Habbe se en endlisch an de Eier gepackt, den Pate von de Fifa. Is ja jetzt abber aach ma werkllisch Zeit worn. Dei Eischläsch kame immer näher un es war ja abzusehe, nach dem de Stellvertreder schon unnergetaucht is, das des nemmer lang dauern kann bis aach de Sepp dra is. Des is halt des dumme fer de Sepp, das mer sisch in unsernern Digital Welt net mer so leischd verstecke kann. Früher, also so de Posträuber aus England zum Beispiel, der konnt noch im Brasilianische Dschungel unnertauche. Da gabs noch kaa Handy mit dene jeder übberall Foddos macht,un die dann in de Welt rummzwitschert. Also hat des mit dem Unnertauche noch reschd gut geklappt. Beim Blatter Sepp is das da schon schwierischer. Zum aane kennt ja jeder dem sei dämlisch Griensegesischd un zum anner hat ja jeder zwaade Indio am Amazonas mittlerweile e Handy. Die würde sisch doch drum reiße so e kommisch Visage zu knipse un als seltsam Phänomen in die Welt zu zwitschern. ausserdem hät ja der arme Sepp dann uff sein ganze Luxus verzischde müsse. Also kaa Bad mehr im Bordeaux Grand Cru un Kaviar Häppscher zum Schampus. Ob der sisch aach Mädscher zum Falde massiern bestellt, waas isch jetz net, abber vorstelle könnt isch mir des schon. So gesehe is er ja zu bedauern. In die Karibik abhaue bringt aach nix mehr, die liefern ja jetzt aach schon aus. Es is werklisch net mehr aafach, so e Lebe als Multinationeler Krimineller. Un so nebebei bin isch mal gespannt welsche Lischdgestallte des Fußballs noch so übber die eischene Fies, hoppla, die eischene Gier stollpern. De schöne Mischell aus Frankreisch habbe se ja schon vernomme, die Staatsawäld. Der hat zwaa Milliönscher kassiert, un kaaner was fer was. Un de Kaiser werd wohl aach bald dra sei. Vielleischd könnte die dann ja so e Knast WG gründe. Mer könnte ja dann eventuell de Winterkorn dezu stecke. Des is ja aach noch so en Trickser,Täuscher,Leut Verarscher. Obwohl, isch det die ja erst e mal all bei Wasser un Brot eispernn, so nach dem Moddo „Zurück zu de Worzele“, Wär doch garnet schleschd dene ma zu zeische wie es uff de Erd zu geht. Des Parallel Universum in dem die Lebe scheint ja doch zu bröckele.
Bis dahie, Euern Bembelzwersch
Adlergebabbel 