Sommerpause, mir graut vor Dir !!

Morsche Leut !

Nur  aan Spieldach, un dann ?

Tristess, Leere, sinnlose Existenz, das große Nichts !  Sommerpause ebe! Des sin rischdisch grauslische Aussichde. Net e ma e dabbisch WM odder e verkorkste EM gibts dies Jahr. Na gut die Mädscher kicke in Kanada. Abber kann des unser Lischa ersetze? Isch sach na! Klar, zur Nod frißt de Deifel Fliesche und mer guggt halt de Girlies beim kicke zu abber uffreschend is des net. Nix gesche die Mädscher, mittlerweile is des gekicke von dene garnet mehr so schlecht, abber es fehlt halt was. Mer kann sisch net so schee uffresche wie mer des bei de Bundeslischa kann. Von wesche de Schaaf is schuld, der Heribert hat die Eintracht geputt gespart, de Gagelmann is en überkanditelde Gaddezwersch un so weider un so weider.Des übberheblische dummdreiste Grinse von dem Quodeossi bei de Bauern un sei dämlisch rummgestodder, un dem Rummenigge sein emsische abber erfolglose Versusche, dem Steuerhinnerzieher sei rot Bern nachzumache wern mer aach fehle. Un dann des Retorische Eierkraule vom Reif, wenn die Bauern uffem Platz sinn, wer kann des dann ersetze? Es is doch zu schee wenn der sisch so uffreschd, das mer net waas ob der sein Finale Orgasmus odder en Herzkasper erlebt. Was ja eischendlisch egal is, weil des beides sowieso der letzte wär. Un dann der Worschtkönisch aussem Pott! Dem sei lang Gesischd des bei ner Niederlach von seine Schlüpf aussieht als wär in de letzt Blutufffrischeung Saft aus Dortmund debei gewese, Unbezahlbar, wie Visa immer mahnt. Dann habbe mer ja noch de Könisch der Ohrstöppsel, genau,der der sei Platt so poliert hat das die im in jedem Stadion als Leuschdfeuer uff de VIP-Plätze zu sehe is. Schee wie der immer nach ner Niederlach beim Babbele mit de Zähn knirscht. Des freud den sein Zahnteschniker immer rischdisch, der werd net Abeidslos.  Ach ja, die hätt isch ja beinah vergesse! Da gibts ja noch die fein Hanseatisch Gesellschaft. Die diewo Millone in de Rache von zwaatklassische Abzocker werfe un sisch wunner warum die des grad ma schaffe ann, zwaa Törsche mehr zu schieße als unser Fußballgott. Naja die könne ja net ma ihr komisch Philharmonie ferdisch baue, odder is die ferdisch un die habbe die Baukrän die da immer noch stehe aus versehe mit eigebaut? Mer was es net. So gesehe habbe mer schon ganz scheene Artiste in unserm Land. Da fällt mer grad uff, all die diewo die Saison da unne rumkrebse, habbe erschndwie aach e Bau problem. Die Hamborsche mit ihrm Musiksaal, die Berliner grieje ihrn Fluchhafen net uff die Reih un die Schwabesäckel versuche krampfhaft ihrn Bahnhof zu verbuddele. Nur die Wellbleschstadion Besitzer aus de Provinz, die Paderborner habbe ka Bauproblem. Ka Wunner , wer will da aach was baue? Am Samsdach wisse mer dann aber aach bescheid uff welsche Luftbumbe mer in de next Saison verzischde müsse. Des mäschd misch traurisch, ka wunner das mer de Sommerpauseblues hat.

Obwohl, ihr Leut, des muss ja gar net so schlimm wern, mit der Langeweile. Mir habbe ja noch unser Eintracht. Da is ja eischendlisch immer was los. Un dies Jahr besonners. Basst e mal uff! Also am achte Juni werd ja de neue Uffsischtrat gewählt. Gud, is jetzt uff de erste Blick net so spannend, weil ja eischendlisch klar is das des de Aktieschubbser, de Steubing wern soll. Abber der Uffsischtsrat dud ja dann den Nachfolscher vom Graf Dagobert Heribert von Spar zu Schwein aussuche. Des kann rischdisch uffreschend wern. Werds de Armin mit de Mauer, odder kimmt doch vieleischd de Duffner aus Hanoi? Oder zaubern unser hohe Herrn da noch en ganz annern aussem Ärmel? Frache übber Frache. Un was is mit unserm Fischkopp, unserm Schaaf. Derf der bleibe odder hat die Schlammschmeißer Koalition aus grie Bild un Blöd erfolsch und habbe so viel Dreck geschmiße das mer den arme Mann uff die Gass setzt ? Un mei liebe Leut, was werd dann unsern Bruno fer Ballzauberer aus seim Ärmel schüddeln. Des is doch aach e ganz spannend Sach.

