Morsche Leut,
Eischendlisch hät mer sisch uffresche müsse, aber mer kennt die Hohlköpp ja. Die jenische die bis nach Östereisch odder sonst wo hie fahrn um sisch gescheseidisch uff die Bern zu haue. Aber isch will des net mer, weil mer des eifach uff de Sack geht. Leider is mer soweit, das mer, wenn widder so e Meldung dorsch die Medie geht, nur noch zu em Koppschütteln fäisch is. Des is einfach nur noch unnerm IQ von ner Amöbe. So wie am Diensdach Abend als sisch die Knalltüte aus Hesse mit den besoffene Engländer gekloppt habbe. Worubber isch misch da Uffgrescht hab, is das die Frankforter Neue Presse schon korz nach dem Spiel e Fotostreck online gestellt hat, in der Bilder von der unsinnisch Klopperei zu sehe warn, allerding ohne aach nur e bissje Information und ohne aach nur es bissje Reflektion. Eifach nur Bilder fer de Sensationsgeile Leser ! Also Blöd-Niveau ! Klar e bissje Text war debei, nur noch armseelische war der un die Dummköpp wurde da Eintracht-Fans genannt! Als wenn sisch bei de Herrn Schornaliste noch net rumgesproche hät, das des kaa Fußballfans sinn, sondern meist Bierbäuschige Adrenalin Junkies, die ihr Hormone net unner Kontrolle habbe.
Viel besser hat des die Frankforter Rundschau gemacht. Die muß isch jetzt mal rischdisch lobe. Die habbe nadürlisch, un des is aach mer als rischdisch, die Meldung rausgegebbe das es zu Auschreidunge gekomme is. Abber die habbe ka Bilder unkommentiert in Netz gestellt und habbe erst mal rescherschiert, wer, was, wann un,wo. Also ihre Schornalistisches Handwerk gemacht wie des sei soll. Wie mer im Blog-G lese konnt hat der Herr Durstewitz Bilder gemacht un nach Frankfort geschickt abber erts e mal überleschd ob mer die übberhaupt veröffentlische sollt. Seht gut ! Am Mittwoch un am Donnersdaach konnt mer dann in de Zeidunge aach ganz ordentlisch rescherschierde Berischde lese, so wie sisch des gehört. Da frach ich mich halt, warum net gleisch so. So eifach Bilder von Prüscheleie ins Netz stelle is doch nur widder Wasser uff die Mühle von unsere Politclowns un dene die am liebste en Fanlose Fußball in Sky odder sonstwo habbe wolle, damit die sisch ihr Tasche noch voller mache könne. En Bärendienst fer de Fußball !
Die anner Seit is nadürlisch warum mer so e Testspiel übberhaupt uff so em Dorfbolzplatz ausdrache muß.Es muß doch jedem Veranstalter klar sei das des die Dummköpp ausnutze um sisch widder ma in die Medie zu bringe. Die Verantwortlische bei de Eintracht stelle sisch hie, als wärn se vom Blitz getroffe worn. Hallo? Sinn dann solsche Prüscheleie was neues ? Habt ihr net gewußt, das selbst fer englische Verhältnisse, die Kerle aus Leeds en üble Ruf habbe ? Un das des was aus Frankfort un Umgebung kimmt aach net grad mit Tempotaschetüscher um sisch wirft ? Klar habt ihr des gewußt. So wie isch mir aach sischer bin, das mer die Verantwortlisch bei de Eintracht un bei de Veranstalter, also die Östreischer gewarnt hat weil sowas immer durchsickert wenn sisch die Höhlkopp zum Kloppe verabrede. Jetzt kommt mer net damit, das wenn mer solsche Spiele ähnlisch wie in de Bundeslische organisiern det, vor den Kerle zurückweische det. Es is nun ma Realität das die Exsistiern. Un im Lischabetrieb sacht ja aach kaaner das mer vor dene zurückweische det. Also e klaa bissje Verantwortung trache aach die beide Vereine un die Veranstalterr. Hoffentlisch lerne se drauß! Mer kann net von de Fans verlange, die Schläscher un Chaote auszugrenze un zu Isoliern un dann selbst bei so em Spiel Bedingunge schaffe die dene in die Händ spiele.
So Ihr Leut, genuch geschennt. Dann bis zum nächste mal, hoffentlisch mit em erfreulischere Thema.
Ihne Ihrn Bembelzwersch
Adlergebabbel 