A5.. Ausfahrt Pjönjang

Ei die habbe doch de Arsch bis zu de Ohrn offe! Zuständ wie beim Kim un  il. Wenn des ja jetzt nur uns Eintrachtfans betreffe würd, wärs immer noch e Sauerei. Abber wenn die Hannebambel damit dorsch komme, is es bald ganz vorbei mit de Auswärtsfahrerei.Da kann nämlisch jeder kleingeistische Dorfsheriff die Auswärtsfans Aussperre wies ihm grad passt. En Grund find der immer wann der will. Hier werd net nur de gemeine Fußballfan zum Kriminelle gestempelt, sogar de Babba der mit seim 5 jährische Sohn Eintrachjäcksche in die Stadt will werd zum potentielle Fußballterrorist gemacht. Un de Henning Nachtsheim mit seiener Lästerzung und de Apitz mit seine Eintrachtschmierereie wern wahrscheinlisch jetzt lebenslänglisch aus Pjönjang, ups Schuldischung, aus Darmstadt verbannt. Un wenn se doch in des Arrogande Provinznest fahrn, wern se wahrscheinlisch geteert, gefedert und aus de Stadt gejacht wie die Daltons aus Tombstone.

Also wenn mer jetzt net uffbasse, habbe mer net nur die dreggische alde Männer vom DFB un de DFL am Hals. Jetzt kann jeder nachgemachte Matt Dillon de Scheriff raushänge un saache: Du kimmst mer net in mei Stadt.

Wie hat des de Janosch doch gesacht? Ach wie schee is Nord Korea, odder hab isch da was verwechselt ?

De stingische Bembelzwersch

 

Werbung

Bembels tönende Wochenschau 4/16

Kerle nah, was e Uffreschung. Die Woch gings ja werklisch nur noch um de Armin. Muß er fort, kanns en annere besser, soll er bleibe weil er des Ding noch rausreißt, un so weider un so weider.Debei habbe dann die meiste vergesse e mal uff die Spieler zu gugge. So als wenn de Trainer selbst kicke ded. Abber so is es halt emal, de gemeine Fan braucht halt en Sündebock un das is naturgemäß halt de Trainer un des erst reschd wenn des aaner is der ab un zu mal die Klapp zuweit uffreißt. Wie unsern Armin. Da kommts dann zu so scheene Koalitione wie FAZ mit de Blöd Zeidung. Hand in Hand gesche Veh. Des hat was.Des is wie wenn die Frauke Petry mit Alice Schwarzer… aber lasse mer des.

Uffreschung gabs aach in un um Pillenkusen erum. Mal widder wesche em Pfeiffekobb. Da mäschd der Trainer von de Pilldreher aan uff störrischer Kinnerkaddebalsch un de Rudi aus Hanau schraubt sisch in aller Öffentlischkeit vor de Sky Kameras aus de Hos. Wie isch mir des so aageguggt hab, hab isch misch gefraacht was so manscher mit dem Schmidt als Trainer bei unsrener Eintracht will. So e Rumpelstilzjer passt nach Meenz odder Dortmund, abber net zu uns. Stell dir ma vor der hätt des da vom Sonndaach bei uns abgezoche, de Zwayer hät des Spiel abgebroche und mit 3:0 fer die annern gewert. Mir habbe halt kaan Pillebonus. wie mer ja saache muß das de Herrr Zwayer sisch redlisch bemüht hat die Meisterschaft noch e klaa bissje spannend zu halde. Ob sowas de rischdische Wesch is, steht uffem annern Blatt. Wie mer ja übberhaupt de DFL bescheinische muß, das die aach net mehr so ganz in unsrem Universum deham is. Den nächste Spieldaach zwaa Woche vorm Apfiff zu terminier is ja vom annern Stern. Net nur das des aach fer die Vereine ziemlisch blöd is, von wesche de Vorbereidunge, fer die Fans die Auswärts fahrn wwoll is des eifach nur e Unding. Abber was juckt die DFL dann Fans im Stadion, die sinn ja nur uff Fernsehgelder scharf.

