Muß mer vor dem Alm Öie ziddern ?

Ei ich sachs euch Leut, isch mach heute Moin die Zeidung uff, un was muß ich im Sportteil lese ? Die Nachtkappe hinner de kabutt Brück haben en neue Drainer. Is ja net schlimm find isch, abber die Pressefuzzis rufe schon widder de Unnergang vom Abendland aus. Modivationskünstler isser, der Neue! Ha, da lach isch misch doch dood. U23 Uffschtischsdrainer isser, unn ??? Uff de Alm hat er Küh un anner Viehzeusch gehüt, dann hat er an Rennaudos geschraubt un dann Fußballdrainer geworn. Ei der was ja garnet was er will. Un vor so ahm schloddern jetzt de Schornaliste die Knie! Pah !  Sinn mer Adler odder Mädscher ??!!

Also ma erlisch, isch hab da ka Angst vorm Samstach. Klar des sinn immer ziemlische Kackspiele gesche die Mainzelmännscher. Un des werd e bös getrete gebbe ab Samstach weil die Pappnase ja ganz nah an de Abstischräng rumhänge. Abber ma ehrlisch, muss mer deswesche Angst habbe? Unsern Carlos is ja sozusache Reloaded. Also der derf widder weil er ka gelb Kart mehr hat, un unsern Bamba is ja aach widder fit. Gut de Hase B derf net spiele, dann muß uns ebe de Russ de Brasilianer mache un unsre Mädsche die Pia werd dene schon e ma widder ein eischenke. Ausserdem is ja der Sefe Schweizer, der werd dem Eidgenössische Almdudler ach uff die Fies trede wolle. Mer hawwe die Schlümpf besieschd, also wenn mer ach die Linksrheinische Nachtkappe weg haue.

Also Leut, Don`t Panik, die Zwaundverzisch un de Bembelzwersch sinn mit Eusch!

P.s. Ihr solltet niemals das Haus ohne Handtuch verlassen !  :-DD

Werbung

ho ho ho, Die Schlümpfe sind K.O. !

Morsche Adlergedöns,

17 Spiele hawwe mer net mehr gesche die Schlümpf gewonne. Bis Gestern halt. Da hawwe mer dene die blaue Strümp ausgezoche. Vorher sah des ganze arrogant aus von dene  Blaue, denach hawwe se abber ganz schee bedröbelt geguggt, die Bube ausem Pott. Is ja aach e Ding das ausgereschnd die Pia, unser Mädsche im Team des Bällsche midem Kopp nei mäscht. Hät isch dem garnet zugetraut. Aber gut, unsern Meisterdrainer ´, de Schaaf, hat Mut zum Wechsel bewiese un, oh Wunner, er hat e glücklisch Händsche gehabt. Also net das der Bub, der Sonny schlecht gespielt hat, aber der wurd ja vom Ozzy nur eigesetzt wenn 2 odder 3 Schlümpfscher ihm uff de Fies gestanne hat. Aber so isser halt de Ozzy, gugge dud der net werklisch was so da im Spiel bassiert. Un unsern annern Ausseverteidischer, unsern amerekanische Nationalspieler der Schändler der treib misch aach nochemal zum Herzkasper. Ma ganz ehrlisch, e stabil Abwehr sieht anners aus.  Abber gut isch will ja net unge, des üerlass isch der Rundschau ihrn Fußballexperte. Schlechtschreibe könne die gut. Abber zurück zum Spiel. Also das mer Trapp habbe is schon das ahne odder annern Pünktsche wert. Des war schon Stak, wie der dene Bube ausem Pott die Bällscher vom Schlappe geholt hat. Un dann hawwese sich selbst noch Knote in die Baa gespielt, die Schalkerer. So wie unsern Fußballgott in de zwat Halbzeit, da hat der zwaa drei ma im Strafraum rumgefuddelt bis er fast selbst net meer wust wo er genau is. De beste Daach hat ja unser Aigners Ilse aach net gehabt, so wie de Sefe, ei dess zwa null muß er doch mache !!!!   Stellt euch jetzt e ma vor unser Bube hätte gestern alle Bestform gehabt, ich sachs euch, die Schlümpf hätte sich wieder e ma 6 Dinger eigefange. So wars halt nur aans, abber des hat ja gereischd zum gewinne.

