Habt ihr des gelese? Ei ebschde Äbbelwoipanscher die !! Unser Stöffsche net aus unsern Äbbel gekeltert! Ei sach e mal, sinn die dann ganz dorsch, die Possmann-Höhl-Heil-Mafia? Unser Stöffsche für des mer in Brüssel bei den Stinkstiffel von Bürokrade gekämpft habbe das mers weider Äppelwoi nenne derfe, des golden Produggt hessischer Kelterkunst, des habbe die mit Abbelsaftkonzentrat aus Polen unn Muriänien, odder wie des da unne uffem Balkan hast, zusamme gepanscht! Des derf doch net war sei! Des iss ja wie wennste dem Bordauxwoi Traubesaft aus Australien dezu schittst. Na, Herrschafde, so geht des net. Unn dann, unn dann hawwe se aach noch Zugger in des Stöffsche geschitt. Zugger! Ka wunner das unsern Äbbelwio kam mehr des Hemd in die Hoos zieht.
Ich hab jetzt die HeSgbStö gegründed. ! Die Hessische Schoppepetzer gesche die Balkanisierung des Stöffche !!! Isch ruf alle Hessische Schobbepetzer für nächsten Samstach zur Demo uff!!! Trefft eusch um 15 Uhr 30 in euerner Stammkneib und protestiert dorsch taktisches Schoppevernichde! Des Zeusch muß weggesoffe wern bevor sich noch aaner de Dünnschiß bei dene ausserhessische Äbbel holt ! Unn Eintracht gugge könnt ihr aach noch debei!!
User Umwelt-Tussi die da in Wissbade hockt, die Priszylla oder so, die hat sich aach mäschdisch uffgereschd. Ausnahmsweise muß isch ihr da aach e mal reschd gebbe. Als wenn mer net genuch Äbbel bei uns hädde, abber die wern wahrscheinlich in de Normandie zu Siedre gemacht, odder wie da des Stöffsche hast. Is ja modern heut zu dach des Zeusch erst dorsch die Weltgeschicht zu schicke bevor mer was rischdische draus macht!
Unn isch Dabbes hab werklisch geglabt das die Dr. Johanna, also die Fraa Höhl, sozusache die Fraa Rauscher von Hochstadt, das die e ehrlisch Haut is ! So kann mer sich deusche. Aber naja, wen wunnerst, die is ja middem ehemalsische Präsident von de Kickers Spreschmischnetaus verheirat.
Also Leut isch her jetzt e mal uff zu schenne!
Mer sehe uns am Samsdach zur HeSgbStö-Demo in de Stammlkneibe. Mir lasse uns unsern Schoppe net verpansche, mir net!!!
Guude Leut,
Ihne Ihrn Bembelzwersch
http://www.fr-online.de/rhein-main/apfelwein-gepanschtes-im-gerippten,1472796,29896250.html
Adlergebabbel 