Spieldaachsbemebl gesche die Hertha

Gestern hatte mer Besusch im Waldstadion. Die alt Gassenutte Hertha war da. Kerle was hat misch des widder Nerve gekost.

Die allgemeine Kovac Hysterie, de angeblisch ach so geniale Nobic un die erste Eurobaträumer. All des geht mer mäschdisch uff de Senkel. Leut halt mal die Füß still. Ma ganz ehrlisch, da werd übbe die neue Eintracht parliert als hätt de Kolumbus es Ei neu erfunne un kaaner will gesehe habbe was isch Gestern gesehe hab. Das nämlisch nach de Pause Zeitweise genau die selb alt Eintracht uffem Platz gestanne hat, die uns letzt Saison fast in de Wahnsinn getribbe hat. De gleiche Schlendrian, kaaner haut mal dezwische wenn de Geschner sisch die Bäll zuschiebt, alle gugge zu und dabbele Alibimäßisch hie un her, bis dann e Loch uff geht und mir uns widder e mal e völlisch unnödisch Geschetor eifange. Alles wie gehabt. Ja isch waas, es war ja nur e vertel Stund so ! Klar, abber des hat halt gereischd um mal widder en möschlische Siesch zu vergeische. Wenischsdens sinn se dann noch mal uffgewacht un habbe de alt Schlampe aus Berlin noch en Punkt abgetrotzt.

Was isch misch des ganze Spiel übber gefracht hab is, was alles möschlisch wäre wenn unser sogenannte Ausseverteidischer Flanke schlaache könnte die aach beim Mann un net beim Geschner odder in de Wallachei lande. Un wenn dann de Herr Ozzy mal in de näh von seim Geschespieler wär, anstatt sinnlos im Mittelfeld rumzufalle könnte mer e paar Törsche wenischer fange.

Ach wenn des ordentlisch aussieht, 10 Punkte nach 5 Spiele. En Grund um zufiede zu sei is des net.  Un dann schwebt ja immer noch des Schwert von dem alde Griesche übber uns, das nämlisch die Leasingspieler die e gut Saison gespielt habbe am End widder fort sinn un mir e halb Mannschaft zsamme suche müsse.

De Bembelzwersch bleibt debei, de Nobic is net de rischdische fer unserne Eintracht.

Bis dann also,

Ihne Ihrn Bembelzwersche

Werbung