Bembels tönende Wochenschau 09/2015

Gude Leut,

Sinn die Eusch aach uffgefalle ?  Die bunde Männscher diewo so aussehe wie von Playmobil, die zwische all dene uniformierde Fußballer rumrenne? Genau, die zwaa ausse an de Linie die mit dem Fähnscher winke wie als wenn se de Berufsverkehr in Frankfort reschele müßte. Und der anner mit de Trillerpfeiff im Mund, der dann immer nach em Pfeiffe mit de Arm wedele dud wie en Fahrdienstleider von de Bahn. Gell, ihr wißt aach net wozu die da sinn. Entweder die Fähnscheschwenker sehe Sache diewo es garnet gegebbe hat, odder die sehe nix, wanns was gegebbe hat. Erschend wie hab isch den Eidruck das selbst dem Stöger sei Brill, die der da am Sonndach dem Pfeiffemann hie gehalte hat, nix nutze ded. Mer was ja net wer da wem sei Intresse vertritt, die Intresse von em gute Fußballspiel und vom Fan der en faire Wettbewerb habbe will sinn des uff jedenfall net. Un es is ja net nur Köln un Stuttgart am letzte Wocheend gewese. Wenn isch so en Aluhut trache ded, würd isch ja saache das da der DFB un sei Mafia dehinner steckt odder es lieschd an de Chemtrails. Apropos DFB, da werds ja jetzt e bissje eng, fer de aaner odder annere von den Herrn. Schwarze Milliönscher die übberwiese wurde von dene angeblisch kaaneer gewußt hat fer was eischendlich. Ei sach mal, wenn dir en Hunnerder fort kimmt rennste doch rum un suchst wo der hie is. Un die wolle net gemerkt habbe das erschend aaner 6.7 Million an die Fifa übberwiese hat? Ei isch zieh doch die Hos net mit de Beißzang an.

Un dann hat am Donnersdach middach de Herr Niersbach e Presskonferenz gegebbe. Ne ihr Leut was soll dann des? Angeblisch habbe die die 6,7 Milliönscher bezahlt um dann späder 170 Milliönscher von de Fifa zurück zu krieje. Un weil de arme DFB des Geld net gehabt hat, hat des de Dreyfuss vorgelscht un dann späder uff Umwesche widder gekrischt. Klar, Dem DFB gehts ja aach immer so schlechd. Un warum uff Umwesche zurück gezahlt ?

Leut, hört mer uff ! Klar war des e geil WM 2006. Un es war aach gut des mer die gekrischt habbe. Da werd eusch doch net werklisch aaner en Strick draus drehe. Abber wenn ihr in dem Schmiernpool vom Blatter seim Haifischbecke mitschwimme mußtet um die WM zu krieje, dann gebts jetzt halt zu und helft so mit den Sumpf von dene dreckische alte Männer trocke zu lesche. Alles annere is doch fer die Fies. Vor allem unser Lischtgestallt, grad der sollt jetzt mal Rückgrat zeische un die Karde uff de Disch lesche. Aber der konnt ja nur reiheweis Kinner mache, Eier hat der kaa in de Hos.

So werd halt weiderhin versucht a Nebbelkerz nach de anner zu schmeiße un jeder versucht sei eischen jämmerlisch Haut zu rette aus dem Trümmerhaufe de geldbefeuerte Altmännfreundschafte. Des is nur noch e amrseelisch Schauspiel was die Herrn da abgebbe. Gibts dann wirklisch kaan aständisch uffreschde, Mann odder Fraa, der sisch zutraut den Saustall auszumiste? Isch glaabs net, so schlimm des is. Es wern nur widder anner folsche, die des System Blattern optimiern un sisch net so schnell erwische lasse, so traurisch des aach is.

Im Übrische bin isch jetzt mal gespannt, ob unserne Adlerträsche sisch am Samstag uffrabbele un dene in Hanoi ma uff die Ohrn gebbe. Zeit werds a mal. Entäuscht habbe se uns fers erste genuch. Es werd Zeit Bube, mer woll nix als das ihr uffem Platz alles versucht um zu gewinne. Wenn dann noch e schee Fußballspiel debai rauskommt, sinn mer eusch bestimmt net bös.

En offen Brief a de Eintrachtvorstand

Lieber Vorstand von de Eintracht,

ei sacht e mal, was habt ihr eusch dann bei der Presseerklärung gedacht. Es is ja in Ordnung wenn ihr Eusch net verweischern wollt und den bescheuerte Mist von de DFL mitmacht. Isch kanns Eusch aach verzeihe, das ihr vor de Blöd-Zeidung kuscht. Abber bitte, verarscht die Eintracht-Fans net. Mir sinn net Doof !!!

