Osram 2.0 un die Sparkass Harsewinkel

Und dann ist Sebi bei uns nämlich auch sehr gut aufgehoben.“ wird der Trainer der Wolfsburger, Dieter Hecking, von waz-online zitiert.

Morsche,

was fern Spruch. Ausgereschend de Hecking die Sackpfeiff. Der Herr Osram 2.0 is sowas von en Unsympaht. Un dann kommt so en Spruch. Da lässt der de Jung uff de Bank odde de Tribün schmorn, un wenn mir ihn zurück habbe wolle komme dann so Sprüch. Abber so sinn se halt die Geldsäck, dene alles in de Bobbes geschobe werd von VW. Annerseits zeischd des abber aach das die Angst vor uns habbe. Die Hoppelheimer Häsjer verdoppeln die Preise wenn de Bruno arufe dud wesche em Spieler und de Allofs dud so als hätt der kaa Aldernative zum Jung. Geld schützt halt vor Feischheit net.

Uf de annern Seit heult unser Sparkass widder rum das die Presse un des allgeschewärdische, unersättlische Umfeld so der art Gerüschde in die Welt setzt, das der arme Kerl gar net mehr waas wie er sich wehrn soll. Ei dem schenk ich vor seim Abgang noch e Träneväsje. Ach was, en Tränebembel, so wie der heult. Hat der dann kaa Verständniss defür das die ganz Eintracht Gemeinde ganz fickerisch werd wenn die Franzose mit de Millione winke? Des sinn mir doch gar net gewöhnt sowas. Des is doch fer uns Eintracht Fans wie Weihnachte.

Also alles beim Alde ! Warte mer allso was uns die Woch jetzt bringt. Uns kann ja nix passieren, mir habbe ja jetzt es Heinzi.

Also dann Leut, halt die Fies still un lasst de Heribert ma mache.

Euer Bembelzwersch

Armin is back in Town !

Morsche Leut,

jetzt is es passiert. De Armin hat unnerschribbe un is jetzt widder MT bei unserner Eintracht. Galaktisch odder ? Un wie sisch de Heribert freut ! Odder täuscht des. Glücklisch sieht der ja uff de Bilder net aus. Weil so e rischdisch Männerfreundschaft scheint des zwische dem Armin un de Sparkass Harsewinkel net mer zu sei.  Kann sei das der Erbsezähler noch eigeschnappt is weil de Armin damals fort gegeange is, wesche dene Perspektive die ihm des Sparbrötsche net gebbe wollt. Abber mal ehrlisch, was de Heribert denkt odder net, is doch gehibbt wie gehickelt. In em Jährsche is der weg, des waas doch jeder. Also dud sisch doch kaaner mer dra stöhrn was der will. Un sei Hausmacht, also die, diewo dem immer de Kopp gestreichelt habbe, die hat er ja aach verloren. Das der Armin jetzt fer 2 Jahr Trainer bleibe soll, is dann abber doch e bissje übberaschend, weil den ja jeder als Nachfolscher vom Heribert gesehe hat. Da scheint sich dann doch wohl die graue Emminenz, also de Hellmann als Vorstandsvorsitzende rauszuschäle. Schlescht wär des ja net. Da könne dann die Ahnunglose die rumgeheult habbe als des Schaaf Fersegeld gegebbe hat un den Hellman als Könischmörder gesehe habbe widder rumheule. Übberhaupt, wo mer grad bei dene Labbeduddel sinn! Also bei dene dene mal garnix reschd is. Die spiele ja immer noch die beleidischd Lebberworscht weil ja de Veh angeblisch hiegeschmisse hat, damals vor em Jahr. Dene geht des net in die Bern das des en ganz normale Vorgang war. De  Armin hat net hiegeschmisse wie des Fischköppische Mimösje, der hat nur sein ausgelaufene Vertrach net verlängert, un des is en riesen Unnerschied, ihr Babbsäck! Das de Armin da widder ein rausgehaue hat, OK! Hät der aach anners saache könne. Abber des is halt aach Showbusiness. Das gejammer, das de neue Trainer kaa Uffbruchstimmng verbreide dät, is ja aach so en Quatsch.Jubelnd uffspringe, un gesche die Wand klatsche bringt ja net werklisch was. Uffbruch habbe mer genuch dorsch de neue Uffsichtsrat und dorsch die, bald neue, Zusammesetzung vom Vorstand. Da werd die Musik gemacht un net in erschendwelsche Köpp die mahne en Breitenreiter hätt die Eintracht mit flieschende Fahne Euroba erobern lasse wie damals de Napoleon.

