So, jetzt habbe mer die Kacke anhänge. De Kovac zeischt uns de Stinkefinger und geht zu de Bauern. So weit, so schlecht. Un bevor jetzt alle Wirtschaftliberalfanatiker los heule,“so is des Geschäft heut“ , ich hab ja nix gesche en Wechsel von em Trainer.
Nur Leut, mit Aastand und Charakter des Schauspiel Gestern nix mehr zu due. Zum Aane, die Meldung so klammheimlisch un hinnerfotzisch übber die Sportbild zu verbreide bevor noch de Vorstand von de Eintracht informiert worn is zeuscht, von de dreggische Absischte von de Uhrnschmuggler und Verurteilde Steuerhinnerzieher. Abber wer mit Qatar Millionedeals meschd is ebe Moralisch total verkomme. Normalerweise babbelt mer doch vorher mitennanner bevor mer sowas an die Presse gibt. Zum annern sitzt der Kerl noch letzt Woch in de Pressekonferenz un dud so ganz Scheinheilisch als würd nix im Hinnergrund laufe. Kerle, Kovac ! Wenn de werklisch de Adler im Herze trache würdst, det isch dir des Herz jetzt rausreiße….
Wenn mer so mal es bissje nachdenkt krischd mer doch die Kränk. Wer läßt sisch dann als vollkommener Neuling von dem kaaner waas ob der den Job übberhaupt uff die Roll krischt, e Ausstieschsklausel fer die Bauern in de Vertach schreibe. Des rieschd doch schon nach ner linke Nummer. Dann labert der sei Spieler zu von wesche Charakter, Vertrachstreue un was de Deubel was.. und dann mäschd der hinner em Rücke von Alle klammheimlisch sei Ding. Wenn des also so alles stimmt was mer bis jetzt so gehört hat is de angeblische Integre Saubermann Kovac genau so Verkomme wie die Bauernführung.
Isch hoff nur das die Mannschaft mehr Charakter hat als de Trainer. Eischendlisch kanns nur aans gebbe : Jetzt erst reschd ! Euroba geht aach ohne Kovac !
Ihne Ihrn Bembelzwersch
Adlergebabbel 