Nodize aus de Provinz


Morsche Leut,

net das jetzt aaner mahnt isch hätt die Fronte gewechselt. Des det mer net im Draum eifalle die Adler zu verrate! Abber des was jetzt kimmt muß e ma gesacht wern. Des geht uns nämlisch alle an. Des bassiert zwar in de Provinz und desswesche krieje mir des net so mit, abber des kann aach uns erschendwann bös uffstoße.

Also da obbe, so zwische de Kasseler Berje un de  Nordsee lischt so a Dorf des Hannover hast. Genau, da wo der Hoheitlische Pinkler und Schläscher her kimmt. Abber egal. Also da gibts so en klaane Westetasche Napoleon der sich en Fußballverein kaafe will. Un weil die störrische Ochse von Fans des abber net wolle gibts halt schon länger Zoff. Des det ja eischentlisch aach ka Sau interessirn, nur muß mer des ebe im Zusammhang mit Radkappe,Pilledreher Weischwarenhersteller und Brausetycoons sehe. Also die Fans, die diewo die Stimmung bei dene im Stadion gemacht habbe gehe jetzt net mer hie. Die gehe jetzt zu de U23 . Die Stimmung war ja eh immer mäßisch bei dene, abber jetzt is es wie am Verkausoffene Samstag in de Innestadt von Hannover, nix los. Da kann mer jetzt ma sehe, was passiert wenn die, diewo sich so en Verein als Spielzeusch gekaft habbe, die kritische Fans aussem Stadion vertibbe habbe. Des haast also, gekickt werd nur noch für e paar Arschrkrischer un ver de geneischte Sky-Abo-Inhaber in de warm Stubb. Ade`Fußballverein, Welcome Zweckgemeinschaft zur Geldvermehrung geltungssüchtiger Kreise. 

Da hat sich also dann der, ich sach ma Fanclubverband, von dene uffgelöst weil die Geldsäck druck gemacht habbe, und die Ultras von dene gehe net mehr ins Stadion. Jetzt habbe die Geldsäck en offene Brief uffgesetzt in dem die jetzt um Neue Fans betteln. Klar, unkritische Klatschhanseln, ungefähr so wie in Meenz.Na viel Spaß. Was abber selbst so em altgediente Zwersch die Fies weghaut is das die Order jeden mit Stadionverweis bedrohe der „Kind muß weg“ ruft. Angeblisch damit kaan Zoff in de Kurv entsteht. Des bringt dem Zwersch sei Gemüt zum koche. Des hört sich so ah als sei da net en Deutsche Unnernemmer sonder de Stalin am Werk. Nu is ja in Hannover zu lebe eh schon fast so schlimm wie en Gulag in Sibirien, abber das die sowas wie Meinungsfreiheit abschaffe wolle is nadirlisch de Hammer.

Was Eusch de Zwersch halt mit dem gerschreibsel saache will is das mer, egal  von welschem Verein mir Fans sin, alle im gleische Boot hocke. Wenn mer net uffbasse un uns soweit wie möschlisch solidarisch wehrn gesche die nach selbstbefridischungheschelnde Geldmeude, sin mer unsern Fußball mit Emotione, Spaß und Trauer, Uffreschung und Freud bald los. Die letzte legale Droge die zwar süschdisch aber net krank mescht! Ganz ehrlisch des is e freudlos Welt die isch da seh!

So, erst ma genuch in die schwarz Zukunft geguggt, bereide mer uns uff des nächste Spiel vor !!

Forza SGE

Ihne Ihrn Bembelzwersch

Werbeanzeigen