Da hätte mer des mit dem erste Pflichtspiel in de Saison. So werklisch uffreschend un spannend war des ja net. War aach net zu erwadde. Unser Bube habb so vor sisch hiegekickt, die Fischköpp sinn gerannt wie die Hase un am Schluß sinn mer weider gekomme. Viel mehr gibts halt dazu net zu saache. So rischdisch Lust hat dem Anschein nach kaaner von unser Bube gehabt,sisch da uff dem Gänseblümschefeld de Haspel zu verbiesche un dann am Sonndaach bei de Radkappe zu fehle. Fer misch war die Szene, wo der Luca dem Sefe de Ball net läßt un selbst es Tor macht, noch so ziemlisch es uffreschendse vom Spiel. Der klaane werd sisch aach in de Bundeslischa dorschsetze, da bin isch sischer. Ansonste kann mer ja net viel Rückschlüß ziehe uff die Form vom Team, dazu war des halt sowas wie die Testkicks gesche die annern Mannschafde da in Ösiland. Unser Fraache wern also erst am Sonndach in de Weltstadt die kaaner kennt geklärt.
So rischdisch uffgereschd hab isch misch heut Moin, als isch so im Internet rum geguggt hab. Da gibts en Artikel, da is dem Zwersch die Zibbelmütz hoch gegange. Hier de Artikel von der Flachpfeiff. Da habbe e paar Frankforter am Zaun gerüddelt, während dem Spiel. Also net das die Randalieren wollde odder übber de Zaun klettern wollde. Die habbe halt e bissje Gymnastik gemacht. Un weil die dabbische Fischköppe da so e labberisches Ding als Zaun hiegestellt habbe, hat halt de Gänseblümscherwiesesprecher dorschgesacht das die Bube und Mädscher des doch sei lasse solle, mit dem Rüddele. Un da kimmt der Schmierfink daher un mäschd aan uff dicke Hose und schreibt das unser Fans widder e mal fast fern Spielabbruch gesorscht habbe. Un des ,obwohl die Bolizei gesacht hat das die Adlerfans rischdisch friedlisch warn. Bei sowas rolle sisch dem Bembelzwersch die Fußnäschel hoch. Was will der Dummdabbes damit bezwecke? Odder werd der von unsren Innepolitische Pauseclowns bezahlt? Das mer nur allaa mit so ner dreiste Übberschrift mehr Schade arischde dud als wenn 200 Holligans en Bahnhof verwüsde, sollt eischendlisch em Zeidungsschmierfink klar sei. Abber na, da kimmt widder so e geldungssüschdische Schreiberlingscher daher un mäschd Verbalrandale! Sowas sollt mer wesche Landfriedensbruch verknacke, un net die paar hergelaafene IQ Clowns die sisch halt immer noch gescheseidisch uff die Glatz klobbe wolle. Der Schade den der dorsch sein verandwordungslose Schlachzeileorgasmus agerischdet hat, is schlimmer als was die Hernschläschde sonst so arischde.
So genuch geschend! Am Sonndach geht die Lischa los. Hoffe mer das mer sisch net widder übber so en Schlachzeilekasper uffresche muß!
Bis dahie, Ihne Ihrn Bembelzwersch
Adlergebabbel 