Gott ist nicht tot, aber nicht mehr bei uns..

Guude,

de Zwersch is entäuschd. Da holt ihr de Pokal gesche die Bauern, habt die mal rischdisch in die Eier gezwickt, habt de Römerbersch zum bebe gebracht un viel Lob un Hochachtung geerntet bei Fans aller möschlische Vereine für Euer Abeid. Un was macht ihr ? Genau, was ihr mit de Händ uffgebaut habt reißt ihr grad middem Arsch widder um.  Das de Wolf fer läbbische 5 Milliönscher zu de Maja gehe kann, is ja vielleischd net euer Schuld. Mer was ja als Außestehnder net wie des bei de Vertrachsverhandlunge gelafe is. Es sollt eusch allerdings e Lehr sei, wenn schon Ausstischsklausel dann abber fer mehr Geld.

Was ihr allerdings middem Alex gemacht habt, is mehr als schofelisch. Em Mann der  Agebote aus China un sonst woher ausgeschlache hat, trotz dicker Kohle bei uns geblibbe is, aaner der nachem letzte Abstiesch gesacht hat isch bleib bei de Eintracht, isch  hab Mitschuld an dem Schlammasel un helf jetzt den Karre widder aussem Dreck zu ziehe, dem gebt ihr net noch mal en Vetrach fer e Jährsche nur weil er 35 is.  Was soll der Scheiß? Nix gesche de Hasebe, abber der is genau so alt und de Russ is aach 34. Des Argument zieht also net. Passt de Alex vieleischd net in euern Plan die Eintracht uff Stromlieneförmisch zu berschde? Odder is es eusch eifach unheimlisch das die Fans es halbe Stadion abreiße wenn de Alex uf  de Platz kimmt?  Ganz ehrlisch, isch verschtehs net. Der wollt ja net 5 Mios habbe wie de Lucas. Un fer Torn is er immer noch gut. Jedenfalls hätt de Alex net so viel Dinger versiebt wie de Jovic und de Haller. Un gefährlischer wie de Blum, de Riccotta odder wie die annern Stürmerkasper all haase.

Des is jetzt es zwaade mal das in de obbere Etage Wasser gepredischd un Wein gesoffe worn is. Mer kann net nur Vereinstreue fordern, mer muss die aach belohne. Es sollt eusch da obbe zu denke gebbe das mir Fans eusch die die Sach middem Alex ziemlisch krumm nemme. Mer schlucke zwar viel, abber wenns zuviel werd fällt des eusch ganz ferschderlisch uf die Fies. So wie mir Eintracht Fans afeuern un feiern könnne, so könne mer aach ganz ebschd wern. Un dann habt ihr kaan Spaß mer.

