Voodoo, nix als Voodoo


Guude Leut,

euern Bembelzwersch is noch e bissje auser Adem. Bis uff die letzt Minute mußt isch renne um den Blogbeitrach heut noch verdedisch zu krieje. Mein Fliescher mit dem isch aus de Karibik zurück gekomme bin, hat Verschbädung gehabt.

Zu reschd fracht ihr eusch jetzt, was mäscht unsern Bembelzwersch in de Karibik? Isch werds eusch erklärn.

Also als gestern Abend des Pokalspiel da verdisch war, war de Zwersch vollkomme von de Socke. Also weil die Bayern halt sowas von nebe de Kapp warn und weil die aach noch erschend wie ihrn Bayerndusel net gefunne habbe. Des konnt also net mit reschde Dinge zugeje. De Zwersch, net faul und net dumm, hat sisch also gleisch an sei direkte Schnittstell bei de NSA eigeloggt und rescherschiert. Un was soll isch saache isch bin fündisch geworn. Also da uff Jamaika, genau da wo all die Kiffer herkomme, da gibts aaner der sisch Baba Doc nennt. Un der is en entfernde Verwande vom Doc. M-W*. aus Münsche. (*voller Name is dem Zwersch bekannt)  Wie isch also aus dene geheime Quelle de NSA erfahrn hab, hat also der Doc.M-W nach der Bayernpleite von Porto un dem ganze Rummgeschenn übber sei Behandlungsmethode, an sein Verwande gewand un um Hilfe gebede. Was sisch halt aagebode hat weil de Baba Doc. halt en rischdische Voodoo Dokder is. Nachdem dann de Bembelzwersch übber die NSA beim FBI-Compuder in Langley geland is, hab isch die Telefonnummer von dem Voodoo-Doc rausgefunne, un hab den agerufe wesche em Exklusiv Interview fer die Incorporated Bembelpress. Un, was soll isch saache, er hat zugestimmt. Allerdings nur unner der Bedingung das isch allaa komm un er net in erschend e Kammera gugge muß. Der will halt Annonym bleiwe. Kam mer bei seim Job ja ach verstehe denk isch. Also nix wie am Waldstadion vorbeigesaust un ab in de Fliescher nach Jamaika. Des war halt wesche dem Dabbische Nachtfluchverbot ganz schee eng mit de Zeit. Abber uff so ner wischdisch Uffklärungsmission läßt sisch de Zwersch halt net bremse.

Uffem Flughafen dann in Jamaika, hat misch so en zwielischdische Rastamann im Cadilliac abgeholt und in erschend so ner Hanfplantasch vor ner vergammlt Strohütt abgesetzt. De Bembelzwersch, unerschrocke wie er als Investigativer Hobbyschornalist halt ma is, rinn in die Hütt, in ders halt Butzdungel war. Da hat der dann gesesse, der Baba Doc. Am Feuersche des der mit seine naggische Händ abgedunkelt hat, in dem der sei Finger halt direkt übber die Flamme gehalde hat. Da wurds aach dem Zwersch e bissje blümmerant zu mud. Des hat sisch dann abber widder ganz schnell geleschd als der denn agefange hat zu babbele. Der Baba Doc hat e Stimm, da werd jedem Mädsche es Hösje feuscht, der hört sisch nämlisch so a wie der dicke dunkle Sänger da mit dem  helle Name. Also wie der Berry Withe. Nach dem üblische Begrüßungsblabla sin meer dann aach gleisch zur Sach gekomme. Hie also jetzt des Exklusiv Interview mit Baba Doc zur Bayernpleite.