Also sinn die Aussischde doch net ganz so trüb wie mer des so uffem erste Blick denke kann. Zumal dann ja die Mannschaft noch in die Wüste geschickt werd un widder ganz uffreschende Testsspiel astehe. Aans is uff jeden Fall gewiss, beim Bembelzwersch gibts ka Sommerpause. Der nervt eusch weider mit seim getippsel uff seiner Maschin. Mer bleibe in Verbindun, gell?

Still got the Blues,

Ihne Ihrn Bembelzwersch

Werbung

Berlin, Berlin, wir waren in Berlin !!

Stefan Aigner (Eintracht Frankfurt): «Da laufen wahrscheinlich morgen in der 2. Liga bessere Spiele. Wir haben kaum Chancen kreiert. Dann ist es ein bisschen wenig.»

Ei wenn der Mann reschd hat, hat  der reschd ! Des war ja ma garnix. Abber aach die planlose Ickes, habe werklisch nur Scheiß zusamme gekickt. Eischendlisch en Sammstachspiel zum vergesse un net mer drübber redde. Wenn da net widder ma die Rundschau querschieße det. Net das die widder Schaaf raus rufe dede, isch glaab da hat die FAZ dene gesacht das es jatzt ma gud is. Na guggt eusch mal die Bilderstrecke in de FR un die in de FNP an. In de FNP gibts zu jedem Bild en annere Text, in de FR stheht unner jedem Bild des selbe :Beim Auswärtsspiel in Berlin wurden im Eintracht-Block Pyrotechnik und Feuerwerkskörper gezündet. Abber ach unner alle achtzeh Bilder. Ei die habbe doch en Schlach weg. Alles was mit unserner Eintracht zusamme hängt kimmt bei dene Nachtkappe nur noch schlescht weg. Von der kleine abber feine Choreo vorm Spiel habbe se nix geschribbe und nur a Bild gebracht. Als wenn mer net aach ma was positives sehe könnt. Egal, die könne ebe net anners erschendwie scheine die Frust zu schiebe. Vieleischd is ja dem aane odder annere die Fraa weggelaafe odder so. Würd misch ja aach bei so Miesepeter wie denen net wunner.

So Themawechsel.

Hernlose gibts ja überall, also aach in de sogenannde Hauptstadt. Wie isch in de Zeidung gelese hab, habbe das so e paar von dene Frösch, also so nenne sisch die Herthafans, versucht e Eintrachtkneip in dem Preusische Dorf zu stürme Schee blöd.Hier de Berischd übber die Dummbatze.  Kaan Fluchhafe zum laufe bringe abber Eintrachtkneipe stürme wolle, und geklappt hats aach net. Na egal, jedenfalls habbe unserne dene ma gezeischd das mer aach Auswärts e kleine abber feine Choreo hiebekomme kann.

Die Hammborsche un die Annern die da so unne im Abstieschstrudel hänge habbe jetzt en dicke Hals. Was mer ja aach verstehe kann. Die übber Orks, also da unne aus dem Voralbedorf mit Föhn un ner kriminelle Vereinischung als Vorstand, verliern in Freiborsch ! Des is ja schon e Ding. Mer kann ja net saache das des Absischd wahr, aach wenn des vor alle die Hammborsche behaupte. Abber das dene Orks des scheiß egal is das die mit dem Grottegekicke des die da ebe abliefern, de ganze Abstieschskampf beeifluße is schon eschd schofelisch. Abber so sinnse halt ! „Was juckt misch de Rest der Welt, mia sinn mia“ ! Des hört sisch erschendwie a wie Eselgeblöck !

