Ei gugg doch mal uff de Boden vom Dibbe


Gude Leut !

De Bembelzwersch, als Online un Blätterwald Rescherschör hat des ja komme sehe. Die „Rote Bild“ mäschd des ja schon monade lang, schee subtil un unnerschwellisch, un jetzt hat des Zentralorgan für Volksverdummung nachgezoche! „Schaaf-Bashing!“ Das mer des net ernst nemme kann sollt ja dem uffgeklärte Eintrachtfan klar sei. Un trotzdem verbreided des e mies Stimmung. Was neues habbe die Schmierfinke von de „Blöd“ ja net werklisch geschribbe. Ausser vielleischd das die Bube kaa Lust hatte Achterbahn zu fahrn. Hätt isch ja aach net gehabt, schon weil die Sischerheitsbüschel net Zwerschegereschd sinn. Also alles heiß Luft ? Net so ganz find isch.

En Freund vom Schaaf als Trainer war de Bembelzwersch ja von Afang a net. Des wisse all. Des hat sisch aach net geännert. Da gehts mir wie dem Bruno, der hätt aach gern en Annern gehabt, aber de Dagobert-Heri wollt halt unbedingt den Fischkopp. Trotzdem sollt mer jetzt net alles am Trainer festmache, wenns ma net läuft. Viele habbe ja, als die Katz nach Prag zurück geschickt worn is,gesacht das es ziemlisch gefährlisch is. Wenn ma dem Meier odder de Ilse was bassiert, habbe mer kaan gescheide Störmer mehr. Un ? So isses gekomme. Des is abber net dem Schaaf sei schuld. Da habbe annern aach ihr Finger drin gehabt. Das der nadierlisch aach sei Fehler gemacht hat is ja kaa Frach. Des rumgezabbel von de Pia uffem Platz un des Blutleere Sushi gekick von de Kampffeder hät der sisch nie so lang mit agugge derfe. Un das der den Flummi so links lieje lässt is aach net rischdisch. En sture, wortkarge Fischkopp is er ja aach. Un so rischdisch passt der ja von seiner Mendalität her net nach Frankfort. Is er desswesche en schlechte Trainer? Na !

Was bei de Schreiberlinge un aach bei uns Fans immer vergesse werd, die Fäde wern doch im Hinnergrund gezoche. Guggt eusch doch des Jahr, odder besser die Saison mal a. De Bruno hat am Afang eschde Probleme gehabt Spieler zu krieje weil mer kaan Trainer hatte. Dann kame de Schmitt un de Matejo uffen Disch.De Schmitt hat dem Bruno e lang Nas gedreht, un den Matejo wollt de Heribert net. Den hätt isch allerdings mit Kusshand genomme. Erstens weil mer jetzt nämlisch e stabil Abwehr hädde, un zwadens, weil der zu Frankfort un zur Eintracht basst. E bissje weltmännischer is der ja als de Schaaf.Un so e bissje Klämmerfaktor kimmt ja aach bei de Sponsorn besser a, als nordischer Heringsgeruch. Dann hängt sisch de Bender e nei un erzählt de Bruno det scheiß Abbeid mache, weil er kaa Spieler beikried. Aach net, wie säschd mer des heut ? Zielführend ! Dann kimmt die Präsidendewahl im Verein. Da gabs ja aach einische Tiefschläsch und Reibereie, net das es da werklisch um de Verein ging. Da habbe sisch die Leut fer de Uffsischtsrat ihre Truppe in Stellung gebracht. Mit de Widderwahl vom Fischer war klar da de Bender sein Hut nemme muß, weil er kaan Rückhalt mehr hat. Des haast dann aach fer de Heribet, machs guud un Tschö. Jetzt guggt nadierlisch alles was da beim Uffsischtsrat raus kimmt, un des is aach klar, de Heribert will halt aach sei Denkmal habbe, wann er geht. Also ehrlisch, wenn mer des so betracht, hat doch die Mannschaft un de Schaaf ma garnet so schlecht geabbeid, die Saison, odder ? Jetzt waaß abber kaaner was kimmt, kimmt de Steubing als Uffsischtsrat Boss ? Wahrscheinlisch ! Wer kimmt fer de Heribert ? Was is dann mit dem Bruno, derf der bleibe ? Wenn de Veh kimmt klar, dann derf der, abber derf dann de Schaaf bleibe? Eher net, weil de Veh sei Finger net von de Mannschaft lasse werd un de Schaaf sisch net neibabbele läßt.  Un so weider, un so Weider.