  • Bembelzwersch: Horsch e ma Doc, wie isch des so seh hast du bei den Bayernpleite gesche Dortmund ganz schee dei Finger im Spiel gehabt.
  •  Baba Doc : So kann mer des net saache Zwersch, bei unser  aam kimmts net so uff die Finger sondern mehr so uff die rischdische Rezepte a. Wenn de zum Beispiel so en Schiri fer Sekunde blindmache wilst, mußte halt den rischdische Frosch habbe dem de dann schon Stunde vorher Hühnerblut in die Aache dröbbele. Da eischned sisch besonner Blut von em Wiesehofhinkel.
  • Bembelzwersch: Un wie haste des mit dem Timing gemacht?
  • Baba Doc : Tja, des kann isch dir abber jetzt garnet verrade weil da halt noch e paar höhere Mäschde mit gespielt habbe. Des sollt übbrischens dem Rummenigge zu denge gebbe. zu de Gödder gehört der noch net, aach wenn der des immer maant.
  • Bembelzwersch: War des in euerm Plan des der Holländer sich widder was abreißt un der Lewandingsda sich derart die Bern am Tormann arennt?
  • Baba Doc : Isch sachs doch, ihr sollt net die Götter verspotte net ma die Bayern derfe des. Es gibt nämlisch nur aan Fußballgott, un der haast AM14FG. Wer sisch mit dem aalescht hat schleschde Karte.
  • Bembelzwersch: Des haast also, de Meier werd Torschützekönisch?
  • Baba Doc : Wer sonst, odder muß isch noch a paar Nadele steche ?
  • Bembelzwersch: Noch zwaa Frache hab isch. Isch muß dann gleisch widder los, mein Fliescher wart net uff misch. Also Baba Doc, wie haste des mit dem Ausrutscher bei dene Elfer hie bekomme?
  • Baba Doc : Also ganz ehrlisch, des war isch net. Des hat de Doc M.W. ganz allaa hiegebracht. Der hat sich nämlich als Greenkeeper verkleid und hat Schmierseif uff de Alauf vorm Elfmederpunkt geschmiert. Des Glitschische sinn die überkandidelde Bayern halt net gewohnt, ausser vielleischd de Franzos, aber der hat ja net kicke derfe.
  • Bembelzwersch : Noch aans, jetzt hat sisch ja dein Verwande, de Doc.M.W geräschd. Is des jetzt genuch odder könne mer da noch mehr erwadde?
  • Baba Doc : Nie sollst du misch befraache! Last eusch übberasche, die Saison dauert ja noch e bissje.
  • Bembelzwersch: Isch bedank misch fer des Gespräsch, Baba Doc.

Anmerkung des Schreiberlings : Zum bessere Verständniss wurd des Interview ins Hessische übersetzt.

So ihr Leut, jetzt wißt ihr was de Bembelzwersch alles fer Mühe un Koste uff sisch nimmt damit ihr immer uffem Laufende seit.

Mir gugge übber de Tellerand enaus!

Bis dann ihr Leut °

Ihne ihrn Bembelzwersch

Machs guud Euroba !


Morsche Leut,

erst ma en Satz in eischener Sach. Fall ihr heut Moin beim Bembelzwersch nach was neuem gugge wollt und net druff kaamt, kaa Panik. Dorsch Administratives Abbeide war die Seit kurzzeitisch net im Netz. De Bembelzwersch hat jetzt nämlisch aach e Bilderseit im Blog. Jetzt gehts widder ! Schuldischung.

Vielleischd habt ihr jetzt gedacht de Zwersch hat en dicke Hals un schreibt heut nix. Voll deneber. Isch bin zwar übberhaupt net zufridde mit dem grauslische gekicke von gestern, abber des is kaan Grund sich ins Schmollecksche zu hocke unn zu flenne. Des überlass isch dene Annern bei der Rundschau. Die habbe heut Moin schon widder mit dem Fred Feuerstein seiner Keul uff die Bube eigeschlache. Da habbe sisch der mit dem Dorschtische Name und de Kilschenstein widder ma rischdisch ausgekotzt.Dem Zwersch is des egal.

