Da hadde mer de Lischaufftakt!
Vorneweg, es war net schlecht gespielt von unserne Adler. Vieleischd sogar besser als so manscher gedacht hätt. Das unser Adler dann die Wölf net gerupft habbe, hatt verschiedene Günd. Zum aane, unser Chancenverwerdung. In de erste Minude hätte mer dene Radkappe ja zwaa Stück eischenge müsse. Aber unser Käse-Sturmduo, also die Holländisch-Schweizer Aktionsgemeinschaft, hat erschendwie des Tor net getroffe. Kann passieren, is ja es erste Spiel gewese. Zum annern, unseren Ozzy! Zu mindest beim aans-null hat der widder sowas von gepennt un stand gefühlde zwanzisch Meder vom Pfersisch, odder so, weg. Des hat der ja letzt Jahr schon e paar mal gemacht. Mer könnt maane der lernt nur schwer dezu. Naja, de Hase B hat werklisch en guude Ausseverteidischer gespielt, besser als des de Schändler jemals hiekrieje werd. Abber beim zwaa-null muß er den Ball abber aach anners aus de Eck haue. Gesche Tokyo hat er ja aach so e Ding gemacht. Ansosnte hat ja die Abwehr ordentlisch gestanne. De Vadder Abraham scheint doch en gude Eifluß uff sei Nebeleut zu habbe. Is ja aach schon en ruhische gesetzte Dreißischjährische Herr, mit agegraude Schläfe.Des bringt uns jetzt zu unserm Spaßfaktor, zum Carlito Infernale! Der hat sisch ja ganz aaständisch benomme gestern. Und das der Hohlköppische Sky-Schläschdbabbler bei der aane Grätsch im Strafraum, wo de Carlito die Radkapp garnet getroffe hat, en Elfer gesehe habbe will, is doch widder typisch fer die Dummköpp von dem Krakesender, der sisch alles unner die Näschel reiße will. Immer schee de Große nachem Maul babbele. Das der Carlito dann später des Pommfritsche ausgebremst hat, war net schee, des hätt abber jeder annere an seiner Stell aach geamcht. Nur der komische Motherf…., odder wie dem sein Vorname is will nadürlisch e Schulhofsschläscherei aafange. Dummkopp. Un dann beschwert er sisch noch das er Zwanzischdausend Euro fer sein Motherfucker bezahle mußt, un die Eintracht Fans ungestraft böse Sache übber ihn singe derfe. Er is halt doch nur e Mädsche, der Bub. Zu de Japanisch Kampffeder saacht de Zwersch jetzt abber mal gar nix mehr. Da is jeder Druck uff die Taste zuviel.
Is eusch eischendlisch uffgefalle das mer dann in de zwaat Halbzeit mit ner rischdisch musikalisch Ausseverteidischung gespielt habbe. Links de Ozzy, rechts de Iggy, des Rockt !! Aja un de Vadder Abraham in de Mitt. Fer alle die des nett wisse weil se zu jung sinn, de Vadder Abraham hat des Lied von de Schlümpfe gesunge.
Gud gefalle habbe mer aach die Bube, de Gerez un de Waldschmidt. Frech habbe se Dampf gemacht so weit des mit dene relativ späde Eiwechselunge noch möglisch war. Wobei isch dem Armin da Reschd geb, die Bube net zu früh zu bringe. Lass die mal in ruh neiwachse, in die Bundeslischa.
Alles in allem habbe unser Adler abber e gud Spiel hiegeleschd. Nur schad das mer kaan Punkt mitgenomme habbe. Was des Team da gezeischd hat, sah schon mer nach gepfleschdem Fußball aus, als des was mer letzt Saison ertrache habbe. Also weider so Bube, dann werds aach was mit de Punkte, un am End vieleischd aach mit Euroba.
Bis dann also,
Euer Bembelzwersch
Adlergebabbel 