze, weider mache. Adler lasse sisch von sowas net uffhalde. Die Schlümpf sollde sisch schon mal warm anziehe.

Bis dann Leut,

Ihne Ihrn Bembelzwersche

Spieldaachsbembel gesche die Radkappe und Klatschpappe


So, ferdisch ! Erst e mal fer dies Jahr. Un des mit em schöne Paukeschlach. 3:0 zu gewinne is ja an sisch schon schee. Abber des noch gesche die Klatschpappe un Euroversacher aus Mennz ist nadierlisch besonners Süß. Da kann mer dann schon mal des Spiel gesche die Radkappe mal unner de Tisch kehrn. Wie mer ja übberhaupt saache muß das mer nach 9 Spiele aach mal widder verlieren kann. Mer sinn ja net die Bauern un gönne annern aach mal was. Un die Abgasmanipulierer habbe ja genuch Kacke am Baa. Sinn mer also großzüschisch un lasse mer dene die 3 Punkte. Im Wald müsse die die dann eh widder hergebbe, im Mai.

Unser Bube habbe fer misch ja den Eidruck gemacht als wärn die doch ziemlisch Platt. Was mer aach verstehe kann, bei der Spielweise. Egal, so e Spiel muß mer aach e mal mache. Un das unsern AM14FG den Elfer in de Himmel kickt statt ins Tor war mir vorher schon klar. Ich hätt den net schieße lasse. Warum waas isch aach net, es war nur so e Gefühl un uff die hör isch im Allgemeine. Na, Hauptsach egal. Dafür habbe dann am Diensdaach die Zonenrandgewächse aus de Palz leide müsse. Ei was habbe die Doof geguggt, als mir die immer widder uf unser Tor habbe schieße lasse, nur um dene zu zeische das die am Lucas eh net vorbei komme. Un dann unsern Vadder Abraham, aan Sahneschlenzer aussem Fußgelenk übber 50 Meder und de mini Ibra braucht nur noch de Ball ins Tor schubse. So, geht Fußball heut, Ihr Fastnachtsnase!  Aja, Leut und das dann de Columbianische Kleiderschank dem Vadder aach noch uff de Haspel steischt is die Krönung der Dummheit.

Was unsern Trainerfuchs dann gemacht hat, war ja schon nah dran an de Höchstsraf. Schickt der sei Nesthäcksche uff de Platz un säschd dem er soll sei Ding grad aus mache. Also Gradlinisch wie mer so sacht. Naja war ja klar, so en Rotzlöffel läßt sisch nix saache wenn der mal von de Leine gelasse is, schläschd Hake un Öse, wie J.J. und läßt die Meenzer Hinnermannschaft dorschenanner wirbele wie Konfetti im Tornado. Un bums, Zwaa, Null. Des hat der Kovac genau gewußt das der Bub sein eischene Kopp un nix mit Gradlinisch am Hut hat. Was ja bein Drei, Null aach zu sehe war. Mei Fazit, so manschmal kann sogar aus de Nordweststadt was gescheides komme.

So, Leut 29 Punkte, Platz 4 ! Ganz ehrlisch, hätt ich net devo geträumt. So viel kann mer net Rauche um uff so e Idee zu komme.  Abber was solls, genießer mer den Aacheblick, und wenns am End vieleischd doch net fer Euroba reischd, Scheiß druff, mir habbe unsern Enkel un Urenkel widder was glorreisches von unserner Eintracht zu erzähle. Stolpern mer halt jetzt in die Winterpause un langweile mer uns am Wochenend halb tot.

De Bembelzwersch jedenfalls werd sisch mal e bissje in de Welt nebe em Fußball umgugge, un wer weiß, vielleischd gibt er ach e mal den aane odder anner Senf zu Sache ausserhalb de Adlerwelt dezu. Mer werd sehe…

 

Also bis dann,

Ihne Ihrn Bwembelzwersch

Spieldaachsbembel gesche die Hoppelheimer Pussykicker


Guude Leut,

un war des e Ding ? Also der Kick gesche dem Hopp sei Söldnertruppe.  Ma ganz ehrlisch, schee wars net unbedingt. Un bei de einer odder annere Situation is mer ja schon fast es Herzje stehe geblibbe. Abber da gleich widder e Ding drauß mache als hätte die Bube uffem Rase die Schlacht von Verdun nachgespielt is doch e bissje übertribbe.

Alle babbele vom übbeharte eisteische von de Eintracht. Debei habbe die Hopp-Bube aach net schlescht hie gelangt. Klar hätt de Vadder Abraham dem einzischartische Stürmerstar Ibra Wachner net de Elleboche in die Visage haue solle. Obwohl der des ja schon verdient hat. Sowas muß mer eleganter löse Vadder. Mer kenne ja unsern Abraham des is en Gentleman, aach uffem Platz, un wenn der so ausraste dud, hat des schon sein Grund. Dem Möschdegern Ibra sei ewisches gejammer, hiefalle,un reklamiern is halt e mal link bis zum geht net mehr. Zumal der de erste Ellebochestoß gesetzt hat, was abber mal widder kaan uffreschd weils ja de Waachner is. Ach unserner Mexikanisch Turbomaus hät mer Gelb gebbe könne, allerdings is der ja net uffe den Baumann los, der wollt ja nur den Ball habbe un kam zu spät. Abber gelb wär ok gewese.  Was misch immer nur so uffreschd is des gejammer, wie des von dem Labbeduddel Hagelsmann. Selbst Link bis in die Sackbehaarung kicke, abber übber die annern jammern. Der Lumpesäckel hat ja geflennt wie e Mädsche nachem Spiel. Unsern Fußballgott hat ja dann aach des rischdische gesacht nachem Spiel, wer selbst immer am Rand von de Legalität Spielt braucht sisch net zu wunnern wenn er mal aan abkrischt.

Erfreulisch is nadürlisch das die Pappsäck net aan Torschuß verdisch gebracht habbe. Uff de anner Seit habbe mir zwar uffs Tor geschoße, aber mal widder des Ding net unnergebracht. Irschendwie fehlt mer so e bissje de direkte Zuch uffs Tor. Nett ganz so viel im un vorm Strafraum rumfuddel Bube lieber mal direkt druff gehe. Abber isch bin mir sischer, des macht ihr es nächste mal besser. Die Radlappe habbe uns ja eh schon immer gut gelesche.

Also Leut, runner kühle, Kräfte sammeln es geht in de Endspurt. Erst die Radkappe und dann am Diensdaach die Klatschpappe aus de Palz. Dann könner mer uns entspannt zurücklehen un die Winterpause genieße. Mit hoffentlisch 32 Punkte uffem Konto.

 

Also dann Leut, gehabt Eusch wohl, de Bembelzwersch mäschd jetzt erst ma Feierabend.

Bis dann, de Bembelzwersch