Guude,
dumm gelaufe, fer die Rennbahnbefürworter. War wohl nix, mit dem Bürscherentscheid. Und des is gut so. De Bembelzwersch is ja net undbendingt en Freund vom DFB. Aus verständlische Gründe, wie mer so sacht. Trotzdem freut isch misch das des jetzt doch klappt mit der Akademie. Und des hat auch so sei Gründe. Weil zum Erste, die Akademie bindet den DFB und damit aach die annern große Sportverbände an Frankfurt. Des is wischdisch. Un unser Eintracht kann aach profitiern devo. Zum zwaade hat misch des ferterlisch uffgeresched das da Leut, die zum größte Teil in Kronbersch, Könischstein und übberhaupt im Vordertaunus in ihre Ville hocke in unser Stadt bestimme wolle. Die ganze Steuergelder die die in dene ganze Jahrn früher verbrannt habbe, sinn doch von uns Frankfortern bezahlt worn. Die ganze Jahrn übber hat der seltsame Gäulscherverein kaum sei Miet net bezahle können, und dann habbe se uff a mal die Stadt mit ihrnen Lüscheplakate zugepflaster. Ei da hinge ja mehr Plakate rum als bei de Komunalwahle von de gesamte Parteie. Des zeischd uns also, das da schon rischdisch Geld is, nur wollte die des net für ihr Hobby ausgebbe. Des wollde die sich lieber weiderhin vom Steuerzahler mit finanziern lasse. Übbers Jahr ginge bei dene 5 Renne die wos da gab, mal grad so um die 20.000 Zuschauer hie. Die meiste von dene um ihr Hüt un ihr neu Audo zu zeische, Sektscher schlürfe un azugebbe, was fer fein Gesellschaft se doch sinn. Un de Rest sinn halt Zocker, un wahrscheinlisch noch de aane odder annere Loddel aussem Bahnhofsvertel. Un darum is de Zwersch froh das des Ding jetzt weg kimmt. Des is doch aach gut fer die Niederräder, die krieje jetzt vom DFB en Bürscherpark gebaut, mit allem drum un dran.
Un von Demokratie scheine die aach net allzuviel zu halte, wenigstens net wenns net nach ihrer Nas geht. Des war e demokratische Abstimmung un die Mehrheit hat sisch gesche die Rennbahn ausgesproche. Wenn mer Demokrat is, muß mer des Akzeptiern. Abber ne, da habbe se gleisch widder agekündischt das se jetzt Juristische Schritt gehe wolle. Na Klasse, wenn die Mehrheit net mäschd was isch will, klaach isch halt vor Gerischd. Des is dann Demokratieverständniss der gehobene Art. Wer Geld hat krischd Reschd, weil er länger die Anwält bezahle kann.
Hoffe mer mal, un des ganz unabhängisch von Rennbahn odder net Rennbahn, das die damit uff die groß ‚Schnauze falle. Des wär nämlisch ganz wischdisch fer unser Demokratie. Des würd nämlisch bedeude, das die wenigstens noch e bissje funktioniert.
Mer is gespannt!
Ihne Ihrn Bembelzwersch.
Adlergebabbel 