Von Probierbescher un lange Gesischter


Was mer so alles im Stadion un drumerum erlebe kann

Ehrlisch, ich find des ja e Schand. Da werd im Stadion als emal von der Brauerei mit dem Stausee uffem Plakat so e Biertest Aktion gemacht. Is ja net schlescht fer die Bierdrinker. Abber was is den mit uns, den Anhängern vom eschte Frankforter Stöffche ? Nix !! Da werste erschend wie schwer benachteilischt. De Possmann könnt ja ach ma sowas mache, abber na, mir Schobbeköpp gehn leer aus.

Also Freidach, als mer gesche die Ostholländer gekickt habbe bin isch also mit meim Kumbel, dem Infernal, ins Stadion gefahrn. Ei der war ja ganz hippelisch wesche dem Krombacher Freibier des wo es da gegebbe hat. Abber erst hat er e Worscht gebraucht. Iss aach gut so, der kann nämlisch noch was uff die Ribbe gebrauche. Am Worschtstand treffe mer a paar nette Kerle, die wo uns erzählt habbe das die aus Wörzborsch sinn. Lustisch war das die fer ihr Bussfahrt von Wörzborsch nach Frankfort zwölf Euro bezahlt habbe, abber vom Hauptbahnhof zum Stadion habbe se verzisch Euro gelatzt. Als isch dene gesacht hab, das die mit ihrer Eintrittskart aach umsonst ins Stadion gefahrn wärn, hatte mer des erste lange Gesischt. Kimmt halt devo wann mer Gladbachfan is, da krischt mer halt nix mit von de Welt.   Also mir dorsch die Eigangskontroll, un was soll isch saache, mein Kumbel rennt los wie en gestörde in Rischtung von dene Medientürme, von dene aach kaaner waas warum die da stehe. Da komme also dann da so e paar Mädscher mittem Tablett a, uff dene so ne Art Schnapsgläser aus Plastik stehe. Ei aus dene Dinger drinkt de Zwersch sein Vodka, wenn er mal en Schnaps braucht. Un was war da drin? So e labberisch Brie die ausgesehe hat wie die Zischepisse die se in Köln dringe. Eklisch. Na jedenfalls schnabbt sich mein Kumbel, so geschätzde zwansisch von dene Dinger un dud die uffem Stehtisch horte. Jetzt  hat nadirlisch de Bembelzwersch des zwaade Lang Gesischt des Abends. Klar de Kumbel trinkt Freibier un de Zwersch muß sein Schobbe deuer bezahle. Also de Zwersch net faul schnappt sich so en Eierbescher von der Brie und schluck en nunner. Hät isch net mache solle. Des Zeusch hat net nur ausgesehe wie des unmöschlische Getränk bei de Köllner, des hat aach so geschmeckt, also wie wenn du e Ziesch mit Altbier voll laafe läst, un dann die Pisse als Kölsch verkaafe dust. Mein Kumbel hat noch sein große Bierbescher vom Verkausstand debei un schütt jetzt die ganz Brüh zusamme in den große Bescher un drinkt. Da hatter mer des Dritte lange Gesischt des Abend. Also es hilft nix, Possmann, mach e mal e Schobbeaktion im Stadion, des mit dem Bier is ja net auszuhalde.

Un so rischdisch lange Gesischter habbe dann die Fans von dene Gäulscher gemacht. Hatte die Dabbese gemahnt die könnde unsern Adlern die Punkte abnemme. Des war wohl nix. Leut ich sachs eusch isch hatt schon lang net mer so en Spaß beim S-Bahn fahrn. Die meiste von dene Hannebambel habbe ihr Kinnlad uffem Boden hinner sisch hergezoche.

Lange Gesischter könne was scheenes sei, wenn se die Annern mache.

Bis dann also,

Eeuern Bembelzwersch

Advertisements