Ei wie die Zeit vergeht……

Da hat mich doch de WordPressbot eiskalt erwischt. Gratuliert hat er mir heut Morsche. Mir wärs gar net uffgefalle, abber de Große Bruder passt ja übberall uff uns uff.

Heut uff de Daach genau hat es Adlergebabbel Einjährisches . Kinner wie die Zeit rennt. Immierhie 134 Beiträsch habbe mer veröffentlischt, und 3717 Leut habbe den Unsinn gelese den mer verzappt habbe.  Gar net so schlechd find isch fer en Blog der fer viele in ner Fremdsprache geschribbe is. Zumal ja jede Menge Ausserhessische unner des Leser sinn.

Leut, lasst mich Danke saache, isch hoff ihr habt beim lese weiterhin Euern Spaß und Ihr find immer mal was Intressandes uff dem Adlergebabbel.

Uff die nächste lustisch-uffreschende Jahrn mit dem Bembelzwerch un de Eintracht.

 

                                                                #PFUMP

Ihne Ihrn Bembelzwersch

 

 

Werbung

Spieltagsbembel gesche die #DFB Mafia

Guude Leut,

ihr denkt eusch jetzt „mir habbe doch gesche die Schwabesäck gekickt“. Rischdisch! Doch de größte Geschner uffem Plat war der von de Mafia geschickt blaue Giftzwersch mit de Pfeiff im Schnabbel. Zwaa net gegebbene Elfmeder, en in Hotelhalle pinkelnde Pizzabode der net vom Platz gestellt werd un e rot Kart gesche de Carlos wesche ungebührlischem Benemme. Der hat nämlisch de Körperkontakt zu so em Schwabeblitz gesucht. E sauber Bilanz hat er da hiegeleschd, der Herr Zippel.

Da trifft mer sisch freudisch erreschd im Headquater, dabbelt zur S-Bahn trifft sisch mit de Elite von EFC-Kalsarikännit im Zaphahn, un dann sowas. Es hat so schee agefange. Vom Zaphahn in die S-Bahn un als mer am Sportfeld ausgestiche sinn haste gemahnt de Frühling is ausgebroche. De Planet hat geleuschd un mer hät fast in Hemdsärmel gehe könne. Am Gleisdreieck habbe mer noch e paar Sonnescheinscher aussem Twitter getroffe un de Schoppe hat aach gut geschmeckt. Sogar die mudisch Uffstellng vom Armin hat ja ziemlisch gut funktioniert. Un dann kimmt da so en Hammel mit ner Pfeiff zwische de Kiefer her und dud aam die ganz gut Laune wegflöte. Net das mer jetzt saache könnt das die Bahnhofsvergräber schleschd gekickt hätte, abber unsere Bube warn mal mindestens gleischwerdisch. Gut gefalle hat mer der Regäsel. Endlisch mal en Rechtsverteidischer der den Name verdient, aach wenn er noch den aane odder annere Fehler gemacht hat. Der Bub hat Zukunft bei uns. Aach der aus Herne West mit dem Yogurt Name, der Ayhan hat sei Sach gut gemacht nebe dem Carlos. Was nadierlisch die Sach noch schlimmer mäschd, weil die gleisch mal gezeischd gekrischd habbe das mer bei de Eintracht gesche 11 Mann un 3  Playmobil Figürscher die Macht habbe spiele musst.

Also dann, am Samsdaach uff ein Neues, da gehts zu de Zieschepissetrinker nach Köln, da wo des Stadtarchiv im U-Banhtunnel lieschd un die Kersch so dreckisch wie groß is.

Isch sach nur Auswärtssiesch !

Ihne Ihrn Bembelzwersch

Bembels tönende Wochenschau 2/2016

Guude Leut,

da hat die Woch ja mit ner klaane Überraschung agefange. Unsern Fuchs, de Bruno hat rumgepokert un uns all veräbbelt. Von wesche mer sinn ferdisch mit de Transfers. Nix da. Zwaa neue hat er geholt, quasi dorsch de Lieferante Eigang. So abgelutscht is der. Ma gugge was bei dene Neue rauskimmt. Den Ben Hatira kennt mer ja schon. Wenn der mal net verletzt is kann der aach ganz gut kicke un links vorne kann der. Der annere soll ja so en Perspektivspieler sei, der Junge. Yanni Regäsel haast der. Komisch, was die da fer Name habbe in dem Weltdorf. Abber egal, Hauptsach der werd unser Verteidischung hinne reschds dischd mache. Des Trauerspiel kann mer sisch ja net mer mit agugge. Un den Schändler due mer eipacke un nach Ameriga schicke, vieleischd kann ja de Oka was middem aafange.

Un kaum mäschste mal die Aache zu kimmt schon widder die Skandalmeldng. Den Ben Atari hat sisch mit dem halb Ami Weiser im Bus gekloptt. Kann schon sei, vielleischd hat de Mc Weiser zum halb Arabische Atari gesacht das der nach Quantanamo gehört, und der hat dann dem MC Weiser aan eigeschenkt odder so. Mer waas es ja net, weil die vorne im Bus nix mitgekrischd habbe. Tante Hertha halt. Also Leut, übber sowas sollde mir uns garnet uffresche. So lang der sisch bei uns ordentlisch benimmt is des vergesse. Es könnt nadürlisch aach sei das de Bruno der Fuchs dem gesacht hat er soll sisch rauswerfer lasse,erschend wie, un mir teile uns die gespart Ablöse….. Mer waas es net. Davo ma abgesehe, es könnt unserer Mannschaft ja gud dun so en Bad Boy mitte drin zu habbe. das ganze gebilde kimmt ja doch ziemlisch brav daher. Mit so böse Bube is ja die Eintracht immer gut gefahrn. Uli Stein z.B. um nur aan zu nenne.