Rischdisch geil find de Bembelzwersch ja was da bei de Gazprommis da aus Herne-West abgeht. Der Kasper Heldt wunnerd sisch das sei Millionarios ihm un seim Trainer uff de Nas rummdanze! Schee blöd, der hat die Klupfüß un besonners den Karnevalsprinz Beton, sorry, Boateng doch eigekaaft. Des hät isch dem gleisch saache könne das des mit dem nix werd. Wenn aaner schon dorsch die Gasse zieht un Audospieschel abbrischd ! Freistellung, Suspnedierung,ei bei dene Schlümpf gehts zu wie in em Amilade ! Un dann braucht die Gorgetrupp noch e Eischntor un en Sack voll Glück das die gesche Paderborn gewinne könne. Bei sowas könnt de Zwersch grad Kotze. Des Ding mit dem Prinz kost die ma so rischdisch Geld, wei se den ja weider bezahle müße. Un des obwohl dene ihr Gammfleischkönisch ja schon betteln gehe wollt. Gugg hier! Warum die Pleideheinis immer noch die Lizenz grieje waas aach kanner. Abber des lieschd halt an de DFB/DFL-Mafia. Des kenne mer ja.

So jetzt wern mer uns ganz entspannt zurück lesche un den letzte Spieldaach genieße, fer uns gehts ja um nix mehr. Also geh isch am Sammstach entspannt ins Stadion unn hoff des unserne Bube deen Pilledrehe noch mal ein eischenge. An sosnte sehe mer uns hoffentlisch uff unserm Grillfest am dreißischsde.

„GRILLFEST“!! kannste hier mehr erfahrn!

Also machts guud ihr Leut,

Ihne Ihrn Bembelzwersch

Neues aus Balkonien

Guude Leut !

Was sin des blos fer Zeite ! Des ganze gemecker un gemach von de Presse un de Druck der aussem Umfeld von de Eintracht so groß sei soll is  dem Bembelzwersch so uff de Geist gegange, das der sich die letzte Dach bei dem scheene Wedder uff sein Balkon gehockt hat, un lieber e gud Buch als erschendwelsche Zeidunge gelese hat. Des entspannt mäschdisch, glaabt mer ! Un wie des halt in de Groß Stadt halt so is hockste, wenn de uff deim Balkon bist, sozusache deim Nachbarn uffem Schoß. Ob de dann willst odder net, du griest halt e Menge mit, was annern Leut so treibe.

Da iss zum Beispiel der aane, schräsch übber eck. Der is so um die verzisch rum. Agefange hat der den Sommer demit das der uffem Balkon sich immer e Zigga agesteckt hat. Also net so en Stumbe, sondern so e rischdisch vom Fidel aus Kuba. Also net das ihr denkt sei Alt hat ihn uffen Balkon gejacht mit seim Stinkbolze. Ne der is Singel, also so en Scheidungskrüppel. Des is der Eidruck den der mäschd. Dann hat er agefange zu telefonier wie net gescheid, unn e Woch schpäter hat er mit seim Laptop uffem Tisch und e riesen Micki Maus uff de Ohrn da gesesse un hat gebabbelt und getippt wie en Große. Wahrscheinlisch, weil er denkt er hat Niveau, hat der gepaarschibbt, wie des heut haast wen mer was fers Bettsche sucht. Na jedenfalls ging des dann e paar Daach so, un eines schönen Abend fängt der dann a uff seim dreisich ma dreisich Tisch e Candelligthdinner azurischde. Mer kann nix defür abber des kriet mer halt mit wann mer ab un zu mal übber de Buchrand guggt. Als dann die Dame seines Herzens, naja odder war die für  weider unne gedacht, kam words halt romantisch. Teller geklapper, leises Gläserklinge und e bissje geplapper und gelache. Ihr wisst ja wie sowas läuft. De Zwersch hat sisch dann halt diskret zurückgezoche, wie sisch des gehört. Mer will ja so Turteltäubscher ja net stöhrn. Als dann de Zwersch, so nach ner Stund,mit em Kippscher uff seim Lieschestuhl bequem gemacht hat, war der ganze Zauber beim Nachbar vorbei. Dess haast also der hat dann schon widder mit seim Laptop un de Micky Maus uff de Ohrn an seim Tischje gehockt. Nix mehr Herzdame un so. Un des annern was der arme Kerl so geplant hat, also des was normal nach so em Candelligth Dinner kimmt, hat wohl net geklappt.

