Bäng !!


Erstes Pflichtspiel un schon is widder die Kacke am Dampfe. Nett das de Bembelzwersch en Warmduscher is, im Stadion kanns ja schon mal ruppisch zu gehe. Es is halt kaa Ponyranch so e Stadion. Abber Leuchtkuchele in e Menge schieße, des get e mal garnet. Dene Kerle gehört e mal rischdisch uff die Ampel gekloppt, ohne Frach. Aber wie des so is, gibts widder e Straf vom göttlische DFB fer die, diewo nix agestellt habbe. Clever wie die Herrn des Fußballs e mal sinn, gibts widder Teil- oder Totalausschluß von de Unbeteilischde odder was mer sisch aach sosnt noch so an unsinnische „Strafe“ ausdenke kann. Un die vereinischte Presshorde berischde widder im schönste Skandaljournaliste Stil übber die böse Frankfurter Ultras ohne aach nur zu wisse ob die Dummbatze dezu gehörn odder afach nur möschtegern Ultras sinn. Bevor die Herrschafte ihrne Artikel verzappe, sollte die sisch mal in de Block getraue un nachfrache was da eischendlisch abging. Zum Beispiel, das da im Familieblock nebe dran Nazipack gestanne hat, die mit Hitlergruß un Frankfurter Juden Rufe den ganze Schlammesel erst provoziert habbe. Un uff de annern Seit die Sicherheitsbarriere, die angeblich von dene Magdeburger niedergerisse worn sinn, die abber garnet da warn.

Komme mer mal zu eischendlich Hauptsäschlische, dem Fußballspiel.

E Offenbarung war des ja net grad von unsrem Team. Eher en Offenbarungseid. So rischdisch zusammegepasst hat des noch net mit de United Nations of Bembeltown. Es hat noch mäschdisch geknirscht im Gebälk. Die Abwehr kann noch net so rischdisch zusamme gewachse sei, des is mir schon klar. Da brauche die Jungs noch e paar Spiele bis did sisch gefunne habbe. Allerdings muß  mer sisch ja fraache was dann der Ozzy de ganze Sommer übber getribbe hat. Der hat genau da widder agefange wo er letzt Saison uffgehört hat. Zu eit weg vom Mann kaan rischdische Zuch nach vorne, kaan gescheide Pass übber 5 Meter und schon mal übberhaupt kaa Flanke die mal agekomme wär. Isch saach nur fort mit dem Kerl so lang es noch e paar Euro fer den gibt. Im Grund genomme war des eischendlisch nur en wirre Haufe von Kicker die da im Eintrachttrikot uffem Platz planlos dorschenanner gerannt sinn. Hoffe mer ma das sisch des bis Samsdaach noch e bessern wird. Sonst geht de ganze Schlammasel widder von vorne los, un das wolle mer ja all net mer erlebe.

Es bissje Hoffnung mäschd mer allerdings, das sisch die meiste annere Kollesche aus de erste Liga aach net viel besser agestellt habbe. Beonners die Wiesenhofgiggel habe sisch ja mit Ruhm bekleckert.

Also gugge mer mal wie des dann da am Samsdaach gesche die Schlüpf aussehe dud. Ich denk dann kann mer mehr saache als Heut.

Bis dann also Ihr Leut…

Euern Bembelzwersch