Hie- un hergerisse isser de Bembelzwersch. Was soll mer jetzt zu dem Kick gestern saache. Das de Zwersch skeptisch is wesche der Trainer Wahl is ja bekannt. Trotzdem unk isch jetzt net rum un schieb des de Kroateseilschaft in die Schuh. Abber das die Mannschaft auchescheinlisch immer noch net kapiert hat, um was es geht, des reeschd misch ja schon ziemlisch uff.
So e bissje hat isch ja gehofft das en Ruck dorsch den Traurische Haufe Kicker geht, die sisch grad die Eintracht nenne. Abber erschendwie scheine die immer noch net kapiert zu habbe worums geht. Odder habbe mer zuviel Söldner im Team ? Natürlisch hätt isch mier gewünscht das des neue Trainergespann mehr von dene alde Bärt abschneide ded. So en Seferovic zum Beispiel brauch mer ja net werklisch im Abstsieschkampf, so wie der kickt. Un die Ilse, so leid mer des dud, isch maach den ja, der is ja sowas von de Roll im Moment. Übber die Serbefraktion im Team brauche mer garnet zu redde, da sei abber de Klaane, de Gecerovic mal ausgenomme weil der ja nie spiele derf,die kannst eh in die Wüste schicke. Vielleischd reischd des ja noch um bei FC Wasserloch Katar zu kicke, abber net fer die Bundeslischa.
Das unser finnische Spinnebaa mal en schleschde erwischt is zwar traurisch, muß ihm abber aach emal zugestehe. Der hat uns schon genuch Punkte festgehalde. Ausserdem is er de aanzische der bis jetzt mal selbstkritisch genuch war um zu saache das er Scheiße gespielt hat. Des hab isch bei dene anner Kasper die ganz Saison schon vermißt. Vielseischd hängt des ja mit da dra das sisch die Herrn Kicker selbst übberschätze.
Egal wies is, wenn die Alibifussballer am Samsdaach net 200% mehr Leistung zeische, kann de letzte der aussem Stadion geht es Lischter fer die erst Lischa aus mache.
Ihne Ihrn ziemlisch agefressene Bembelzwersch
Adlergebabbel 