Anscheinds is des also aach net so aafach mit dem Paarschippe, also dem neumodische Zeusch wo mer ebbes fürs Bett un so finne kann, denkt sisch de Bembelzwersch. Da bin isch eschd froh das isch mei Zwerscheweibsche schon lang gefunne hab. Mer sollts halt doch uff die altmodisch Art versuch, also mit Aspresche, Ausgehe un dene ganze Ferz. Is vielleischd e bissje astrengender abber bringt halt mehr. Ma sehe wenn es nächste romandische Abendesse angesachat is. Dem arme Kerl wünsch isch halt doch e bissje mehr Erfolsch beim nächste ma. De Bembelzwersch is ja kaan Unmensch.

So, jetzt mache mer ma Schluß, Moje is ja widder Spieltach. Ma gugge was unserne Adler widder so astelle.

Also dann, Ihr Leut. Bis Demnächst.

Euern Bembelzwersch

P.s. Sorry, aber erschendwie hat sisch der Beitrag gestern in den Weiten des WWW. verirrt. Abber heut hats ja doch noch geklappt!

Von japanische Brummkreisel un annern lustische Sache

Morsche Leut,

Heimsiesch! Ei da geht aam doch es Herz uff. Da hat sich doch unser Mannschaft berabbelt un hat den Hoppenheimern ma gezeischd wo de Hammer hängt. Schee wars. Es hat halt ebe aach alles gebasst. Als mer im Wald akame is die Sonn raus gekomme, un die Anreise mit de Straßebahn war aach halb so schlimm. Nur dabbisch das die VGF grad beim Bahnstreik, wo kaa S-Bahne am Stadion halde, die Altstadtstreck fer ihr Straßebahne sperre mußt, wei die da de alte Rechnugshof abreisse. Super Koordination von de Stadt und de VGF! Abber egal mer sinn halt rechtzeidisch uffgebroch un so hats halt geeklappt. Geschüddeld hats mich dann beim Wach am Gleißdreieck ja schon e mal, als isch gesehe hab das die da doch tatsäschlisch Cola in de Äppelwoi geschütt habbe. Ei wer trinkt dann sowas, des klappt ahm doch die Fußnäschel hoch, da kriet dein Maache doch Herpes, bei sowas! Also kulturlos is des schon. Guud mer wolle ja net vom Äppelwoi schwätze, sondern übber de Fußball un die Eintracht.

E fei Sach war des da mit dene Trikots beim Warm mache vom Team. Die hadde nämlisch all die Achtunzwanzisch, also dem Sonny Kittel sei Nummer hinne druff. Des hat der Bub aach verdient. In de Uffstellung war ja net viel übberaschendes, ausser vieleischd das de ageschossene, de Trainer, eischendlisch drei Sechser uffgebode hat. De Hase „B“, de Iggy un de Medo. Des sah doch reschd Defensiv aus. Un trotzdem habbe se losgeleschd wie die Feuerwehr. Die blau-weiße Komiker vom Dorfclub habbe garnet mitgegrischd wie dene geschieht, so habbe unser Bube dene eigeheitzt. Der Schwegler, der ma bei uns gekickt hat, hat ja gemanht die Dorfmannschaft is erst um vertel nach vier in Franakfort agekomme. Des stimmt so net. Die warn schon da, die habbe nur net demit gereschend das die so Übberfahrn wern. Als dann de Ozzy den Freistoß um des Mäuersche rumgedreht hat un de Ball zum aans null eigeschlache is, muß dene Pitschedabbler von de Rundschau doch die Kinnlad bis uff die Knie runnergefalle sei. Als mer dann drei-null geführt habbe, war des ganze Kriese geschreibsel von dene so was von widderleschd. Gefreut hat den Zwersch aach das de Flummi endlisch widder ma fast e ganz Spiel mache dorft, un des hat der net schlescht gemacht. Immerhie hat der ja bis Gestern kaan Fuß beim Schaaf uff de Deppisch gebracht. Schad halt nur für de Medo das der sisch verletzt hat. Die Dorfbube hatte nur a gefärlisch Ding in de erst Haöbzeit, un den Zahn hat abber der Kevin dem Volland gezoche.

