Wasserspiele

Vor Jahrn, als mer, in und um die Ostendstraß, alles platt gemacht und umgemodelt hat, habbe die Stadtplaner gemant das des zukünfdische In-Viertel Ostend aach en rischdisch scheene Platz braucht. Also so zum flaniern, rum hocke, babbele un sisch zeische. Also so en Dorfplatz fer Urbane Großstädter. Net das die Idee net zu gebrauche wär, abber was die dann da hie gezaubert habbe, die Stadtplaner vorm Herrn, is e Dreieck aus graue Platte un 5 Bäum. Also eiladend is was anneres.

Na jedenfalls is uff dem Plätzje nie was los. Ausser das ma am Rand e paar Schüler von de Bethmannschul odder um Konservatorium ihr Päusje da mache. Selbst de zwaade Aalauf fer en Wochemarkt läppert so vor sisch hie. Selbst die Kinner kicke lieber uff de Gass als uff dem Platz der ja immerhie groß genuch wär. Es wirkt eischendlisch so , als wenn sisch da kaaner druff traut, so als hät der Platz so e Aura von Unnahbarkeit. Es kann abber aach net dra liesche das mer sisch aus de obberste Stockwerke von de EZB beobachtet fühlt, wer waas was die da obbe so alles treibe mer kann ja net neigugge, die kam ja erst nach dem Plätzje. Egal, der Platz is en Flop und werds aach bleibe. Jetzt habbe abber unserne Stadtplaner un ihr Chefs aussem Römer noch so e rischdisch Ding rausgehaue. Sie habbe sisch e Brünnsche uff des Plätzje gebaut. Schee ! Also die nenne de Brünnsche, isch nenn des e Staaplatt wo Wasser drübber läft. Gut die Staaplatt is dreieckisch un aus Portugal, als ob mir kaa Staa hätte, abber Leut 425.000 Euro fer des Ding ?

E Dreieck fer 425.000 €

Ihr habt se doch net mer all de Reih nach ! Un des noch im Ostend wo euer Wohnungsbau un Stadtentwicklngspolitik, nach un nach die aale Bohner verteibt. Dann stellt sisch der Schiki-Micki-Griene Bejermaster, der Cunitz aach noch hie un besudelt sisch mit Lob was die alles so dolles geleist habbe im un fer unser Ostend! Habt ihr Selbstbeweihreuscherungs Fetischiste eusch ma übberlescht das mer des Geld besser in bezahlbare Wohnunge gesteckt hätt als in so e dabbisch, hässlisch Staaplatt ? Weil wohne kann uff dem Ding kaaner. Der Herr Berjemaster Cunitz was wohl werklisch net von was der babbeld, odder er hat e sozial Gewisse wie en Frühkapitalistische Kohlebaron aussem England im Achtzehnde Jahrhunnerd. Sacht der doch bei de Eiweihung das jetzt nach de Uffwertung des Viertels, die Ännerunge geschütze un die Ostend – Umwandlung voran getribbe wern soll! Also will der Kerl noch mehr wenischer Betuchte aus ihrm Ostende vetreibe un Geldgestobbde Hipster rei hole. Denn was annerse is ja die Umwandlung vom Ostend net. Von em Geldhörische CDU odder FDP Bejermaster hätt mer ja nix anneres erwart. Abber das die Griene genau solschene Schleimer sinn die vor de Immobilie Haie kusche läßt aam solangsam zweifele ob mer übberhaupt noch so en Politgaukler wähle kann.

Weider so, un de größte Dodegräber unsrer Demokratie sin die eischene Politiker.

De zornische Bembelzwersch

Sonndaach im Stadtwald

Morsche Leut !