So rischdisch Zeitgemäß is ja der Kommentar vom Herrn Dorschdewitz in de Rundschau am Freidaach. Der mahnt  das die net ausverkaafte Spiel gesche die Dinos un die Schlümpf an de Unlust von de Fans von de Eintracht lieschd. Der zieht aach die Unnerhos mit de Beißzang aa. Das des die Eventies sinn, die da net mehr bei den Temperaturn und Aastoßzeide ins Stadion komme hat der noch net gemerkt. Des is halt wie bei de Bauern, wenn de Gewinnst is es Stadion voll mit dene, wenns net läft bleibe se halt weg. Nur das halt bei de Bauern leider meist gewonne werd. Un das die Herrn Schornaliste da an der Schraub kräftisch mit drehe wolle die ja aach net wahr habbe. Die solle ja kridisch berischde, is ihrn Job. Abber berischde un Meinung mache, sinn zwaa unnerschiedlische Schuh. Un so manschmal hab isch des Gefühl, das sisch die Herrn drinn gefalle in de Roll vom Meinungsmacher. Die habbe halt aach ihrn Ego, der sisch lieber selbst die Eier krault, als des zu mache wofer se eischendlisch bezahlt wern. Passt zu unsrer Ego-Gesellschaft.

Des halt nur so am Rand. De Zwersch un die eschde Eintracht Fans wandern halt aach am späde Sonndaach Abend ins Stadion. Un isch bin mer sischer das mer dene Schlüpf die Akkustische Hölle bereide wern die se verdient habbe, und die rischdisch aan uff die Schlupmfkapp grieje. Wohl gemerkt die eschde Adler, die Eventies sitze dann lieber in ihrne Chrom- un Neon-Schuppe un schlürfe ihrn Caipi. Egal, die brauche mer eh net.

Un dann haut da die Blöd am Freidaach moin aach noch aan raus…. Geheimgespräche mit Nehrlinger ! Wow ! En  gestannene Bauernmanager fer die Eintracht. Des wär de unnergang vom Abendland. Zum Glück werd mer des als Nebbelkerze eiordne könne. Übrischens liebe Blöd-Zeidng, de Uli kimmt bald aussem Knast, der hät dann Zeit…..

Also dann ihr Leud, halt die Ohrn un alles annere Steif,

Euern Bembelzwersch

Bembels tönende Wochenschau 2/2016

Guude Leut,

da hat die Woch ja mit ner klaane Überraschung agefange. Unsern Fuchs, de Bruno hat rumgepokert un uns all veräbbelt. Von wesche mer sinn ferdisch mit de Transfers. Nix da. Zwaa neue hat er geholt, quasi dorsch de Lieferante Eigang. So abgelutscht is der. Ma gugge was bei dene Neue rauskimmt. Den Ben Hatira kennt mer ja schon. Wenn der mal net verletzt is kann der aach ganz gut kicke un links vorne kann der. Der annere soll ja so en Perspektivspieler sei, der Junge. Yanni Regäsel haast der. Komisch, was die da fer Name habbe in dem Weltdorf. Abber egal, Hauptsach der werd unser Verteidischung hinne reschds dischd mache. Des Trauerspiel kann mer sisch ja net mer mit agugge. Un den Schändler due mer eipacke un nach Ameriga schicke, vieleischd kann ja de Oka was middem aafange.

Un kaum mäschste mal die Aache zu kimmt schon widder die Skandalmeldng. Den Ben Atari hat sisch mit dem halb Ami Weiser im Bus gekloptt. Kann schon sei, vielleischd hat de Mc Weiser zum halb Arabische Atari gesacht das der nach Quantanamo gehört, und der hat dann dem MC Weiser aan eigeschenkt odder so. Mer waas es ja net, weil die vorne im Bus nix mitgekrischd habbe. Tante Hertha halt. Also Leut, übber sowas sollde mir uns garnet uffresche. So lang der sisch bei uns ordentlisch benimmt is des vergesse. Es könnt nadürlisch aach sei das de Bruno der Fuchs dem gesacht hat er soll sisch rauswerfer lasse,erschend wie, un mir teile uns die gespart Ablöse….. Mer waas es net. Davo ma abgesehe, es könnt unserer Mannschaft ja gud dun so en Bad Boy mitte drin zu habbe. das ganze gebilde kimmt ja doch ziemlisch brav daher. Mit so böse Bube is ja die Eintracht immer gut gefahrn. Uli Stein z.B. um nur aan zu nenne.