In de zwaat Halbzeit habbe dann unsere e bissje langsamer gemacht und habbe die Dorfjuchend renne lasse. Abber mer muß sache das diesma unser Abwehr rischdisch gut gestanne hat. Was mer von de Mauer beim drei-aans net sache kann. Naja mer kann halt net alles habbe. Das die Ilse in de vierunsiebtzischsd Minud raus mußt, war schad. Abber der war ja verdisch wie e Quetsch. Gerennt isser die ganz Zeit un gebisse hat er aach, also bildlisch. Un dann hat unsern Trainerfuchs de D.J. gebracht, so zu sache als verde Sechser. Das war en gluche Schachzuch. Damit kame die Dörfler gar net mehr dorschs Middelfeld. Un dann kam de große Ufftritt vom klaane Takashi !! Der krischt de Ball uff de reschd Seit vor die Fies gespielt un rennt los wie die Feuwehr in rischdung Tor. Ja, uffs rischdisch, also dene Hoppenheimer ihrns. Kaaner konnt da mithalte un unsern japanischer Irrwisch steht allaa vorm Baumann! Jetzt kimmts. Wahrscheinlisch hat er noch sei Ding vom Bremen Spiel im Kopp gehabt un hat sisch net getraut des Tor zu mache. Also dreht er sisch rechts rum, dann links rum, dann widder rechts rum, wie en japanischer Brummkreisel. Un dann, un dann …… schießt der doch noch, vorbei ! Die japanisch Kampffeder hat es ferdisch gebracht sich selbst schwindlisch zu spiele, kaa wunner das der net mehr wußt wo es Tor steht. Zum Glück habbe mer noch so hoch geführt, sonst hätt isch dem persönlisch e Oneway Ticket nach Nippon gekaaft. Abber es is ja alles gut gegange. Un so habber mer jetzt zehn Spiele am Stück deham net mer verlorn. Is doch was!

Als isch dann heut Moin geguggt hab was die Zeidunge so schreibe, hät isch ja fast en Lachafall gegrischt. Jedenfalls bei de Rundschau.   Eintracht siegt und diskutiert weiter . Da fällt mir nix mer ei.Die benemm sisch wie e bleidischd Lebberworscht. Der Kischererbs un de Dorschtwitz sinn wie klaane Kinner dene mer es Spielzeusch weg genomme hat. Mit de Fies ufftrambele un „isch will, abber“ kreische! Isch waas halt net was der Schaaf dene gedan hat, abber mit objektivem Schornalismus hat des nix mehr zu due. Abber lasse mache, dem Schaaf kann isch nur saache :“ Was juckts die stolze Eiche, wenn sich die Wildsau an ihr schabt“

So ihr Leut, isch geh jetzt erst ma in de Park, Taube vergifte. De Bembelzwersch wünscht eusch noch en schöne Daach, bis dann alsemal widder !

Euern Bembelzwersch

Ei gugg doch mal uff de Boden vom Dibbe

Gude Leut !

De Bembelzwersch, als Online un Blätterwald Rescherschör hat des ja komme sehe. Die „Rote Bild“ mäschd des ja schon monade lang, schee subtil un unnerschwellisch, un jetzt hat des Zentralorgan für Volksverdummung nachgezoche! „Schaaf-Bashing!“ Das mer des net ernst nemme kann sollt ja dem uffgeklärte Eintrachtfan klar sei. Un trotzdem verbreided des e mies Stimmung. Was neues habbe die Schmierfinke von de „Blöd“ ja net werklisch geschribbe. Ausser vielleischd das die Bube kaa Lust hatte Achterbahn zu fahrn. Hätt isch ja aach net gehabt, schon weil die Sischerheitsbüschel net Zwerschegereschd sinn. Also alles heiß Luft ? Net so ganz find isch.