Es is schon seltsam was so alles um de Vollmond rum passiert.  Vor alle unser Eintracht scheint da erschendwie e Problem zu habbe. Anners kann isch mir die zwaat Halbzeit vom Sonndach net erklären. Ma ehrlisch die Berliner habbe doch Fußball gespielt, wie se Fluchhäfen baue, ohne Sinn un ohne Plan. Un was mache unserne Bube ? Passe sisch mehr un mehr dem stillose Stil a. Erschend wie hat misch des an die Auswärtsspiele von de letzt Saison erinnert. Also da, dawo mer immer widder eigebroche sinn. Debei hät des ja so en scheene Sonndach wern könne. E mords Wetter hatte mer, die Temperatur war aagenehm un die Stimmung im Stadion gut wie immer. Besser häts net sei könne. Vielleischd war des ja des Problem, könnt ja sei das unser Mannschaft in de zwaat Halbzeit von em akute Anfall von Frühjahrsmüdischkeit befalle worn is. Jedenfalls habbe se so gekickt. Dann hat aach noch de Armin bis zum Elleboche in die Scheiße gegriffe mit seine Auswechslunge. Den Waldschmitt  links ins Mittelfeld zu stelle war ma e echd blöd Idee. Der Bub muß vorne in die vorderst Front. Er hat ja gewollt, un Aafangs ach en eschde Zuch nach vorne gehabt, nur wenn der dann en Ball weiderspiele wollt is kaaner mitgelaafe. Rundum, die Herrn etablierde habbe de Waldschmidt eifach ignoriert. Net schee. Ach, un dann de Jean-Luc ! Ne es Gebortsdachskind hat net sein beste erwischt. Abgesehe von dem Ding das der da übber die Latt gehaue hat, is nix von ihm gekomme. Einzisch de Medo hat sisch risdisch reigehaue un Dampf gemacht, abber genutzt hats aach nix. Ne, den Sonndaach hab isch mir schenner vorgestellt. Was solls, mir habbe de Adler im Herz, un so Ausfäll sinn mer ja gewohnt, des scheint genetisch zu sei.

Garnix mit Gene hat was ganz anners zu dun. Wenn mer so mit de S-Bahn ins un aussem Stadion zum Spiel ins Waldstadion fährt, kann mer ja schon so mansches sehe un hörn. Es is net immer erbaulisch wie`s da drin zugeht, abber bei so Masse von Mensche uff aam Fleck is es ja zu erwarte das sisch aach den aane odder anner Freak in de Masse versteckt. Korz um de Bembelzwersch hat schon öffter sein Spaß debei gehabt. So aach widder am Sonndach. Naturgemäß wird ja de Bembelzwersch uff Grund seiner Größ immer in die Eck gedrückt, beim S-Bahn fahrn. So hat sisch dann des am Sonndaach so ergebbe das de Zwersch von ner Familie, also Vadder,  Mudder, zwaa Töschder so um die 20 rum in die Türnische gequetscht worn is un so die gesitreische Ergüsse im Familieverband mitkrieje konnt. Mer lernt halt immer dezu, So zum Beispiel, das unser Stadion ja viel klenner is als es im Fernseh aussieht. Isch habs ja geußt, bei Sky werd abber aach nur gemochelt. Das es kalt war im Stadion hab isch ja net so mitgekrischt, abber des kann ja an meine zwerschespezifische Empfindunge liesche. Jedenfalls hat de Babba dem Mädsche gesacht, das die beim nexde Spiel halt ihr Wolldeck mitnemme soll. Isch fraach misch zwar was die im Winder mache wolle, abber jeder nach seiner Fason. So rischdisch geblendet von de Geisteblitze war isch dann als mer in Niederrad übber die Brück gerumbelt sinn, un isch erfahrn hab des mer jetzt übber de Rhein fahrn. Mer lernt ebe nie aus, odder ? Die Ansache das de Ausstieg im Hauptbahnhof in Fahrtrischdung links erfolscht, wurd dann mit der Frach an misch quittiert wo den links is. Da de Bembel ja en freundlische Zwersch is, hat der das dann unmissverständlisch klargestellt, das links da is, wo de Daume reschds is. Des widderrum hat die junge Dame dezu aagereschd ihr Händ zu betrachte. Was debei raus kam waas isch net. Die hat dann nix mehr gesacht. Kann ja sei das se jetzt noch nachdenkt wo de Daume reschts is.

Jedenfalls, alles in allem en gepfleschde Sonndach verbracht. E Kackspiel von de Adler gesehe, vorm Spiel en Äpplewoi in de Altweibersonn genosse un uff de Heimfahrt noch e bissje was übber Heimatkunde gelernt. Was will mer mehr?

Also bis dann ihr Leut, bis zum nächste Uffrescher den uns die Eintracht beschert.

Euern Bembelzwersch