Guude Leut,
genau da druff hab isch die ganz Zeit schon gewart. Jetzt bekimmt aach die Eintracht ihr Fett weg, von wesche zu de Scheichs fahrn und Trainingslacher spiele. Zu reschd, wie isch maan. Wenn mer ma ehrlisch sinn, mer kann net uff die Bauern schenne weil se bei de Sklavetreiber aus Kater zu Besusch sinn, un selber nach Abu Dhabi fahrn. Aach wenn da die Köpp net so schnell rolle wie bei dene Saudis un mer net so viel von den nicht Arabische Billischarbbeider hört. Weisekinner sinn die da aach net. Allerdings habbe die Geld, viel Geld un uff des sinn ja net nur die Fußballvereine sondern die Deutsch Wertschaft übberhaupt scharf. Bei de Audos fahrn die ja lieber Ferrari als Mercedes, abber bei ihrne Panzer is ja doch de deutsche Leopard die erste Wahl. Also Leut, wenn mer an de Fußballervereine rum meckert dann muß mer aach an de Industrie un an unsrener Regierung rummeckern, weil die hängt ja am Öltropf von de Herrn Scheichs.
Übber unsern Sony hab ich mich ja gefreut. Endlich kann der widder mit trainiern. Hoffe mer mal das sei Knie jetzt endlich halde. Es wär ja werklisch schad fer den Mann un fer unserne Eintracht wenn der net mer so rischdisch in die Gäng käm. So en Techniker we den find mer halt leider viel zu selten in de Lischa un bei uns sowieso.
Also gugge mer ma weider was da so in de Wüste passiert. Gerüschde wern ja im Moment widder jede Menge dorschs Dorf getribbe, abber des kenne mer ja un da sollt mer, wie immer, erst mal de Ball flach halde. Wie beim Sefe zum Beispiel. Wenn die Rückrunde werklisch gut werd von unsre Adler, dann hat der aach net werklisch en Grund wechseln zu wolle. Abber wie hat schon de Suppekaiser gesacht ? Gugge mer ma ! Wenigstens siehts so aus als das uns de Stender noch länger erhalte bleibt wenn mer dem HR glabe derf. Un des wäre glaab isch des wischtichste.
Also dann, gugge mer mal was so weider passiert…
Euern Bembelzwersch
Adlergebabbel 