Klartext !

Eischendlisch sinn so Presskonferenze vorm Spiel e ganz langweilisch Sach. Die Schornaliste stelle immer die gleische Frache, un de Trainer gibt die selbe Antworte. Nur manschmal, wenn mer genau hiehört, fällt da doch mal die a odder anner Bermerkung die uffschlußreisch sei kann. So wie Gestern bei de PK vom Armin. Hier gibts die PK in voller Länge

Im Geschesatz zu seim Vorgänger dem Herrn Schaaf is de Armin ja en rischdische Entertainer. Mal jetzt ganz abgesehe von dem Gebbabel übber sei Jack un die Äbbelwoigoldene Trikots, So gesche Ende wurds dann intressant als er wesche dem Schlammassel vom DFB un de WM 2006 gefracht wurd. Im Geschesatz zur Harsewinkler Sparkass am Samsdach uff Sky, hat de Armin net uff de Zwanzischer eigklobbt. Da hat mer nämlisch gemerkt das de Heribert an langjährische DFL Beudel is. Blos kam aus de Funktionärsgarde uff die Füß trede. Wie  isch find hat der Armin da aach e guud Meinung dezu. Der sacht nämlisch aach des was de Bembelzwersch denkt. Das mer, wenn mer so e WM habbe will, ebe in dem dreckische Spiel von de dirty Old Man aus de Schweiz mitspiele muss. Also die Karte uff de Disch gelescht, un endlisch Schluß mache mit dem ganze Mafia Caln da im saubere Ländsche wo se Löcher mit Käs drumrum verkaafe. De Herr Kaiser hat ja gestern aach widder nur Halbwarheite zugegebbe und neue Nebbelkerze geworfe. Grad der, der so rein zufällisch nach de WM-Vergabe an de Putin Botschafter fer die Russisch Gasindustrie geworn is. Ein Schelm der Böses dabei denkt. Abber zurück zur PK vom Armin. Der wurd ja dann noch gefraacht wie des dann mit dene Spieler is die noch net so oft odder garnet gespielt habbe. Oje, da is der ja Fuchsisch geworn. Also da hat der abber de Katz Kadlec` so was von aan eigeschenkt, des hätt isch in der Form in de Öffentlischkeit net erwart.(ab ca. Min 17:30) Es scheint ja tatsächlich so zu sei das die Katz sisch im Training hänge läßt. Klar de Armin hat ihn ja unbedingt habbe wolle, abber wenn dem Bub des Trainig in de Bundesliga zu hart is, dann muß der halt werklisch in die Dänisch Bukolischa wechseln. Also da hat sisch de Armin rischdisch in Rage gebabbelt. Zu reschd wenn isch mer des so aagugg was der Bub bis jetzt gebracht hat. Un jetzt net widder schreie Fehleinkauf, der Bruno muß weg ! Des passiert annern aach, mer steckt halt net drin in so em Mensch.

So ihr Leut erst ma widder genuch getippselt, nachher Pokal gugge sisch übber Weiterkomme freue. Un Armin, zieh die schee Jack widder a. Never change winnig Clothes !

Bis dann, Euern Bembelzwersch

Werbung