Also zieht euern Zwersch jetzt sei Fazit zum Spiel. Mehr hawwe gewonne, un des net unverdient. Nur des Problem mit dem nach obbe odder unne gugge, des hawwe mer noch net gelöst. Also isch als Zwersch gugg nadürlisch nadurgemäß nach obbe. Hoffe mer das des unser Manschaft aach bald kann.

Ihne Ihrn Bembelzwersch

Die spinne die Engländer und bei uns wern se jetzt hippelisch !

Ei, jetzt sacht e mal, seid ihr jetzt ganz dorsch uff euernen Insel?  6,9 Milliarde für 3 Jahr Fußball im Fernseh. Eischendlich vollkomme üerdreht. Nur des Problem ist ja das jetzt unser Manager in de Bundeslischa aach am Rad drehe. Naja jedenfalls die Pappnase von de Wolfsborscher un nadürlich de Heldt von de Schlümpf. Die wolle jetzt de Spieledach weider aussenanner reiße! Klar Mondach middach um aans. Da sitze mer doch all gern vorm Fernseher 😀 Odder mer habbe Bundeslischa am Sonndach nach dem Tatort! Echt, ich griesch en Hals wenn ich des hör.

Was abber am schlimste is,is das der Heldt und der Allofs, klar der Gisdol hat ja aach schon gezuckt, das die übberhaupt kaa Intresse mehr habbe das die Leut ins Stadion gehe. Wer soll dann Sonndach Middach um 12 odder Samstach Abend um 10 Uhr ins Stadion gehe ? Ei die Mudder haut doch dem Babba uff die Kapp. Nur des Problem is, das Fußball ohne Fans im Stadion kan Fußball mehr is. Dann werd Fußball nur noch gespielt um irschendwelschen Geldköpp die Tasche noch voller zu mache. Also isch, isch für mein Teil hab da kaan Bock druff. Dann geh isch lieber zur A-Juchend von de Eintracht als mer so de letzte Euro aus de Tasch ziehe zulasse und den irschendwelsch Geldsäck in de Arsch zu schiebe.

Eins is ja ma klar, Fußball is Emotion, Begeisterung und hilft uns alle e bissje übber so manchen Scheiß im Lewe weg zukomme, des sollte mer uns von dene Geldsäck net ach noch nemme lasse. Die habbe uns schon genuch gestutzt!!

http://www.kicker.de/news/fussball/bundesliga/startseite/621028/artikel_tv-gelder_allofs-26-co-denken-ueber-neue-anstosszeiten-nach.html

Ihne Ihrn Bembelzwersch

Morsche Leut !!

Jetzt is es soweit!  Der Bembelzwersch hat sein eischene Blog !

Schee gell des neumodische Zeusch. Soll mer kaner sache die mit dem weiße Bart ham ka Ahnung von de modern Teschnik. Jetzt fracht ihr euch bestimmt , warum mescht der des?

Ganz afach, erst emal muß ja ach unsern EFC mal sein Senf dezu gebe , zu dem ganze Kram der da uff de Welt bassiert,so mit unsere Eintracht, dem Fußball und annern Gedönse halt. Und ihr derft, na sollt sogar euern Senf dezu gebe.Mer sinn ja Demokradisch, un weltoffe ! Frankforter halt.  Also gibts jetzt öfter mal Beitdräsch zu dene Ihr Euern Kommentar dezugebbe sollt.

Also ihr Leut, mer liest sich, Ihne Ihrn Bembelzwersch