Was mir vielmehr uff de Näschel brennt, is das mer ja net unbedingt e Feuerwek an teschnische Leckerbisse von de Mannschaft erwarte konnt. Klar bei dene Ausfäll wer des e bissje zu blauäugisch gewese. Schad nur, das die, die endlisch die Chance hatte sisch zu zeische anscheinds schon im Urlaub sinn, odder im Kopp schon wo anners spiele. Mir stecke da halt aach net drin, was da so im Team und mit dem Trainerstab so vor sich geht. Die Pia jedenfalls, hat gestern deudlisch gezeischt warum die nächst Jahr net mer bei uns kickt. So einischermasen hat der Carlos und de Iggy hinne ja gespielt. Abber der Schändler war en eschde Todalausfall, genau so wie mer des ja von ihm kenne. Net schlimm Bub, du kannst des halt net besser. Fern Klinsi reischds ja immer noch. Un das de Madlung halt e gut Stellungsspiel hat, abber net schneller renne kann wie mei Omma, is ja aach nix neues. Des habbe mer ja aach schon öfter gesehe. Mer habbe zwar zwaa Torn gefange, abber die Abwehr hat des Spiel eischendlisch net verlorn. Bendenklisch is halt wenn de nur aamal uffs Tor schießt, unn ansosnste mer sisch de Ball vom Fuß klaue läßt, wenn de alla uffenTorman zurennst. Des is e klaa bissje wenisch. De Hase „B“ war reschd ordentlisch unnerwechs, und de Kittel hat sich fast de Herzbennel abgrennt. Abber erschndwie hab isch da noch aan im Middelfeld vermisst. Hmmm, ach so ja , de Medo hat ja laut Uffstellung aach uffem Platz geschdanne. Komisch wär mir net uffgefalle, wenn isch net nachgelese hät.So jetzt habbe mer alle Mannschaftsteile dorsch. Mehr gabs ja net. Offensive hatte mer kaa, ausser dene die ihr Weißes Hemdsche net dorschschwitze wollde . Die zähle ja net, weil die ja net werklisch mitgespielt habbe.

Abber gud, is ja aach net weider schlimm, unsern Fußballlehrer waas ja was er mäscht, denk isch. Un ma ehrlisch so viel Aldernadive hat er ja net uff de Bank gehabt. Weil die Kampffeder aus Nippon hat gezeischd warum der uff de Bank gesesse hat, und de Flummi is ja sowieso Persona non Grata, odder wie des haast.

Ach, den Elfer hätt isch ja fast vergesse. Also dem Sony kann isch da kaan Vorwurf mache. Der hat sisch ja weggedreht und vorher de Ball ach noch an de Kopp gekrischt. Pfeiffe kann mer des nadürlisch, aber hädde hät mer net müsse. Übber Schiedsrischder werd de Zwersch dann ma was in de Sommerpause schreibe, mer woll ja aach im Sommer unsern Spaß habbe.

Also Bube, Mund abbuzze, und weider geht`s in Fischkopptown bei de Wieshofhinkel. Da muß was gehn. Wenn schon net Euroba dann wenischtens Platz neun, von wesche de Fernsehgelder.

So ihr Leut des solls für heut ma gewese sei. Bis demnächst ma widder …..

Ihne Ihrn Bembelzwersch

Was issen jetzt los ??


Morsche Leut,

es is ja mäschdisch was los in de Bundeslischa. Das mer beim HSV schon widder en neuen Übungsleider hat, wunnerd ja eischendlisch net. Die Wechsele ja öfter, als de große Geldgebber die Obberhemde. Schee is ja das jetzt en Hesse, also de Bruno Labbeduddel, dem Dino es letzte Geleit in die zwaat Liga gebbe dut. Wenn der länger als sechs Woche bleibe derf. Wann die ehemalische Trainer von dene ma e Klassetreffe mache wolle, müsse die die Festhall miede, sonst habbe die garnet alle Platz.

Net werklisch gewunnert hat den Zwersche ja, das de Lautsprescher aussem Ruhrpott, de Biene Maja de Bendel vor die Fies schmeißt. So werklisch uffreschend war des ja net mehr was die da zusamme gekickt habbe. Un mer waas ja , je mehr von Treue und festhalte, von es gibt kaan Grund un vollstes Vertraue gebabbelt werd, je schnelle is en Fußballlehrer weg vom Fenster. Aach wann der jetzt selber geht. Was jetzt nadierlisch blöd gelaafe is fer die Trainerverschleißmaschin unn ihrn Geldscheißer, is das jetzt wahrscheinlisch de Psychopat der ma die Mennzer unner seiner Fuchtel gehabt hat, also der Tuchel, das der wahrscheinlich doch lieber zu de Maja geht als sich uff den Schleudersitz mit Abschußgarantie bei de Fischköpp zu setzte. Ob des jetzt Charakter is odder ob die Ratt des sinkende Schiff verlasse hat, da is sisch de Bembelzwersch noch net klar drübber. Jedenfalls, es läuft !