Jetzt gugge mer ma was de Armin zu erzähle hat bei de Pressekonferenz heut . Un dann sehe mer ma weider. Aans is abber sischer, de Bembelzwersch werd net mer vorm Computer eischlafe bei de Pressekonferenz, wie des beim Schaaf öfter passiert is. De bessere Entertainer is de Armin alle mal.

Bis dann,

Euern Bembelzwersch

En Gang runner geschaltet !

Guude,

ma umgugge. Hat sisch de Rauch verzoche? So wie da letzt Woch um sisch geschosse worn is, hätt mer ja denke könne de dritte Weltkrisch is am Riederwald ausgebroche. Ma ehrlisch Leut, jetzt halde ma de Ball flach un holt e mal dief Luft…… So, schon besser !

Des muß ja e haue un steche gewese sei, wenn mer de Medie folschd, da derft ja kaaner lebend rausgekomme sei. Man habe die sisch uffgeblase, Machtkampf am Riederwald ! Trainer Bashing, Schaaf rausgemopt, Heribert werd enteiert, lauder so e Zeusch habbe die geschribbe. Un wenn aaner was gesacht hat, also sowas von übbertreibt net so Medie, dann habbe se sisch ins Ecksche gehockt un habbe geheult das mer nur noch Medienschelte mache det. Ei, sach ma habt ihr dann ma übberhaupt kaa bissje Selbstkritik mehr für eusch übrisch? Da macht ihr en Qualitätsschornalismus wie die Kollesche von RTL2, und wunnert eusch dann das mer ma sacht das ihr mal halblang ,mache sollt. Abber gut mer muß sisch wohl dra gewöhne das die Ufflach wischdischer is als de Inhalt. Des soll ja hier jetzt aach ka Medienschelte wern, da hat de Bembelzwersch aach ka Lust dezu un des wär ja aach vollkomme Zwecklos wie isch heut so in der Rundschau widder gelese hab. Die halde ja immer noch dra fest das die Mannschaft, heut übrischens übber die Hälft, sisch übber de Schaaf beschwert habbe.  Egal!

Das de HR die Story vom Machtkampf gebracht hat is ja in Ordnung, wenns dann halt ordentlisch rescherschierd is. Des hat ja dann in de Soziale Netzwerke sämtlische Trolle, Dummschwätzer un Schlechtbabbler uff den Plan gerufe. Was da alles so zusamme geschribbe worn is…… ! Des scheint fer so manschen de anzische Wesch zu sei wenischstens noch e bissje befriedischung zu habbe, wenn mer uff annern rumhackt.

So egal, gugge mer ma in die Zukunft, Kaffesatz geht net, weil der Zwersch e Padmaschin hat. Was mache mer dann jetzt mit unserm neue Trainer. Spekuliert werd ja ohne Ende. Name wern ruf un runner gestuft, de aane werd bei A. als verbrannt genannt, bei B. is er noch Favorit. Mit annern Worte, diejenische diewo alles zu wisse vorgebe wisse garnix. Gut so. Last den Bruno in Ruh sei Abbeid mache. Isch hab da vollstes Vertraue in de Bruno un unsern Vorstand. Aach wenn mer de Heribert als lahme Ente bezeichne dud. Des is der net. Un unsern zwaade Vorstand hat ja aach noch mit zuredde. Des aanzisch blöde is halt das mer ohne neue Trainer aach kaa neue Spieler an Land ziehe können. Geduld is jetzt angesacht. Da sin mir Zwersche ganz klar im Vorteil. Geduld habbe mir allemal, des sieht mer ja an unsernen Weiße Bärt.

Also dann ihr Leut Tschau bis dem Nächst,

Euern Bembelzwersch

Ei gugg doch mal uff de Boden vom Dibbe

Gude Leut !

De Bembelzwersch, als Online un Blätterwald Rescherschör hat des ja komme sehe. Die „Rote Bild“ mäschd des ja schon monade lang, schee subtil un unnerschwellisch, un jetzt hat des Zentralorgan für Volksverdummung nachgezoche! „Schaaf-Bashing!“ Das mer des net ernst nemme kann sollt ja dem uffgeklärte Eintrachtfan klar sei. Un trotzdem verbreided des e mies Stimmung. Was neues habbe die Schmierfinke von de „Blöd“ ja net werklisch geschribbe. Ausser vielleischd das die Bube kaa Lust hatte Achterbahn zu fahrn. Hätt isch ja aach net gehabt, schon weil die Sischerheitsbüschel net Zwerschegereschd sinn. Also alles heiß Luft ? Net so ganz find isch.