Na, un de Bundesliga Dino hat widder mal Faxprobleme gehabt. Die scheine ja net nur in de Bundesliga Dinos zu sei. Das nämlsch e Fax aus Bern länger dauaert als, saache mer mal aus Düsseldorf, hätt mer ja wisse müsse. Die Berner sinn halt net die Schnellste. Erschend jemand sollt dene doch mal saache das es modernere Dinger gibt als Faxe. Kaa Wunner das die Dinos ausgestorbe sinn.

Ganz gribbelisch werd de Bembelzwersch ja wenn der an de Samsdaach denkt. Dreckisch werd des Spiel gesche die Schwabesäck ja sowieso, des kenne mer ja. Viel spannender is, was die Fans aussem Verzischer mache die ja net uff ihr Stehplätz derfe. Es is stark azuunemme das es statt Choreo, die ja die alte Säck verbode habbe, e ziemlisch laude akkustische Danksagung an die Mafiosi aus de Otto-Fleck-Schneiße gebbe werd. Aach wenn die Babbsäck vom DFB sisch noch so astrenge, die Fantasie und den Enthusiasmus von uns Eintracht Fans könne die net unnerkrische. Es sinn ja in de Ostkorv zwaa Blöck fer die aussem 40 reserviert. Es is also mit em kräfdische Wechselgesang zu reschne. Da sollte sisch die Eventies un die Meckerrentner mal ordentlisch beteilische. Sonst sinn die des net wert e Eintrittskart fer unser Stadion zu krieje.

Also wrate mer jetzt uff de Heimsisesch am Samsdaach, was anneres kimmt ja gar net in Fraach. Die Schwabesäckel müss hinner uns bleibe.

Forza SGE, Fuck DFB !

Euern Bembelzwersch

Spieltagsbembel: In de Puppekist

Guude Leut,

manschmal muß mer halt in de saure Abbel beiße un muss Schaffe anstatt de Eintracht beim Kicke zu zugugge. Des is des, des mer übberhaut net gebrauche kann. Also was am Samsdaach so das der Daach fer de Bembelzwersch gegesse war. Zum Glück gibts ja mittlerweile noch was anneres als Mittelwelle Radion. Also die neumodische elektronisch Babbelmaschine, diewo aach Bilder dorsch die Luft schicke können. So is mer wenischdens net ganz von de Welt abgeschnidde.

Aach wenns jetzt net zum Auswärtssiesch gereischd hat, sollde mer doch sehe das unserne Adler schon lang nemmer Auswärts so stark uffgedrede sinn. Hoff mer mal das des so ahält und sisch unser Team stabilisiert hat. Weider kann un will ich aach heut net übber des Spiel saache, es gibt ja genuch Schreibe bei de Zeidunge die debei warn und des aach ordentlisch uffgeschribbe habbe was da passiert is.

Was mer guud gefalle hat war die Luftballon Aktion. Da drübber habbe die Mediale Beobachter ja mal garnix geschribbe, so das isch am Sonndaach erst mal suche musst um was es eischendlisch ging, als die Meldung kam das „Sky-Sport“ bersischded das de DFB ermittlunge wesche Verstoß gegen die Bewährungsauflagen  uffgenomme hät. Wie sisch des schon ahört. Als hätt en Schwerstverbrescher sei Fußfessel abgesäschd! Als isch dann mitgekrischd hab, das des da um e paar uffgeblasene Luftballons geht, konnt isch nur noch de Kopp schüttele. Am Mondaach hat dann ja Sky Sport zurück gerudert und hat gesacht, das es nur drum ging zu saache das Ermittlunge möschlisch sinn. Ei war da widder aaner e bissje voreilisch bei dem Sender der immer noch de Schmiernkaiser beschäftischd ? Odder wollde aaner Stimmung gesche uns mache. Zu zutraue wär des dene ja. Es lieschd ja net im Interesse von so em Bezahlsender das die Leut ins Stadion gehe, anstatt ihr teuer Geld fer e Abo von dene uff de Disch lesche. Stadion Atmo könnt mer ja zur not als Playback in die Übebrtrachung eispiele. Na jedenfalls hat sisch des ja als ausgewachsen Ente entpuppt. Obwohl isch ja dene in de Otto-Fleck-Schneiße alles zutraue. Isch hab misch dann gefraacht ob des Schal hochhalde beim singe vom Eintrachtlied im Stadion von dene Hannbambel aach als Choreo agesehe werd. Könnt ja sei. Uff jedenfall bin isch gespannt wie des am Samsdaach im Stadion werd fesche die Schwabesäckel. De stehblock is zwar leer, abber deswesche bleibe ja die Leut net deham. Die wern schon ihrn Block gekapert habbe. Isch denk mal mer wern des aane odder annere kritische Liedscher an de DFB zu hörn bekomme.

 

Isch freu misch druff !

De Bembelzwersch