Wenn mer also genau hieguggt sieht mer das da übberall Unsischerheit is. Un jeder der in de Startlöscher sitzt fer erschend en Posde, mäscht nadierlisch sei eischen Politik. Des is zwar normal abber net grad de Leistung von de Mannschaft zuträschlisch. Die wisse ja aach net ob se net abgeschoße wern.

Ganz ehrlisch, isch bin kaan Schaafsfreund, abber gebt dem Mann noch e Chance. Un eusch, liebe Tastequäler von de Presse, isch waaß ihr müßt euern Kinner was zu esse gebbe un die neuste Nike-Tornschuh fer zwaahunnerd Euro brauche die aach. Abber versucht doch ma Hinnergründe zu beleuschde un zu erklärn. Mit Dreck werfe kann jeder. Nur bringe dud des nix!

So, un moije gehts ins Waldstadion zur Eintracht. Dann werd de Bembelzwersch widder bei dene stehe un die Mannschaft afeuern, singe un sisch die Stimm aussem Halskreische, die von annern als Dummbeudel, und Hernlose bezeischned worn sinn.

Ihne Ihrn Bembelzwersch

Advertisements

6 Kommentare zu „Ei gugg doch mal uff de Boden vom Dibbe

  1. Schee geschribbe, so mit Herz. Ganz ehrlisch, endlich ma aaner der die Schraub net weider anzieht, denn wie jeder weiss-nach ganz fest kommt ab. Des mit de Nike Turnschuh hat mer aach gut gefalle.. aber im Ernst, e schee Fazit in meine Aache. Scheins gibts sowas nemmer, im eschte Lebe (also des wo von ‚wirtschaftliche Notwendischkeite geprägt is‘).

    Ma korz anhalde und sich umgugge, was mer da als so mescht, däht viele Leute net schlecht un vor allem, wie secht mer so schee, ‚der Gesamtsituation‘.

    Und aach isch meschs so wie Du mein Lieber Bembel, isch geh aach hie un feuer die Jungs weider an.

    So siehts aus. Freu misch un mer sieht sisch, im HQ. Aach wenn isch noch net weiss wie isch hie komm..

    Gefällt 1 Person

    1. Ach Infernal, dede die Leut ma e bissje nachdenke bevor se in die Taste haue wär nur halb so e Uffreschung. Damit maan isch net die Schornaliste, die lebe ja vom Wirbel mache. Abber so mancher Blogger un Forumstippsler sollt halt erst ma es Hern eischalte.
      Jedenfalls is de Kopp digger als de Hals, un wenn de de Adler im Herz hast läßde disch von dene aach net devo abhalte weiter de Eintracht uff gedeih un verderb zu folsche.

      Gefällt mir

  2. Bin da ganz bei Dir. Is nämlich net hernlos un gar net einfach sich immer widder druff einzulasse-anstell von druff einzuschlaache wie die Horde der Tastequäler. De ganze Herdentrieb, den merkt scheins kaaner mehr. Genau dann muss mer normalerweis en Gang raus nemme, sich umgugge und ruhisch bleibe. Aber isses gut wenn mer dem Mann sei Zeit gibt? Wobei mer sich frage muss, is da was dran an dem ganze Gebabbel der würd hier net herbasse und wenn ja würd er sich noch ännern? Alles so e Sach und ich kanns net einschätze. Grummel.

    Alles net so einfach, manchmal.

    Gefällt 1 Person

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s