Abber so rischdisch en heiße Zwerscheboogie hab isch gedanzt, als isch gelese hab das de Doctor Feelgood, dene Orks de Pillekoffer uff die Fies geschmisse hat. Des is de Hammer. De Schwarm alles Spielerfraue un sonstische Frisöse hat so dicke Eier in de Hos, das der de best Vereinsführung der Welt mit samt dem glatzköppische Messias des Fußballs de Stinkefinger zeischt. Wahrscheinlisch is dem Quoteossi un dem Uhrnschmuggler der Art de Blutdruck hochgeschoße das der e C-Rohr zum platze gebracht hät. Kann mer ja aach verstehe gell? Wie kann der Doktor des aach wache, Spieler net gesund zu spritze, wann de Super Pep die braucht. Um was anners kanns ja net gehe. Odder wie erklärt ihr eusch des das die Medizinisch Abdeiling an aaner Niederlach schuld sei kann? Ma ehrlisch, wenn die Medizinisch Abteilung schuld is, kann des doch nur haase das die Spieler, diewo sisch verletzt habbe net schnell genuch widder fit gespritzt worn sinn. Das det also bedeude das mer bei de Orks kaa Rücksischd uff die Gesundheit un de Körper von de Spieler nimmt. Un des find de Bembelzwersch ziemlisch pervers. Das Abbeidgeber net unbedingt pfleschlisch mit ihre Aagestellte umgehe wisse mer ja, abber wenn des bei de Orks werklisch so läuft, denn hat de Tolkin reschd gehabt. Dann sinn Orks des abardischsde was so rumläuft.  Da zeischt sich doch widder ma das mer bei dene da unne in ner ganz annern Welt lebt. Jetzt is des ja net so das de Dr. Feelgood kaa Ahnung hät von dem was der da mäscht. Sosnt det der Jogi den ja net als Nationaldokder behalde. Abber anscheinds habbe die Obberorks der Art viel Weisheit mit Löffel gefresse, das die sich mit allem besser auskenne als de Rest der Welt. Aach mit medizinische Sache. Gugge mer ma wie des Bajuwarische Schmierntheader da weiter geht.

Unn jetzt gugge mer noch schnell nach Wolfsborsch!

Lustisch is es da ja noch net. Aber ma rein Hypodedisch, wann jetzt der Obba Porsche sisch dorschsetzt und des Winterkörnsche in de Wind schießt, müsse die Radkappe-Millionarios aach e bissje ziddern. Mer was ja net, ob der eventuelle Nachfolscher aach so viel Geld in die Retorte stecke will. Un wann net, sinn die ganz schnell weg vom Fenster.

Da lob isch mir doch unser Eintracht. Unsern Fußballgott derf sich zu reschd korz vor Schluß obberiern lasse, aach wenns immer noch e bissje um die Eurobaworschd geht. Unsern Fußballlehrer habber mer mit supper Glu an sein Stuhl gebabbt, un de Geldhahn kann uns aach kaan mer odder wenischer dorscgeklnallte Miliadär zudrehe. Jetzt brauche mer nur noch zwaa odder besser drei Siesche die Saison un mer sinn widder glücklisch. Ausser nadirlisch unser Lokalpresse. Die wern weider rummflenne. Abber las die ma mache, die solle ja aach net lebe wie die Hunde. Mer sinn ja großzüschisch un tollerant in Frankfort.

Es Lebe kann doch so schee sei !!

Ihne Ihrn Bembelzwersch

Von Fledermäus un sonstische Tieffliescher


Guude Leut,

escht lustisch was die Woch so im Fußball passiert is. Uff de a Seit Spiele die Bube von de Biene Maja Fleddermaus und Fleddermäusje, ja genau der Obbamejang und es Reusje, der,der net a mal dem Fledermausmann sei Audo fahrn derf weil er ja kaan Führerschein hat. Un uff de anner Seit spiele irschendwelsche Ruhrpott Rambos mit dem Marcel Reif Bierdusche mit anfasse. Schee ! Un dann erzählt der Doseverkäufer un vorzeische Marjonett, der Merknick, ähh Rangnick das die Bleschbüxe mehr Auswärtsfans mit bringe däte als unser Eintracht. Der Bub hat aber de Schalch aach net gehört.

