Die Dinosaurier wern immer trauriger…….

Wie singe die Dode Hose ?

Hey, hier kommt Alex, Vorhang auf für seine Torschuß Show………..

Ja unsern Fußballgott, zwa mal hat er zugeschlache! Ob er den zwaade Elfer mit Absicht an die Latt gehämmert hat wern mer wohl nie erfahrn. Egal! Hauptsach mer habbe des Ding gewonne. Das der Bruno ja jetzt widder e Kröt geschluckt hat freut mich persönlisch ja am meiste. Wer so dumme Sprüsch mescht, der muß halt blude. Un unser Mannschaft hört ja sogar uff de Heribert. Der hat ja am Freidach noch gesacht  das mer jetzt nach obbe gugge müsse! Un rums, sinn mer achter. So kanns gern weider gehe, nächst Woch gesche Köln zum Beispiel un nadürlisch gesche die Hinnerwäldler aus Paderborn.

Also korz und gut, des war eischendlisch en scheene Fußballdach gestern. De Mennzer Dreck hat uff die Nuß gekrischt. Ok, zwar in Hopp-elheim abber verlorn is verlorn und des gehört dene so. Die, diewo ihrn Bahnhof unner die Erd lesche un die von dene mer garnet was ob die üwwerhaupt en Bahnhof habbe, die habbe unentschide gespielt, gut fer uns. Un die Augsborsche habbe verlorn, dene werde mer aach noch den Platz streidisch mache. Abber zurück unserner Eintracht.

Isch hätt ja net mit de Pia und de Kampffeder uff a mal gereschend, weil die ja beide net so die Kampfsäu sinn. Abber eischendlisch habbese des gut gemacht, vor allem die Pia hat mer gefalle. Der Bub hat es endlisch kapiert das der sein Körper net nur zum agugge hat. Die japanisch Kampffeder hat in der erst Halbzeit ja noch ganz gut gekickt, abber in de zwaat Halbzeit war der ja ferdisch wie e Quetsch. Bei der Frisur hab isch des schon immer geahnt, die Aischners Ilse steckt vorm Spiel die Finger in die Steckdos, so rennt der ja aach. Abber gestern war bei seiner Auswechslung wohl der Accu noch net ganz leer. Desshalb is die Wasserflasch die er gedrete hat, ach als Ufo uffem Radarscherm vom Fluchhafen uffgetaucht. Mescht nix, da hat der dem Drainer ma gezeischt was er fern Heiße Typ is.

De Ozzy hat ja aach ganz net gespielt, hat abber aach net so viel zu dun gehabt. Übber die Seit kam ja von dene Fischbrötscher nix. Dem Schändler, allerdings sind die Leutscher widder reiheweis weg gelafe, also den det isch jetzt abber mal werklisch uff die Bank hocke. ansonste is ja net viel zu meckern übber die Abwehr. Unser Modezar, de Kevin hat sei Sach wie immer gut gemacht un die zwa Hempflinge, der Russ un de Madlung habbe ach ordentlich gespielt. So kanns also gern weider gehe. Abber Bammel habbe muß mer ja schon fürn Sonndach gesche die Ziegeböck. Die stehe doch nur hinne drin un warte uff Konter . Aber egal isch denk ma de Fußballgott mäscht des schon.

Den Taach gestern hab isch mir übrigens uffem Kalender ganz dick rot agestriche! Zwaa Elfmeter in aam Spiel, wann hats denn des e mal gegebbe. Also isch als Zwersch kann misch da net dran erinnern. Also der Schiedsrischter, der Meier, der dut mer schon leid. Weil der werd von seim Chef, dem Oberlump Fahndel sowas von in de Senkel gestellt wern….. Was erlaube Meier, gibt Eintrach 2 Elfmeter……. so ungefähr werd sich des anhörn. Uff jedenfall werde mir die Saison kaan Elfer mer krieje. Aber egal mir sin ja aach net druff agewiese. Unser Bube gewinne ach Spiele ohne Elfer, des habbe se ja aschon bewiese. Alo alles in allem fällt dem Bembelzwersch sein Fazit für des gestrische Spiel doch positiv aus. Mer könne halt doch net nur gesche die Schampinjonslischiste gewinne odder gut spiele. Es geht aach gesche Hoffentlischabsteischer.

So, jetzt hat der Bembelzwersch übber 600 Worte getippselt, des langt für heut. Mer werde uns widder lese wann de Zwersch widder was zu Meckern hat.

Bis dahin lasts Eusch gut gehe,

Ihne Ihrn Bembelzwersch

Werbung