Uffresche, mer kann sich nur uffresche !
Übber unser Eintracht, übbers Wedder un übber de Brych ! Ei isch was garnet wo ich da afange soll! In Wiessbade-West verlorn. Des dut meim Zwerscheherz net gut. Werklisch net! Als isch des schon gesehe hab. Unser Babyschlaafazuchblaue Trikos! Des konnt ja nix wern. also wenn isch den erwische der die Farb ausgesucht hat, dann abber…… ! Un dann spielt die Mannschaft ach noch so wie die Farb aussieht. Unnererdisch! Ei wannste in Führung gehst, auswärts, dann derfste abber ach net uffhören Fußball zu spiele unn zugugge wie die annern dann uff dei Tor zu renne. Unserne Ausseverdteidischer habbe ja e Lauftempo gehabt wie mei Zwerscheomma im Rollstuhl. Also der Schändler, nix gesche den Bub, abber sei Leistung gestern, das hat nix mit Bundeslischa zu dun, un des net zum erste ma. Uff de annern Seit der Ozzy, also isch waas ja net was der Bub so Nachts träumt, mehr Geld will er habbe, in die Nationalmannschaft will er! Ha, da lacht de Zwersch und kippt sich noch en Schobbe in de Kopp! 2. Lischa, zu mehr reischd des net. Das unserm Zambrano aach noch so de Gaul dorsch geht is ja aach de Hammer. Klar der japanisch o-Zaziki hat den die ganz Zeit provoziert. Abber wenn isch Profi bin muß ich halt doch mein Gaul besser am Züschel habbe. Jetzt derf er schon widder Urlaub mach am Samstach. Weil ja immer mindestens Zwaa dezu gehörn, komme mer jetzt e mal zu dem Gelbe, dem Brych. Schiedsrischder sach isch ja gar net mehr zu so ahm. Nett das mer des Spiel wesche dem verlorn hätte, des net. Da warn mer selber Schuld! Der Bruno hat schon ganz reschd sich übber den Kerl uffzuresche. Wenn Zwaa des gleische astelle dann muß mer des ach gleisch bewerde un net rot in Watte packe und blau uff die Nuss gebbe. So kann mer nämlisch aner Mannschaft aach ihr Spiel kaputt pfeiffe. Und des kann der Brych nämlich gut. Abber isch sachs nochma, mir sinn selber schuld.
Übber de Kevin kann isch ja net schenne. Klar, der Freistoß geht uff sei Kapp. Wenn isch kaan Mann da an de Poste stell, dann muß isch halt uff die Ecke selber besser uffbasse. Abber gut, beim Tormann is es halt immer scheiße weil en Fehler meist gleisch ach e Tor iss. Der Alex is ja in de zwaat Halbzeit gerannt, hat gemacht und verucht des Spiel in de Griff zu krische. Was isch da net verstanne hab, is halt das die annern net mitgezoche habbe. Da hat wohl der Drainer noch viel Abeit vor sich, un e bissje mehr Motivation fer die Bube wär ja ach net schlecht, Herr Schaaf.
Also isses wie immer, wenn de in Not bist kann dir nix besseres passiern als das du gesche die Eintracht spielst. Des schlimme is ja das des ganz egal is ob des zu Hölzenbein, Uwe Bein Zeite war odder heut is. Es hat sich nix geännert.
„Stehste korz vorm Dod, hilft die Eintracht in de Not!“
So genuch geschennt. Abbuzze, uffstehe un am Samstach dann de HSV gebutzt. Mer sinn ja schließlisch Adler !
Ihne Ihrn Bembelzwersch
Adlergebabbel 