Na, un de Bundesliga Dino hat widder mal Faxprobleme gehabt. Die scheine ja net nur in de Bundesliga Dinos zu sei. Das nämlsch e Fax aus Bern länger dauaert als, saache mer mal aus Düsseldorf, hätt mer ja wisse müsse. Die Berner sinn halt net die Schnellste. Erschend jemand sollt dene doch mal saache das es modernere Dinger gibt als Faxe. Kaa Wunner das die Dinos ausgestorbe sinn.

Ganz gribbelisch werd de Bembelzwersch ja wenn der an de Samsdaach denkt. Dreckisch werd des Spiel gesche die Schwabesäck ja sowieso, des kenne mer ja. Viel spannender is, was die Fans aussem Verzischer mache die ja net uff ihr Stehplätz derfe. Es is stark azuunemme das es statt Choreo, die ja die alte Säck verbode habbe, e ziemlisch laude akkustische Danksagung an die Mafiosi aus de Otto-Fleck-Schneiße gebbe werd. Aach wenn die Babbsäck vom DFB sisch noch so astrenge, die Fantasie und den Enthusiasmus von uns Eintracht Fans könne die net unnerkrische. Es sinn ja in de Ostkorv zwaa Blöck fer die aussem 40 reserviert. Es is also mit em kräfdische Wechselgesang zu reschne. Da sollte sisch die Eventies un die Meckerrentner mal ordentlisch beteilische. Sonst sinn die des net wert e Eintrittskart fer unser Stadion zu krieje.

Also wrate mer jetzt uff de Heimsisesch am Samsdaach, was anneres kimmt ja gar net in Fraach. Die Schwabesäckel müss hinner uns bleibe.

Forza SGE, Fuck DFB !

Euern Bembelzwersch

Seine Lächerlichkeit, DFB

Es kimmt ja selten vor das sisch de Bembelzwersch aus de Hos schraubt,  abber dies mal muss des sei! Da erdreißde sisch die Obberschieber, Mauscheler, und sosntische Mafia ähnlische Gestallde vom DFB widder mal Reschd zu spresche. Debei habbe die doch schon vor 20 Jahrn jeglisches bissje Anstand, Rechtsgefühl un Integrität verlorn. Des is erschendwo uff de Streck geblibbe zwische Geltungssucht un Geldgeilheit. Un jetzt komme die da her, un palavern von Zuschauer Teilauschluß un ähnlische Kollektivstrafe fer uns Eintracht Fans. Un fer was ? Weil 5 odder 6 dreggische Darmstädter Fane gebrannt habbe un 6 odder 7 Pitschedabbler gemahnt habb in de Inneraum vom Stadion hübbe zu müsse. Ei habbe die dann noch alle de Reih nach im Obberstübbsche?

Selbst die Polizei hat nach dem Dreggische Kick gesche Darmstadt gesacht das es im große un ganze Friedlisch abgegange is. Bei 51.500 Zuschauer gabs sibbe Festnahme. Ei da is ja bei jedem Helene Fischer Konzert mehr Randale.

Da zeischd sich widder mal das des ganze Funktionärsgesocks weider vom reale Fußball entfernt is als die Erd vom Andromedanebbel. Im Geschesatz von annern Debys wie Fischköpp gesche Dinos, odder Herne West gesche Lüdenscheid Nord gings doch bei uns sowohl gesche die Klatschpappe als aach gesche die dabbische Heiner friedlisch ab. Es kimmt aam so vor als wollde die verkackte Schlipsträscher aus de Otto Fleck Schneiße sämmndlische Emotione aussem Fußball verbanne.  Anstatt de Vereine zu helfe des Braune Gesoscks aus de Stadie rauszuhalde wern die noch bestraft die zumindest en saubere, net rassistische Support in ihrm Stadion zelebriern. Klar is doch das bei so em Derby, un vor allem bei so em dreggische gekicke wie des die Zweitschlümpf da abgezoche habbe de meiste Fans die Galle übberläft. Abber des kenne die ja net mehr, die gepamperte Funktionärs Kastrade. Emotione zeische die nur noch wenns an ihr Geld odder an ihr Privilegien geht.