En Freund vom Schaaf als Trainer war de Bembelzwersch ja von Afang a net. Des wisse all. Des hat sisch aach net geännert. Da gehts mir wie dem Bruno, der hätt aach gern en Annern gehabt, aber de Dagobert-Heri wollt halt unbedingt den Fischkopp. Trotzdem sollt mer jetzt net alles am Trainer festmache, wenns ma net läuft. Viele habbe ja, als die Katz nach Prag zurück geschickt worn is,gesacht das es ziemlisch gefährlisch is. Wenn ma dem Meier odder de Ilse was bassiert, habbe mer kaan gescheide Störmer mehr. Un ? So isses gekomme. Des is abber net dem Schaaf sei schuld. Da habbe annern aach ihr Finger drin gehabt. Das der nadierlisch aach sei Fehler gemacht hat is ja kaa Frach. Des rumgezabbel von de Pia uffem Platz un des Blutleere Sushi gekick von de Kampffeder hät der sisch nie so lang mit agugge derfe. Un das der den Flummi so links lieje lässt is aach net rischdisch. En sture, wortkarge Fischkopp is er ja aach. Un so rischdisch passt der ja von seiner Mendalität her net nach Frankfort. Is er desswesche en schlechte Trainer? Na !

Was bei de Schreiberlinge un aach bei uns Fans immer vergesse werd, die Fäde wern doch im Hinnergrund gezoche. Guggt eusch doch des Jahr, odder besser die Saison mal a. De Bruno hat am Afang eschde Probleme gehabt Spieler zu krieje weil mer kaan Trainer hatte. Dann kame de Schmitt un de Matejo uffen Disch.De Schmitt hat dem Bruno e lang Nas gedreht, un den Matejo wollt de Heribert net. Den hätt isch allerdings mit Kusshand genomme. Erstens weil mer jetzt nämlisch e stabil Abwehr hädde, un zwadens, weil der zu Frankfort un zur Eintracht basst. E bissje weltmännischer is der ja als de Schaaf.Un so e bissje Klämmerfaktor kimmt ja aach bei de Sponsorn besser a, als nordischer Heringsgeruch. Dann hängt sisch de Bender e nei un erzählt de Bruno det scheiß Abbeid mache, weil er kaa Spieler beikried. Aach net, wie säschd mer des heut ? Zielführend ! Dann kimmt die Präsidendewahl im Verein. Da gabs ja aach einische Tiefschläsch und Reibereie, net das es da werklisch um de Verein ging. Da habbe sisch die Leut fer de Uffsischtsrat ihre Truppe in Stellung gebracht. Mit de Widderwahl vom Fischer war klar da de Bender sein Hut nemme muß, weil er kaan Rückhalt mehr hat. Des haast dann aach fer de Heribet, machs guud un Tschö. Jetzt guggt nadierlisch alles was da beim Uffsischtsrat raus kimmt, un des is aach klar, de Heribert will halt aach sei Denkmal habbe, wann er geht. Also ehrlisch, wenn mer des so betracht, hat doch die Mannschaft un de Schaaf ma garnet so schlecht geabbeid, die Saison, odder ? Jetzt waaß abber kaaner was kimmt, kimmt de Steubing als Uffsischtsrat Boss ? Wahrscheinlisch ! Wer kimmt fer de Heribert ? Was is dann mit dem Bruno, derf der bleibe ? Wenn de Veh kimmt klar, dann derf der, abber derf dann de Schaaf bleibe? Eher net, weil de Veh sei Finger net von de Mannschaft lasse werd un de Schaaf sisch net neibabbele läßt.  Un so weider, un so Weider.

Wenn mer also genau hieguggt sieht mer das da übberall Unsischerheit is. Un jeder der in de Startlöscher sitzt fer erschend en Posde, mäscht nadierlisch sei eischen Politik. Des is zwar normal abber net grad de Leistung von de Mannschaft zuträschlisch. Die wisse ja aach net ob se net abgeschoße wern.

Ganz ehrlisch, isch bin kaan Schaafsfreund, abber gebt dem Mann noch e Chance. Un eusch, liebe Tastequäler von de Presse, isch waaß ihr müßt euern Kinner was zu esse gebbe un die neuste Nike-Tornschuh fer zwaahunnerd Euro brauche die aach. Abber versucht doch ma Hinnergründe zu beleuschde un zu erklärn. Mit Dreck werfe kann jeder. Nur bringe dud des nix!

So, un moije gehts ins Waldstadion zur Eintracht. Dann werd de Bembelzwersch widder bei dene stehe un die Mannschaft afeuern, singe un sisch die Stimm aussem Halskreische, die von annern als Dummbeudel, und Hernlose bezeischned worn sinn.

