De Kevin ganz alla Deham

Morsche Leut,

da hat de Bembelzwersch am Freidach Abend uff seim Sofa gehockt un hat schwer übberlescht, ob er seim Fernseher des zumude kann. Also RTL eizuschalde. So zum Spaß, un weil die Fraa ja vielleischd en Krimi odder en Frauefilm gugge will, hab isch aach mal im Laptop geguggt wie des dann bei dene Mediekrake aus Köln da mit dem Livestream aussieht. Da hats mer fast die Gigabites verboche. Ei die wollde fer des Gekicke von „Der Mannschaft“ en Euroneununsiebzisch habbe ! Die habbe doch aan an de Waffel, sogar im Kabel aans kannst die Eurolischa um sosnt gugge im Livestream. Also RTL war schon immer nix fer de Zweersch, abber jetzt sinn die döder als dod fer misch. Weil dann die Fraa doch nix gefunne hat, ausser die 47. Wiederholung von erschend aam Katastrophefilm bin isch halt mal des Risiko eigegange un hab RTL aagemacht. Leut ! Leut, wie hat dann der DFB unser Stadion zugerischd. In de NWK habbe se Sitzschale eigebaut, un da druff hat den des Eventgesummse als Fußballfans verkleidet rum gehockt un so gedan als wärn se Fußballbegeistert. Un des was normalerweise Schwarz un Rot is, habbe se mit ihrm komische schwarzweißanthrazit Kram abgedeckt. Kerle na! Un dann des Altdeutsche Liedgut was übber die Lautsprescher raus kam ! Also lange Rede korzer Sinn, de Zwersch hat genauso emotionslos vorm Fernseh gehockt, wie des Volk im Stadion, jetz e mal die Pole ausgenomme, die habbe ja Stimmung gemacht. Un weil des ja Alles so uffreschend war hat sisch halt de Bembekzwersch so sei Gedanke gemacht. Zum Beispiel übber unsern ehemalische Kevin. Der is ja von unsrem Bundesjogi widder e mal net eigelade worn. Un weil der ja jetzt bei dene Pariser kickt, diewo ja so e Starensembel sinn, muß der ja jetzt es ganze Wocheend alle in Paris hocke. Sei Kollesche sinn all unnerwegs. De Zlatan kickt in de Ikea farbe fer die Erfinner vom Knäckebrot, die Di Maria fer di Rinderzüchter aus de Pampa un so weider un so weider. Nur de Kevin hockt alle Deham in Paris. Übberhaupt, mäschd so Euroquali übberhaupt noch en Sinn? Weil ja jetzt 24 Länder bei de Euro kicke derfe, wo doch Europa grad e paar mehr Länder hat als die 24, de Rest is ja Vorderasiatisch odder erschendwie uff de Landkart verteilt. Abber gut es Geld fer die UEFA muß ja aach erschendwo herkomme. Un so gibts dann halt aach em mal die a odder annere lustisch Begebbeheit. Wie zum Beispiel die Darbietung von de Niederländer. De Zwersch waas jetzt warum die immer in dene Warnweste übber de Platz renne. Die probe ihrn Unnergang, der ja dorsch de Klimawandel besiescheld is. Desswesche habbe se sisch ja Gestern von de Vikinger un Fußballgroßmacht Island de Frack verhaue lasse. Es geht Bersch ab mit de Oranje. Un dann hat sisch noch de Oscarpreisträscher von de letzt WM de Robben, die Haxe verdreht. De Pep hat bestimmt in sein Maßkruch gegotzt. Unsern Lukas hat´s da ja schon besser gemacht, der hat mit seine Finne sei Tor sauber gehalde. Un heut stehn dann noch so Kracher uffem Spielplan wie Montenegro gesche Lichtenstein un San Marino gesche die Insulaner von de Lisbeth. Uffreschend ! Un unser annern Nachbarn die Däne, net ma de Lord trifft bei dene noch es Tor.Wo soll des noch hieführn? Erschendwie is des alles a bissje krampfhaft a de Haarn bei gezoche, des Euro Gedöns. Debei könnt mer so schee Bundeslischa habbe wo gescheit Fußball gespielt werd.

Also Leut, da mach ichs doch lieber wie de Kevin beim nächste vollkomme übberflüssische Eurospieldach. Isch werd uff meim Sofa sitze un e hoffe das die annern bald widder deham bei ihre Mannschafte sinn un widder gescheide Lischafußball gekickt werd.

Werbung