Jetzt is er also da, de neue Trainer. Sogar gleich als Doppeltes Lottsche so zusaache. Zwa Kovatze... ! Ob des gut geht ? De Bembelzwersch hat da so sei Bedenke. Zum aane, weil die Spieler mit de Entlassung vom Armin mal so garnet eiverstanne warn. Ob mer vom Vorstand her vorher mit dem Spielerrat gebabbelt word, is net überliefert. Hätt abber uff jedenfall gemacht wern müsse. Un ob übberhaupt noch aaner vom Voratnd mit de Spieler babbelt wisse mer ja aach net genau. Mir kimmt des jedenfalls so vor als sei Voratand wesche de Leistunge von de Mannschaft eigeschnappt un verweischerd de Dialog. Na egal, des Kind lieschd im Brunne un jetzt müsser mer halt sehe was dabei raus kommt.
Lach musst isch ja als isch die ganze obberschlaue Kommentare unserer Frankforter Fachpresse gelese hab. Von wesche Mutischer Weg. Die Eintracht verläßt Trambelpfade un so e ähnlisch Zeusch. Genau die, die jetzt widder Lobhudele, wern spätestens nach de zwaat Niederlaach unner dem Neue Draumduo vom Balkan e nass Hösje krieje und widder lossabbern, was de Vorstand bei de Eintracht widder fern Mist gemacht hat. Die Schläschdschreiber, die. Das de Keller kaa Chance hat, lieschd wohl am Heribert seim Westfälische Sparkassedickkopp. Was nadürlisch schlimm wär weil 1. de Heribert wie klaakind dem mer sei Lego weggenomme hat reagiert, obwohl der damals ja den Scheiß mit dem Keller gebaut hat. Zum 2. Weil de Heribert in 3 Monat Geschischde is und die Jachtgründe de ewische Dagobert eigeht. Fer misch wäre des Duo Keller / Schur die rischdisch Lösung gewese. Beide habbe Adlerblut in de Adern, könne gut mit Junge Spieler und habbe e klar Idee vom Fußball. Un vor allem habbe se die Fies uff de Frankfurter Erd un de Schui soger sei Worzele hier. Wahrscheinlisch wär des sogar die billischere Lösung gewese. Wenn des werklisch am Sparkasse Herri gelesche habbe sollt, dann hat der uns zum Abschied noch e ganz dick, faul Ei geleschd.
Wobei mer jetzt de Bembelzwersch net falsch verstehe sollt. Ich hab nix gesche de doppelte Slivovic. Nur denk isch halt das des e anner Ding is die Eintracht zu trainiern als so en zusamme gewürflte Nationalmannschaftshaufe der sisch alle paar Monat mal trifft.Un hier in Frankfort mußte halt aach dem verkommenste Geldsack die Eier kraule wenn de net widder ganz schnell weg vom Fenster sei willst. Aach wenn die vereinischt Medielandschaft maant die hätte Millione Kroatische Nationaltrainer übberlebt, des is noch gar nix gesche de Mob aus em 40iger, un die anner Protagoniste vom Trainer Bashing.
Sinn mer mer gespannt wie`s ausgeht. Abber aans sach isch Eusch. wenn des schief geht un es sisch rausstellt das de Heribert Harsewinkel dran Schuld is, dann wer de Bembelzwersch dem eischenhändisch e ganz Brigarde Maulwerf un anner Ungeziefer ins sein Sparkasserentervorgadde schicke un ma uffräume lasse.
Ihne ihrn Bembelzwersch
Adlergebabbel 