Ihne Ihrn Bembelzwersch

Es rausche die Blädder tief im Wald………

Gude ihr unerschrockene Zwersch Leser.

Es rauscht ja mäschdisch im Blädderwald. Das unsern Eintracht eischene Snodwden, also de Bender, derwo des mit dem Weiße Ridder in die Presse gebracht hat, net mer als Uffsichtsratschef atritt war ja eischendlisch klar. Hat wohl nix genutzt des Interview in de Blöd-Zeidung. Egal, weg middem, jetzt derf wahrscheinlisch de Börseguru ran. Dem Fischer sein Freund de Steubing. Is ja vieleischt aach besser so, immerhie gehörn dem ja 3,6% von de Eintracht Aktie. Un der werd ja net sei eischen Kapital verzocke wolle. So Leut mache des ja nur mit dem Geld von annern. Un da ja unser eiserne Sparbix, de Dagobert Bruchhagen demnächst aach in Rende geht, schieße die Spekulatione mäschdisch ins Kraut. Selbst des Seriöse Zentralorgen von de gehobene Genussgesellschaft,die FAZ spekuiert mit. Da werd am Freidach de Duffner von de langweilische aus Hangover in de Ring geschubbst und am Sonndach is es schon widder de schöne Armin aus Augsborsch. Genau! Der, derwo sisch so e hoch Mauer um sei Häusje gebaut hat, und bei dene die ihrn Bahnhof vergrabe, nach e paar Woche es Handuch geschmisse hat weil ihm die Perspektive übber de Kopp gewachse sinn. Ma ehrlisch Leut, so aaner der so schnell de Schwanz eizieht is doch net de Rischdische fer unser schee Eintracht. So denkt jedenfalls de Bembelzwersch. Un ma klar gesacht, isch kann mer net denke das der ehemalische Meistertrainer des Zeusch zu em guude Manager hat. Vielleischt teusch isch misch aach. Mer werde es sehe.

Jedenfalls fängt bei uns diese Jahr des gerausche im Blädderwald schon ziemlisch früh a. Jedenfalls hat unsern Bruno im Gespräsch bei de FAZ e paar lustische Sache gesacht. Irschedwie is der ja rischdisch diplomadisch, odder er hat en Schlach mit de Wixberscht. „Mer gugge nach em Back up fer de Schändler!“ Wenn der des mit dem Back up ernst mahnt, hat er aan mit de Wixberscht, wenn net, is er rischdisch diplomadisch weil er dem Bub, also dem Schändler net uff die Fies tritt. Wie er des allerdings mit dem Schaaf hie krieje will, von wesche mir sinn sehr offensiv ausgerischtet und gleichzeidisch will er Leut kaafe die mehr nach hinne abbeide, is mir e Rätsel. Abber gut de Bruno is ja manschma en Fuchs, lasse mer den mal mache. Das mer die Pia widder nach Chelsea zurück schicke geht ja voll in Ordnung. Er is ja en liebe Bub abber fer unser Bundeslischa reischds halt net. Also sucht jetzt de Bruno noch aan fer die link Agriffsseit. Seit Samsdach frach isch misch abber ob mer net noch e bissje mehr brauche als nur fer die link Seit. De Zambrano will er halde, was isch ja gud find, ob des halt klappt? Mer waas es net. Da habbe ja die Steuerhinnerzieherunnerstützer aus de Albe noch die Finger mit drin. Umschaltspieler mit Charakter, die die Ärmel hochkrembele sucht der aach der Bruno. Da hat der sisch was vorgenomme! Isch mahn, reschd hat er ja, abber isch beferscht das er sich den selber backe muss, bei unser klamm Finanzlach.  Mer kann ja net alles verlange fer des bissje was mer ausgebbe könne. Is ja aach soweit in Ordnung. Also freue mer uns jetzt uff die zukünfdische Spekulatione un Gerüschde die dorsch die Medie geistern wern und hoffe uff des nächste Überraschungs Ei, die Saison 2015/16. Wie immer drei Sache uff a mal. Freude, Spannung, Enttäuschung, ebe die Diva!

Nur dud mer ein Gefalle Leut in de Führungsetasch, babbelt mer nächst Jahr net mer vom Umbruch un so e Zeusch. Seid ehrlisch zu uns und zu Eusch selbst. Wenn scheiß gespielt werd nennt des aach beim Name, des hilft aach de Spieler ma ihr eischen Leistung zu übberdenge. Schade kann des net.

Hier gehts zum Interview von Bruno in der FAZ 

Also dann Leut, machts ma gud bis zum nächste mal!

Euern Bembelzwersch