Spieltagsbembel gesche die Abgassünder

Da war se widder, die Diva ! E Halbzeit zum net hiegugge, die anner mit de Breschstang. Als altgedienter Eintracht Fan is mer ja gestählt un steckt so e Uffreschung weg. Abber fer Fans die noch net so lang unsrene Adler die Stang halte war des schon e Belastungsprob. Solsche Spiele trache halt viel zum Mythos Eintracht Frankfort bei. Da zeischd sisch dann, das trotz, odder grad wesche dem gellende Pfeiffkonzert zur Halbzeit, die Fans hinner ihrer Mannschaft stehe, aach wenn se dene mal im übertrachene Sinn in de Hinnern trete. Un geholfe hats ja. Als mer gemerkt hat das die Bube jetzt doch mitspiele wolle, hats Publikum widder wie aan Mann hinner dene gestanne. Logisch hat sisch die Eintracht da am Sonndaach net mit Ruhm bekleckert. Abber 3 Punkte sinn 3 Punkte. Am End fraacht kaaner mehr wo die her kame. Das dann die Radkappe es bissje beleidischd warn, von wesche ihrer Niederlaach kann mer ja verstehe. Die habbe ebe kaan Fußballgott! Nur en Bäcker Geselle habbe se. Den dun die abber nur manschmal eiwechsele. Bei uns hätt der ja immer spiele könne, un wahrscheinlisch wär der dann aach schon beim Jogi. Nur werd des nix mit dem Jogi, wenn de bei solschene Retorte Haufe uff de Bank hockst. Un weil der ja mahnt er will sisch bei der Thomat, dem Hecking dorschsetze, hat er dann ja aach sein Fett weggekrischt und ordentlisch Pfiffe geerntet.

Pfiffe gabs aach fer de Armin. Warum waas isch jetzt net so genau, abber die Meckerrentner von de Geschetribün und die Oberschlaumeier aus de NWK wisse ja was se mache. Übberhaupt, de Armin. Jetzt krischd der sei Fett weg weil er den Sefe in de Senkel gestellt hat. Leut, mal ehrlisch. Des war ja aach gestern wenischer als garnix vom Sfe. Kaan Zweikampf gewonne, un wenn er den Ball verlorn hat is er wie ageworzelt stehe geblibbe, als wär des e Freschheit gewese ihm de Ball weg zunemme. Ei so gehts aach net. Das de Armin den rausgenomme hat und defür die mitghy Mexico Mous rei genomme hat war doch mehr als rischdisch. Um die beleidischd Lebberworscht zu spiele hat de Herr Haris halt noch net genuch geleist. Erschendwie hab isch des dumpfe Gefühl, der hat kaa Lust mehr bei uns zu kicke un will fort. Uff die Insel denk isch mer. Abber en Absprung so vorzubereide… isch waas ja net. Isch denk mer wenn die Kohle stimmt, lassen gehe. Mer habbe de Garcinovic odder so, un de Holländer werd ja aach widder gesund. De Waldschmidt is ja aach noch da. Also mach isch mer kaan Kopp wann de Herr Sefe gehe will. Aaner derf uff kaan Fall gehe, unsern AM14FG. Wie oft der Mann uns jetzt schon aus de Scheiße raus geballert hat, geht ja uff kaa Kuhhaut mehr. Angeblisch habbe ja die Chinese mit 6 bis 7 Milliönscher gewunge, wenn de AM14FG wechsele dud. Abber se habben net gelasse. Der hätt im Geschesatz zum Haris en Grund sauer zu sei. Iss er abber net. Da kann isch nur saache,  Hut ab!

Was den Rest von der Truppe ageht… na ja. Wenn mer mal mit aaner Ausseverteidischung spiele würde wär des schon schö. Vom Ozzy hört mer immer nur scheene Sprüsch, mer müsse, mer könne, mer solle, abber passiern dud nix bei ihm. Von rechts hinne wolle mer erst mal gar net babbele. Dafür das mer ohne reschde Verteidischer gespielt habbe ging des Ganze ja noch gut aus, aach weil de Vadder Abraham ordentlisch gespielt hat. Un uff de Finnische Ballfänger könne mer uns ja sowieso hunnerd Prozendisch verlasse. Mit dem Huszti war isch ja eischendlich schon e bissje skeptisch. Mer hätt ja denke könne das der aale Mann noch so sei Gnadenbrot uffem Alteteil verdiene will. Denkste, der hat sisch rischdisch neigehonge ins Spiel. Zusamme mit de Migthy Mous habbe mer da rischdisch Qualität dezu gekrischd. Hoffe mer das die beide so weider mache.

Zur Uffholjachd is geblase, jetzt brauche die Bube nur noch die Punkte hole. Net vergesse, bis zum El-Platz sinns nur noch sibbe Punkte. Und weil mer ja von de Diva vom Maa babele is ja alles möschlisch.

So genuch fer Heut, un Bruno, wenn die von de Insel 10 Milliönscher fer de Haris übberweise dun, isch fahr in persönlisch nübber, wenns sei muß middem Ruderboot.

Bis dann ihr Leut.

Euern Bembelzwersch