Morsche !
Fast Endspiel im Wald ! Spiel, Spaß, Spannung, des wüncht sisch ja der geneischde Eintracht Fan. Abber eischendlisch net um de Abstiesch. Eher so in de obbere Reschione von de Tabelle. Sollt hald die Saison net sei. Um so mehr wunnert sisch de Bembelzwersch das zu so em Spiel wie Heut, grad mal e bisssje was übber Verzisch Tausend in Stadion komme. Normal müßt die Hütt doch ausverkaaft sei. Odder zeischd sisch jetzt das doch die letzte paar Jahrn viel zu viele Evnetis im Stadion warn?
Egal, Heut gilts. De Schaafsherde aus Hangover muß der Art de Wind ins Gesischt blase, das die gar net erst uff die die Idee komme sisch gesche ihrn Unnergang zu wehrn. Brenne muß es im Wald ! Net die Bäum, un kaa Pyros! Brenne muße es vor Leidenschaft un vorm Wille aus dem Sumpf da unner raus zukomme! Brenne muß die Manschaft, brenne müße die Fans ! Wie aan Mann, gesche es Abstieschsgespenst.
Also, wenn eusch an de Eintracht was lieschd, un ihr noch kaa Kart habt, runer vom Sofa un in de Wald getischerd. Es gibt noch genuch Karte.
Forza SGE ! Einmal Adler, immer Adler
Adlergebabbel 