En Freund vom Schaaf als Trainer war de Bembelzwersch ja von Afang a net. Des wisse all. Des hat sisch aach net geännert. Da gehts mir wie dem Bruno, der hätt aach gern en Annern gehabt, aber de Dagobert-Heri wollt halt unbedingt den Fischkopp. Trotzdem sollt mer jetzt net alles am Trainer festmache, wenns ma net läuft. Viele habbe ja, als die Katz nach Prag zurück geschickt worn is,gesacht das es ziemlisch gefährlisch is. Wenn ma dem Meier odder de Ilse was bassiert, habbe mer kaan gescheide Störmer mehr. Un ? So isses gekomme. Des is abber net dem Schaaf sei schuld. Da habbe annern aach ihr Finger drin gehabt. Das der nadierlisch aach sei Fehler gemacht hat is ja kaa Frach. Des rumgezabbel von de Pia uffem Platz un des Blutleere Sushi gekick von de Kampffeder hät der sisch nie so lang mit agugge derfe. Un das der den Flummi so links lieje lässt is aach net rischdisch. En sture, wortkarge Fischkopp is er ja aach. Un so rischdisch passt der ja von seiner Mendalität her net nach Frankfort. Is er desswesche en schlechte Trainer? Na !

Was bei de Schreiberlinge un aach bei uns Fans immer vergesse werd, die Fäde wern doch im Hinnergrund gezoche. Guggt eusch doch des Jahr, odder besser die Saison mal a. De Bruno hat am Afang eschde Probleme gehabt Spieler zu krieje weil mer kaan Trainer hatte. Dann kame de Schmitt un de Matejo uffen Disch.De Schmitt hat dem Bruno e lang Nas gedreht, un den Matejo wollt de Heribert net. Den hätt isch allerdings mit Kusshand genomme. Erstens weil mer jetzt nämlisch e stabil Abwehr hädde, un zwadens, weil der zu Frankfort un zur Eintracht basst. E bissje weltmännischer is der ja als de Schaaf.Un so e bissje Klämmerfaktor kimmt ja aach bei de Sponsorn besser a, als nordischer Heringsgeruch. Dann hängt sisch de Bender e nei un erzählt de Bruno det scheiß Abbeid mache, weil er kaa Spieler beikried. Aach net, wie säschd mer des heut ? Zielführend ! Dann kimmt die Präsidendewahl im Verein. Da gabs ja aach einische Tiefschläsch und Reibereie, net das es da werklisch um de Verein ging. Da habbe sisch die Leut fer de Uffsischtsrat ihre Truppe in Stellung gebracht. Mit de Widderwahl vom Fischer war klar da de Bender sein Hut nemme muß, weil er kaan Rückhalt mehr hat. Des haast dann aach fer de Heribet, machs guud un Tschö. Jetzt guggt nadierlisch alles was da beim Uffsischtsrat raus kimmt, un des is aach klar, de Heribert will halt aach sei Denkmal habbe, wann er geht. Also ehrlisch, wenn mer des so betracht, hat doch die Mannschaft un de Schaaf ma garnet so schlecht geabbeid, die Saison, odder ? Jetzt waaß abber kaaner was kimmt, kimmt de Steubing als Uffsischtsrat Boss ? Wahrscheinlisch ! Wer kimmt fer de Heribert ? Was is dann mit dem Bruno, derf der bleibe ? Wenn de Veh kimmt klar, dann derf der, abber derf dann de Schaaf bleibe? Eher net, weil de Veh sei Finger net von de Mannschaft lasse werd un de Schaaf sisch net neibabbele läßt.  Un so weider, un so Weider.

Wenn mer also genau hieguggt sieht mer das da übberall Unsischerheit is. Un jeder der in de Startlöscher sitzt fer erschend en Posde, mäscht nadierlisch sei eischen Politik. Des is zwar normal abber net grad de Leistung von de Mannschaft zuträschlisch. Die wisse ja aach net ob se net abgeschoße wern.

Ganz ehrlisch, isch bin kaan Schaafsfreund, abber gebt dem Mann noch e Chance. Un eusch, liebe Tastequäler von de Presse, isch waaß ihr müßt euern Kinner was zu esse gebbe un die neuste Nike-Tornschuh fer zwaahunnerd Euro brauche die aach. Abber versucht doch ma Hinnergründe zu beleuschde un zu erklärn. Mit Dreck werfe kann jeder. Nur bringe dud des nix!

So, un moije gehts ins Waldstadion zur Eintracht. Dann werd de Bembelzwersch widder bei dene stehe un die Mannschaft afeuern, singe un sisch die Stimm aussem Halskreische, die von annern als Dummbeudel, und Hernlose bezeischned worn sinn.

Ihne Ihrn Bembelzwersch