Sin mer ma ehrlisch, dem Reif sei Gebabbel, egal ob wärend em Spiel odder denach is ja eischendlisch net auszuhalte. Dem Oberlaberkopp vom Skysender und gleichzeidische Obereierkrauler vom Steuer-Uli sollt mer werklisch jedes Microfon um die Ohrn haue. Aber liebe Ruhrpott-Rambos, des mäscht mer abber net. Weder mit Bier dusche,( trinkt des lieber selber, is doch deuer genuch) noch mit em Microfon haue, die sinn aach deuer. Abber ma im Ersnt, Leut wenn ihr so en scheiß baut, dann is des doch nur Wasser uff de Mühl von den arrogante Business Fuzzis die uns aafache Leut ihrn Fußball wegnemme wolle. Sogar der edle Spieschel, des bildzeitungsartisch geklonte Bildungsbürscherblatt hat sich verschderlisch übber eusch uffgereschd. Weil ihr habt nämlisch so en sogenannte Schornalist agegriffe. Stimmt ja aach, erschendwie. Also lasst den Scheiß in Zukunft des isses net wert. Der Reif, also der der aussieht wie der impotente Bruder vom Gunther Sachs, der is es schon gar net e amal wert. Die ganze Fußballkommentatorn sinn eifach nur noch peinlisch, ausser vielleicht de F.v.TUT, übber den kann mer wenigstens noch lache. Un, liebe Rambos aussem Ruhrpott, dene ihr Dummgebabbel nimmt eh kaaner ernst.

Was anners is des ja da mit dem Klopp. Ja, genau mit dem der mit seiner gelb Kapp an de Ausselinie immer aussieht wie de Postbode der 3 ma geklingelt hat und die lüstern Hausfrau hat net uff gemacht. Also der Klopp, fand des ja witzisch mit dem Fledermausding da von dem Obbamejang, un nadierlisch aach von dem Kindskopp Reuss. Mhh, also euern Zwersch fand des nur peinlisch, so ungefähr uff Kinnergade Niveau. Ma ganz ehrlisch, wie det des dann ausssehe wenn beim nächste Mainzer Tor, der Okasatziki wie de schlaue Det übber de Platz hibbe det?? Oder de nächste Stuttgarter Torschütze mit em Bauerbeiterhelm uffem Kopp afängt der Rase uffzubuddele weil er Bahnhof spiele will? Ei wo käme mer da denn hie? Odder der Belschjer sacht net mehr Motherfucker zu de Leut sondern rennt torjubelnd übbern Platz uns kreischt „Ich bin e Radkapp“  Ne Leut erschendwo is abber gut. Also Leut, lasst den Karneval die Klatschpappe uff de Meenzer Tribune mache, unn benemmt eusch widder wie Erwachsene. Aach bei de Biene Maja.

Was ganz anners is des ja mit dem Dosevertreter aus Leipzisch. Also ma gleisch gesacht, de Zwersch hat nix gesche die Leipzischer, also nix wirksames. (Witz) ! Isch kann die Leut ja verstehe, die habbe ja nix anneres zum Fußball gugge als die 3. und 4. Lischa. Also müsse se halt zu dene Schluchtescheißer finanziert Plastikkicker gehe. Aber wenn der Dummbatz von Menätscher mahnt das der Plasticclub aach nur aan Gästeblock in de Bundeslischa voll mache kann hat der sich abber mäschdisch getäuscht. Der Brauspantscher aus dem sprachlische Notstandsgebiet südlisch von de Steuerhinnerzieher, werd net ewisch de Fans die Auswärtsfahrte bezahle. Der net. Also det der ganz gut dra net so goße Tön zu spucke, des könnt ihm alles ma mäschtisch uff die eischene Fies falle.

So, jetzt hat sich de Zwersch widder mal genuch ausgetobt. Der werd sich jetzt geistisch un, wie säscht mer neudeutsch, äh mental uff des Spiel gesche die Ziescheschänder am Sonndach vorbereide. Mer wolle ja schließlisch 3 Punkte mit nemme! Bis da hie basst uff Eusch uff un macht kaan Scheiß,

Ihne Ihrn Bembelzwersch.