Arsch zusamme kneiffe? Net mit mir !


Die Allgemeinheit geht ja devo aus, das Zwersche im Wald wohne. Des stimmt so abber net. Besonners Bembelzwersche stehe mitte im Lebe, habbe so zusache, ihr Finger am Puls der Zeit. Un Mansche habbe sogar zugang zum neuländische Internet. Un genau des is der Punkt an dem isch denk isch steh doch im Wald ! Ei was faseln die Fußball- un annern Sportfunktionäre, politische Laiedarsteller un, als Sportjournaliste bekannte Persönlischkeite da eischendlisch fer Zeusch? Die dun so als gäbs zum durschführn von de Spieldaache in den verschiedene Lische erschend e Alternative. Gibts net ! Wenn mer jetzt noch mehr Spiel un annern Veranstaltunge absaache dede könnte mer eipacke, Lischd aus mache. Es maach ja sei das die Warnung fer Hannover werklisch ernst zunemme war, so werklisch den Eidruck hat isch allerdings von Afang a net. Wenn mer dene so zuhört, die Demokratie is Wehrhaft, wir weiche net zurück, bla bla bla ….  und dann bei em erte bissje Geschewind habbe se de Arsch zugekniffe. Leut, kann sei das jetzt de aane odder annere dem Bembelzwersch e weisch Bern bescheinischt abber egal, mer hätt des Spiel dorsch ziehe müsse. Wenn isch misch so weit aus dem Fenster lehne du un von em Zeische fer Demokratie, Freiheit, Solidarität un Widerstand schwafel, dann derf ich sowas net Absache uff blosse Vermutunge hie. Wer in e Fußballstadion geht, wer in e Fluchzeusch steischd odder in die Festhall zum Konzert geht, jeder muß sisch bewust sein was er fer Risiko eigeht. Des  Rund um Sicherheitspaket von de Allianz un de Hamborsch Mannheimer funktioniert halt net so wie in de Werbung. Mir müsse widder lerne das uns jeder Zeit de Himmel uff de Kopp falle kann.

Also gehts am Samsdaach ab ins Stadion, so wie immer. Mir mach die Nachtkappe ka Angst. Un wenn unser Herr Innereie Minister mahnt wir wern net mündisch genuch die ganz Wahrheit zu erfahrn odder er aach nur dumm Zeusch gebabbelt hat, de Bembelzwersch werd nix an seim Lebe ännern, un er werd aach weiterhin net nach jedem Moslem, Dunkelhäutisch odder sontswie anners aussehende Mensch schiele un sisch übberlesche ob des vielleischd an Bombelescher is!

Also Leut dem Mudische gehört die Welt !

Euern Bembelzwersch