Ferdisch !!!

Guude Leut,

es is geschafft. Die Saison is gelaafe. Jetzt werd überall zusammen gezählt, gereschnd un jed Erbsje drei mal umgedreht. Des nennt mer dann Analyse. Jetzt komme all die Schlaumeier aus ihrne Löscher, die soswoeso alles schon immer gewußt habbe. Lusdiche Zeide wern des jetzt.

Er trifft mit dem Fuß,er trifft mit dem Kopf,
er trifft wie er will,sogar mit dem Zopf,
Fußballgott, Fußballgott,
Alex Meier Fußballgott!

So, des Kannönsche hat sich unsern Fußballgott jetzt doch noch geholt. Sauber Abbeid, Alex. Des Ding haste die Verdient !! Vor alle Dinge is der Alex kaan Lautsprescher, also kaaner der unnödisch uffen Putz haut. Saache dud der wenisch, abber wenn dann kann er aach ganz schee austeile , wie zum Beispiel als de Bruno ihn so agekackt hat. Abber Schwamm drübber, de Bruno waas jetz aach endlisch was de Fußballgott wert is.                       Wenn mer den net hätte, häts schon manschma ganz dunkel ausgesehe für unser Eintracht. Also Alex, Danke, werd schnell widder fit, mer brauche disch un dei Torn.

Des Spiel gestern war erstaunlisch munder un schnell, mer hat ja net unbedingt erwarte könne das die Pille  werklisch noch e Spiel gewinne wollte. Un unserne wollte halt ihr Heimserie halte un dem Dagobert noch e paar Euro in de Sparstrumpf spiele.Mir wars reschd, es gab e munter Spielsche un, wie immer e rischdisch gud Stimmung im Stadion. Des scheene is ja bei den Babsäck  aus de Chemiefabrik, das die net nur ganz ordentlisch kicke, sondern die biete aam fer sei Eitrittsgeld e ordentlisches Spätgrieschisches Drama uffem Platz. Also net weil die Spiele mit dene so dramadisch wärn, sondern weil vor allem die Bahnschrank, de Fiesling, immer im und um de Strafraum umfällt wenn in seiner Umgebung drei Luftmoleküle in Beweschenug gerade. Des rafft ihn immer dahie, wie wenn de Zeus ihn persönlisch mit em Blitz gefällt hät. Wenn mer des Blondsche noch e bissje schminke ded, könnt der glatt die Julia beim Scheksbier spiele.Un der is net de Anzische der die Kunst der Fallsucht oscarreif vorführn kann. Des kann der scheene Araber, de Bel-arabi nämlisch aach. Also Hut ab, wenns nix mer mit Fußball is, Herr Fiesling, dann kannste immer noch nach Hollywood gehe, vielleischd werste da aach noch Gouverneur so wie de Arnie aus de Albeschlucht. Allerdings habbe mir ja aach so den aane odder annere Patient im Team. Wie der Schändler so Plan- un Hernlose übber de Platz stolbern dorft is mir e Rätsel. Net nur das kaan aane Ball von dem agekomme is, na da rennt der Dabbes korz vor Schluß den Modezar noch im eischene strafraum um! Kerle, wenn des es zwaa zwaa gegebbe hät, isch hät den eischenhändisch verpackt und mit FED EX zu Griensmann geschickt! Soll der doch da drübbe sei Kabinetstückscher mache. Bei de Amis fällt des net uff. Die merke eh nix. Heilisch Welt, hoffentlisch find der Bruno en gescheide Rechtsverteidischer fer die next Saison.

Übberhaupt, de Bruno! Der hat jetzt rischdisch zu abbeide. Mer wolle ja schließlich net stehe bleibe, sondern weider nach obbe komme, sache jedenfalls unser Spieler. Da kann eusch de Zwersch nur saache, risdisch so, wer sisch ewisch klaa meschd kann aach net wachse. Des muß isch als Zwersch ja wisse.

So Leut, genuch für heut, feiert de Fußballgott mit seim Kanönche noch e bissje, is ja Sonndach un moje werd ja aach net geschafft.

Also bis dann ihr Leuet,

Euern Bembelzwersch