Fakt is, de Bembelzwersch is als Frankforter en verfeschter von Multikulti und von klaa uff gewohnt mit alle möschlisch Leut aus aller Welt zureschd zu komme. Abber so langsam frach isch misch trotzdem was dem Boboic-Kovac-Hübnerovic Trio da im Hern fern Forz quer sitzt. net nur das es langsam eng werd um die Statute zu erfülle, nach dene ja mindestens 12 deutsche un selbst ausgebildete Kicker in de Mannschaft sei müsse. Des werd nämlisch ganz schee knapp mittlerweile. Na, aach des ganze ausgeleihe seh isch doch als e bissje Fraachwürdisch aa. Klar is es Geld knapp bei uns, abber werklisch Leut, Vier habt ihr schon aussgeliehe und jetzt soll noch der Parguayaner aus Manchster komme. Wen mer ja wenischstens demit reschne könnt das mer die unner Umständ behalte könnt. Abber des könne mer uns abschmincke, entweder gebbe die Stammvereine die net her, odder sie sinn zu teuer. Un wenn dann tatsäschlich aaner von dene Bube eischlache sollt is er weg wie nix un mir gugge in die Röhr. Ei stellt eusch des e mal vor, die Eintracht spielt mit dem zusammegeliehene Personal e rischdisch gut Saison und dann ? Die Leihkicker sinn fort, weil de Stammverein die jetzt habbe will, odder en annere mit rischdisch Kohle dud se bei ihrm Besitzer loseise. Die habbe dann Spieler die sisch gut entwickelt habbe bei uns, un mir gugge in die Röhr!
Net das isch ebbes gesche e gescheit Leihgeschäft hab, abber mer sollts net übbertreibe, sosnst geht der Schuß ganz schnell nach hinne los. Un isch befürscht das es schon jetzt es bissje viel des guden is.
Euern skeptische Bembelzwersch
Adlergebabbel 