Ihr habt e derardisch dämlisch Argumentation in Euer Presseerklärung nei geschribbe, das es aam so vorkimmt, als hätt Ihr der Lehrling vorgeschickt. So von wesche Bub mach ma isch hab kaa Zeit misch mit sowas abzugebbe. Is Eusch e gut Verhältnis zu de beste Fans der Welt so wenisch wert? Mer hätt doch werklisch erwarte könne das ihr Eure werklische Gründe offeleschd un net so en Mist vorschiebt, wie vertrachlische Verpflischdunge un Solidarität mit de DFL.

Mir, die Fans von de Eintracht mache Eusch alle zwaa Woche es Stadion nahezu voll, mir kaafe Euer ziemlisch teure Trikots un annern Utensilie, jede Menge von uns fahrn, wenns sei muß, bis Timbuktu um die Mannschaft zu unnerstütze. Un dann komme so zwaa.drei läbbisch Sätz zu em Thema des de Fans unner de Näschel brennt. Naa, Leut da habt ihr Eusch net mit Ruhm bekleckert. Misch wunnert des ganz besonners, weil doch die Zusammabbeide zwische Fans un de Eintracht eischendlisch sonst gut klappt.

Also lieber Vorstand, wenn widder mal sowas is, dann geht bitte mehr uff dei Fans ei. Sonst könnst passiern das der Schuß dann nach hinne losgeht. Un des wollt Ihr un des wolle mir net.

Hochahtungsvoll

De Bembelzwersch

Da könnt isch nur noch Kotze…….

Gut das de Bembelzwersch kaan Teppisch in seiner Wohnung hat. Da hätt er nämlisch druff gekotzt wie er des gelese hat. Mer kann fresch, mer kann unverschämt sei, un mer kann die Blöd-Zeidung sei. So als Krönung allen Übels. Die Zeidung die vor e paar Woche de Leut noch suggeriert hat, das die Asylande dem deutsche Hartz IV abhängische die Butter vom Brot klaue, genau die Zeidung die behaupt hat, das Sanitäter nur mit Schutzweste in Asylandeheime gehe weil se Angst habbe, die Zeidung macht jetzt aan uff de Ausländerfreund un spielt #refugeeswellcome ! Allein des is schlimm genuch. Jetzt kimmt abber die Fifa fer Arme, also die DFL ins Spiel. Am 5. Spieldach, weil die DFL ja bei de allgemeine Willkomens Kultur net hinne astehe will, werd e Zeische gesche Fremdefeindlischkeit un Intolleranz gesetzt. Hermes, also so ziemlisch de übelste Ausbeuder von Scheinselbstständische, un sonstische Abhängische, verzischded großzügisch uff sei Ärmelogo in de erste un zwaade Lischa. Dafür derfe dann die Spieler mit em schicke #refugeeswellcome Logo uffem Ärmel ufflaafe. Wäre ja so weit net schlechschd, wenn da net aach noch des Logo von de Blöd-Zeidung druff wär uff dem Uffnäher. Es is ja schee, liebe DFL das ihr eusch engagiert, fer die arme Flüschdlinge, abber müßt ihr eusch desswesche mit Heuschler, Opportuniste un annerm Gechmeiß zusamme due ? Nemmt eusch e mal e Beispiel an de Fans in de Kurve ! Spontan, ohne irschendwelsche Organisatione un net in Abhängischkeit von erschendwelsche Geldgeber, die selbst aus dem Elend der Flüschdlinge ihrn Vorteil ziehe wolle. So sollde Aktion von Eusch gemacht wern. Alles anner stinkt zum Himmel. Warum setzt ihr eusch net mal mit de Fans zusamme un koordiniert mit dene die aane odder annere Aktion. Odder is des widder nur so e billisch Alibiaktion mit der ihr zeische wollt was ihr doch fer guude Kerle seid, die ihr da macht ? Un wenn schon so was in Abstimmung mit dem Ärmelsponsor gemacht werd, muß des unbedingt die Blöd-Zeidung sei. Abgesehe davon. Es is noch genuch Platz uff so em Trikot, da hät ihr aach e Logo in Abstimmung mit de Fans un dem annern aale Männerclub, dem DFB mache könne. So ihr Leut, stinkt die ganz Sach ferschterlisch zum Himmel un widder zurück.

Isch, jedenfalls würd als Trainer odder Manager am Wocheend jedem Spieler en dicke schwarze Edding in die Hand drücke, damit er den Blöd-Zeidungsschriftzuch übbermale kann, bevor er uffen Platz geht.

Machts gud Leut, de Beembelzwersch geht erst noch ma Kotze !

Der Link zur Pressemitteilung der DFL