Eischendlisch hät es ja jetzt dem Bembel sei Wochenschau gebbe müsse. Abber da ja gestern Abend so kranke Herne in Paris gemanht habbe, sie könnte sisch ihre Jungfraue im Paradies verdiene und unschuldisch Mensche umbringe, is selbst dem Bembelzwersch sei Lästerei im Hals stecke geblibbe.
Es is immer widder Erstaunlisch zu was fer dämlisch Gestalde uff de Welt rumrenne. Mensch die mahne fer irschend e net nachgewiesene Instanz die die Gott nenne anner Mensch umbringe zu müsse. Un die „Besorschte Bürger“ unne annern Rechtsauslescher die jetzt widder behaupte de Islam sei des Wurzel allen Übels, sollte sisch mal übberlesche wann es zum letzte mal Tote in Europa gegebbe hat im Name von irschend aam Christlische Gott. Übrischens warn des annern Christe die die Umgebracht habbe.
Net das irschend jemand mahnt de Bembelzwersch hät irschedwie aach nur e Fünksche sympathie odder Verständniss fer irschdwelsche Terroroste, egal von welsche seit, weil er hier net weiter uff die Hernamputierte eigehnt. Des is, glaab isch net de rischdische Moment. Was mir mehr Sorsche macht im Moment, sind die Rattefänger und des unsäglische Geschmeiß von rechts ausse, dene so en Wahnsinn Wasser uff die Mühl is. Die jenische die nett kapiern das die jetzt mit ihre Ausländer- un Flüchtlingsfeindlische Parole des Süppsche von Terroriste koche. Die genau des mache was die mit dem Terror beabsischdische. Nämlisch unser freie, tolerante Gesellschaft zu zerstörn.
Un ihr Pariser, Franzose un alle annern die Angst habt, es is immer noch wahrscheinlischer vom Komet getroffe zu wern als bei em Terroraschlag was abzukrieje. Wir müsse dene zeische das mer net zurückweiche, net aan Zentimeter. Kaa Grenze dicht mache, kaa Freiheite eischränke! Jetzt erst reschd net !
Adlergebabbel 