Guude Leut,
ja, ja de Zwersch gibts immer noch. Aach wenn erst ma e ganz Zeit Ruh war. Es gab ja net allzuviel zu meckern. Odder doch? Hauptsach egal! Jetzt wo unser Adlerträscher so dorsch Europa maschiern kann mer ja aach e mal widder e paar warme Worte vom Bembelzwersch erwadde. Un net nur Europa steht ja bei unserne Bube uffem Programm. Aach in de Lischa läufts ganz gut.
Also net das jetzt aaner glabt das de Zwersch ins Laacher von de Eventfans gewechselt wär, nur weil isch misch jetzt zu Wort meld wos läft. Ganz im Gescheteil, de Zwersch is immer noch en Problemfan. Zumindest fer so mansche Leistungsträscher im Fußballmanagemnt. Zu meckern gibts ja genuch, also net bei unerner Diva. Da is ja im Moment Friede un Eierkuche. Abber wenn mer sich so aagugd was in Hangover, Berlin, Köln un sogar bei de Studende in Freiborsch so abgeht, kann mer ja doch nur de Kopp schüttele. Naja gut, Studende sinn ja heut aach nur noch Stromlinie geformde Zäpscher diewo nur noch schnellstmöschlich den, Karrierleiter genannte, Dickdarm von ihrene spätere Chefs enuff flutsche wolle. Die streite sisch um Klopapier un Konfetti im Stadion.
Anners siehts da ja schon in Hangover aus. Da versucht de Hörgeräte Napoleon mit alle fiese Tricks die Satzung un die Verträsch so zu verbiesche das er wie so en verkappte Fußballstalin Köpp un alles annere rolle lasse kann. Un die dummdabbisch DFL guggd nur zu un läßt Gutachte erstelle, wie so e Bundesregierung. Bei de alt Straßenutte Hertha predischd de Preetz Demokratie un Meinugsfreiheit und verbied Transparent im Stadion. Aach net schleschd. Naja un bei de Ziescheböck versuchse se die Kriddische Fans mit T-Shirts zu genehmen Abstimmungsverhalde zu bringe. Isch geb zu des is schon widder läscherlisch. De Wahnsinn hat halt bei so mansche Vereine die Herrschafd übbernome. Naja, des führt uns dann unweischerlisch zu de Bauern. Des is schon AFD like was da de Uhrnschmuggler und Knast Uli da abgezoche habbe. Odder is de mehr so Trump Style ? Jedenfalls is mir net klar ob des Alterswahnsinn odder Methode is. Mer mäschd e PK und haut de Schornaliste die Menschenrechts Charta samt Grundgesetz um die Ohrn un läßt sich hinnerum de Arsch von de Scheischs aus Katar Pudern. Des sinn so rischd uffreschde verfeschder von de Menschereschde. Un de Subbekasper Salamihalovic`sitz nebe dra un derf doof aus de Wäsch gugge. Wie so e aal Jungfer die die Bettgeräusche vom junge Ehepaar im Haus net ertrache kann drohe die mit Klaache Gerischde und ihrm ganze verlochene Anwaltsgesocks. Nur um dann e Woch später noch blöder da zu stehe weil de Spieschel ihrne schräge Superliga Pläne zum Thema gemacht hat. Da hängt des Schweinsche Schlau von de Majas.. de Watzke aach mit drin obwohl der aach nur am abstreide is. Da könnt mer glatt in die Tischkande beiße.
Ach, un dann gibts ja noch unsern allseits geliebt DFB. Un ganz vorne in de erst Reih de Grindelgrinch. Kaa Länderspiel im Waldstadion, was mer ja eh net brauche, wesche de gemeingefährlische Eintracht Fans. Sisch abber dann uffem schleschd montierte Foddo aus Nikosia vor dene Fußballchaode posiernd, im Glanz der Frankfurter Europabegeisterung zu projeziern. Danke Grinch des brauche mer mal garnet.
Da grienst der Grinch ….Quelle @DFB_Praesident
Un nadürlisch derfe mer ja unser Law un Order Minister net vergesse. Also die diewo anscheinend ihr Potzenproblme mit em öffentlische Gummiknübbel kompensiern wolle. Wobei de Beuth ja jetz es bissje Pesch gehabt hat odder sein Timing net gestimmt hat. Zum Glück hatte mer e Woch vorher übber e Verfassungsännerung abgestimmt.Sonst hätt der ja net Gefängnis sondern die Todestraf wesche Pyros im Stadion gefordert. Während der Herr Reul in NRW Bürschekriesch spielt un sei Meute von de Kett läßt un die Fanblocks stürme läßt. Die sisch dann heulend in die Eck setze un rumflenne weil se aan mit em hohle zwaa zendiemeder dicke Plastikröhrsche uff de Helm gekrischd habbe. Während die Kollesche in de Stadt diewo es ja garnet gibt, in em Zuch Kind un Keschel mit Pefferspray einebbele. Zuständ sinn des da könnste grad aach ohne Pfefferspray kotze. Net das da wenischsdens aan Schornalist ma bemühe würd objektiv zu berischde, dene gehts halt aach nur um die Story.
Also sieht des so aus als würde mir Adler grad uff so ner Insel der Glückseeligen lebe. Stimmt schon es läuft in de Lischa un in Europa sowieso, mer habbe kann Streß mit Verein und AG, un en Vorstand der noch Wert uff de Fans leschd. Un vor allem en Präsident der aaner von uns is un net so en abgehobene pseudo Fußballfan der sisch wesche seim Amt ständisch die Eier schauckelt.
Sorsche mer defür das des so bleibt.
Ihne Ihrn Bembelzwersch
Adlergebabbel 