Euern stingische Bembelzwersch

Von Götterwetter un em Fußballgott

Guude Leut,

es gibt Dache die sinn eifach kaum zu übbertreffe. De letzte Samstag war so aaner. Mittdachs um aans mit de Leut uffem Markt getroffe, en Schobbe getrunke bei 25 Grad un dann in die S-Bahn Rischdung Stadion. De Herman verprüschele. Also des doofe Stoffmaskotsche vom HSV. Dann noch en korze Schobbe am Gleisdreieck, ab in die Korv un es werd Ernst.
Die Stimmung im Stadion eischendlisch besser als mer des hätt erwarte könne nach de letzte Spiele. Abber so sinn mer halt, mir Eintrachtfans, leidensfähisch bis zum geht nemmer. Na, jedenfalls hat des dann ja mit dem Torn schieße ganz ordentlisch geklappt un so rischdisch konnt mer die Fischköpp aach net ernst nemme. Halt en typische Absteischer der uffgegebbe hat aach wenn die immer ebbes anneres erzähle. Eischendlisch warn die 3 Punkte schon uffem Konto un so en rischdische Uffrescher net mehr zu erwarte. Bis dann so uff a mal um die 70. Minut rum noch e mal Unruh uffkam im Wohnzimmer. Da hat sisch hinne vor de Familiekorv nämlisch so en Lange Kerl mit em Zopp warm gemacht. Rischdisch, de AM14FG ! Je länger der da hinner rumgehüppt is des do unruicher words Volk in de Nordwest Korv. Die Alex Meier Gesänge wurde halt immer lauder un lauder. Klar, wenn de Alex schon mal uff de Bank sitzt, dann wolle mer ihn aach kicke sehe, un jetzt grad zum Trotz weil de Kovac uns so veräbbelt hat un der den Alex eh net ab kann. Als der dann den Alex hat eiwechsele wolle hat der erst mal so getan als werd er des net mitkrische un is weiter hie un her gehippt. So en Schluri. Als de Alex dann an de Seitelinie stand un tatsäschlisch eigewechselt wurd, gabs kaa halde mer im Stadion. Kollektive Glückselischkeit die sisch in übber Verzischtausend stimme entläd kann schon Gehörschädigend sei. Jedenfalls kann isch misch net erinnern das es im Stadion schon mal so Laut war. Un dann meschd der aach noch e Tor. Dann war es Volk dorsch mit de Welt, un des zu Reschd. Sowas gibts eischendlisch garnet. Da kann mer nur de Hut ziehe was fern abgelutschte Drecksack der Alex is. Allaa schon wie der den Gacinovic in die Mitt geschickt hat damit er Platz hat un ihm kaan Verteidische uff de Füß steht war schon abgezockt. Un wie der dann des Ding da ins Tor nei schubbst, des kann halt nur de Alex. Jeder annere von unsern Kickern hätt des Ding Rischdung Flughafen gedrosche. Dabei wolle mer net unsern Abraham vergesse. Das der in de 90. Minud noch mal als Inneverteidische so en Sprint hieleschd un dem Alex den Ball so sauber uff de Fuß zaubert is schon e Extralob wert. Der hätt ja aach hinne bleibe könne und die letzte Minude gemütlisch runnerspiele könne. Na jedenfalls hätt dann jedes Lärmmessgerät sein Geist uffgegebbe bei dem Peschel den mir da produziert habbe. Jeder da da in dem Moment net wenischdens e bissje feuschde Aache gekriet hat, der liebt de Fußball net.

So, jetzt genuch Romantisiert. Es werd Zeit das de Zwersch widder mal dem Aane odder Annere uff die Füß dabbelt. DEs Ding mit dem Kovac is ja dorsch und abgehackt, abber de Fredi un de Bruno sollde sisch gut übberlesche ob se da net en große Fehler mache wenn se de Meier eifach so abschreibe. Sportlisch sowieso, er hat ja am Samsdaach gezeischd das er es immer noch kann un er ganz schee wertvoll sei kann. Beim Hasebe hat aach kaaner rum gemacht wesche seim Alder. Zum anner, mir könne ja gut lebe mit unsrer Multikulti Trubbe, abber so ganz ohne e beständisch Gesischt un e Person mit der sisch die Fans identifiziern könne geht des uff dauaer aach net gut. Es dud bestimmt kam weh wenn mer dem Alex en Leistungsbezochene Vertrach gibt. Fer annern Pauseclowns habbe mehr schon mehr Geld em Fenster nausgeschmisse. Also rabbelt eusch uff un gebt dem Alex was er sisch redlisch verdient hat. Un kommt mer net mit de Knallharde Manager Nummer da her. Es hat noch kaam geschad wenn er uff die Fans zugegange is, un dene ihrm Fingerspitzegefühl e bissje was zugetraut hat. Was debei rauskimmt wenn mer kaan middelwesch finne will Zwische de Fans und de Wirtschaftlische Notwendischkeite kann mer ja in Hannover und Hamborsch sehe.

So, des wars fer Heut ihr Leut.

Weils so schee war hier noch emal gugge : AM14FG