Wiesehof des is bekannt, züschdet Hinkel fer unser ganzes Land !
Un net von ungefähr wern die Hinkel nur gerupft verkaaft. Hat mer ja gestern in de 90 Minud gesehe, als unsern 18 jährische Nordweststadt Hero, dene Giggel die letzte Schwanzfeder mit seim Schlenzer ins Eck ausgeropt hat. Also entwedder unser Kovac‘ Konsortium hat en besonnere Voodoozauber entdeckt odder sie habbe werklisch Ahnung vom Fußball und den Zweibeinische Primelscher die mer allgemein Profikicker nennt. Die habbe es uff jedenfall geschafft das sisch bei unserner Eintracht kaaner mer zu vornehm is ach e mal dreckisch Abwehrabbeid zu mache. Und wenn de Herr Ozzy des mal schaffe könnt sein Sekundeschlaf abzuschalde, hätte mer womöglisch aach Gestern widder zu Null gewonne. Mer kann halt net alles habbe. Es wär ja aach garnet auszudenke wo mer stehe würde, wenn de Ozzy un de Schändler aach noch gescheide Flanke uff de Mann schlache könnte. Des wär so de Dubbe uffme i .
Uff de anner Seit bei de Hinkel mit Fischköpp hat dann doch de ahne odder anner sei Grenze mal widder uffgezeicht bekomme. De Gnarby, also der blonde Wischmob mußt eisehe das die Eintracht kaan Europäische Zwerschestaat is. Der hat sich de halb UNO geschübber gesehe un sisch die Beisersche dra ruiniert. Vor allem unser Biblisches Duo, Jesus und Vadder Abraham, habbe ihm gezeischt was Ambach is. Wo mer grad bei Biblisch sinn, des alter vom Pizzabode is ja fer so en Kicker aach biblisch. Ob mer werklisch so en Mann nach so langer Verletzung so lang uffem Platz lasse muß? Kann mer drübber streite, abber im grund genomme hat er ja nix anneres zustande gebracht als schee zu falle wenn de Ball in de Näh war. Un von der seltsam bemalde Litfassäul Kruse hat mer mal garnix gesehe ausser Tattoos. Dafür hat dann de Stern von unserm Fußballgott um so heller gestrahlt. Wie der des 1:1 da am Wiedwald vorbei gelescht hat war schon extraklasse . So könne mer des weider mache Herr Kovac‘.
E ganz anner Frach hätt isch da mal an Schiedsrischder Kommision. Wie kommt ihr eischendlisch dezu en Meenzer e Spiel von de Eintracht pfeiffe zu lasse. Odder lasst ihr en Dortmunder Schalkespiele pfeiffe ? NE ! Siehste. Wenn mer da net grad Absischt unnerstelle will, muß mer abber von ziemlischer Dummheit ausgehe. Net das isch dem Herrn Trubbedoktor parteiisches Pfeiffe unnerstell, aber so ganz gleich hat der halt doch net alle Fouls bewertet. Gewisse Antipathie muß mer ja so em Pfeiffekopp zugestehe. Würd mir ja aach net anners gehe. Abber dann sollde die bei ihre Schiedsrischder Zuteilunge doch e bissje sensibler sei.
So, un jetzt warte mer all gespannt uff de Samsdaach, wo unsern Adler zum Bienefresser werd.
Bis dann also Ihr Leut,
Euern Bembelzwerwsch
Adlergebabbel 