Also weider so, Forza DFB !! Ihr werd de Fußball schon kabutt krieje !!

Euern stingische Bembelzwersch

Wüste(n) Zeiten III

Gudde, odder wie de Scheich sacht, Salami Alleikum odder so.

So langsam gehts halt widder in Richtnug Heimat fer unsere Adler.  Is ja aach gut so, weil des nämlisch e Zeiche defür is das die Rückrunde endlisch vor de Tür steht. Wie mer so hört warn ja net nur unserne Spieler fleißisch in de Wüste, sondern unsrne Bosse solle ja aach heftischst getaacht habbe. So von weche dem Sparkasse Heri seim Nachfolscher un dene Genußscheinscher die ausgegebbe wern solle. Nur blöd das jetzt grad de Chines mit seiner Wertschaft, die nix daacht des ganze Börse und Geldgedöhns so runner ziehe dud. Un weil des so is, hat de Guru von de Börse, also de Steubing gesacht die Dinger bleibe erst mal in de Schublad lieje. Da isch vom Geld nur waas, das isch immer zu wensich devo in de Dasch hab, glaab isch des dene mal. Die werns ja wisse, hoff isch. Verrade dun die ja noch nix, von wesche dem neue Vorstand. Selbst de Fischer, derwo ja immer mit em Mund vorne draa is, sacht nix. So nebe bei solle sisch ja unserne Hohe Herrn aach übber en neue Hauptsponsor unnerhalde habbe. Da derf mer ja aach gespannt sei, was da debei rauskommt. So sechs Milliönscher im Jahr müsst der schon locker mache um des uffzufange was Fiat an Loch im Etat hinnerläßt. Net das isch glabb aans von dene viel Ehrenwerte Geldhäuser aus unserm scheene Frankfurt würd de Eintracht die Peanuts bezahle. Die bestimmt net. Abber vielleischd habbe se ja so en Scheisch an de Angel der e neu Spielzeusch braucht. Mer waas es net. Da solle sisch mal die Herrn aus de Teppischabteilung de Kopp drübber zerbresche. Mir klaane könne da eh nur zugugge.

Mit unserne Neuzugäng scheint das ja ganz gut zu klappe. Aach wenn des gestern gesche die Biene Maja nix war. Vor allem widder hinne, unsern Hühnerhaufe der sisch Abwehr nennt. Da kann mer nur hoffe das de Armin da noch Ordnung nei bringt bevor es gesche die Abgasbetrüscher aus dem Retortestädtsche widder los geht.  Lustisch fand ich ja widder die Twitter Experde und die uffgereschde Foretippler. AV raus un so weider. Die selbe alde Sprüsch immer widder. Ei fällt eusch dann werklisch nix anneres ei? Odder habbe die da so e Automatik in ihrm PC odder Telefon diewo immer widder des selbe ins Netz schickt. Als wenn de Triner gekickt hätt un net die hochbezahlte Fußballer. Isch persönlisch halts da ja eher mit de Leut vom Theater. Fer die is ja so e vergeischd Generalprobe e guudes Zeische. Weil dann nämlisch die Premier klappt. Also net uffresche, schluckt euer Drobbe un wart ab was am 24. bassiert.  Isch jedefalls muß eigestehe das isch misch im Huszti geirrt hab. Isch hat ja mit em lahmarschige Frührentner gereschend der da aus China kimmt. Abber der hängt sisch mäschdisch nei, wie mer so hört. Ma gugge ob der des dann aach dorsch hält.

Ansonste mach ich mer eischendlich net werklisch en Kopp wesch unserner Eintracht. Wie isch ja schon e paar mal geschribbe hab, die Bube spiele e rischdisch gut Rückrunde.

Also bis dann,

Euern Bembelzwersch